कोरोना भाइरस नेपाल: १३ तस्बिरमा कोभिड खोप अभियानको पहिलो दिन

थोरै डेटा खपत गर्ने गरी पढ्न मिल्ने संस्करण हेर्नुहोस्।

२७ जनवरी २०२१

नेपालका सातै प्रदेशमा बुधवार कोभिड खोप लगाउन सुरु गरिएको छ।भारतले सहयोग दिएको १० लाख मात्रा कोभिशील्ड स्वास्थ्यकर्मीहरूलाई लगाएर पहिलो चरणको खोप अभियान सुरु गरिएको हो।

प्रधानमन्त्री केपी शर्मा ओलीले अबको तीन महिनाभित्र सबै नेपालीले कोरोनाभाइरसविरुद्ध खोप प्राप्त गर्ने बताएका छन्।

कोभिडविरुद्ध खोप अभियानको शुभारम्भ गर्दै ओलीले सबै नेपालीले निःशुल्क खोप प्राप्त गर्ने बताएका हुन्।

प्रम ओली — तस्बिरको क्याप्शन, खोप कार्यक्रमको उद्‌घाटन गर्दै प्रधानमन्त्री केपी शर्मा ओलीले तीन महिनाभित्र सबैलाई नि:शुल्क खोप उपलब्ध गराइने बताएका छन्

"तीन महिनाभित्र सबै नेपालीलाई खोप लगाइसक्नेछौँ। मेरो विचारमा तीन महिना लाग्न सक्छ जस्तो लाग्छ," प्रधानमन्त्री ओलीले भने।

खोप नाफा कमाउने विषय हुनु नहुने र यो सबैको पहुँचमा हुनुपर्ने उनले बताए।

मन्त्री ह्रदयेश त्रिपाठी — तस्बिरको क्याप्शन, स्वास्थ्य तथा जनसङ्ख्या मन्त्री हृदयेश त्रिपाठीले कोभिड–१९ विरुद्धको खोप शुभारम्भ कार्यक्रममा खोपबारे जानकारी गराएका थिए

काठमाण्डूको शुक्रराज ट्रपिकल तथा सरुवा रोग अस्पताल टेकु खोप केन्द्रमा कोभिडविरुद्धको खोप लगाउँदै एक चिकित्सक — तस्बिरको क्याप्शन, सरकारले बुधवार करिब १२० स्थानबाट एकै पटक देशव्यापी रूपमा खोप कार्यक्रम अघि बढाएको छ।

उद्घाटन कार्यक्रममा भर्चूअल माध्यमबाट जोडिएको टेकुस्थित शुक्रराज ट्रपिकल तथा सरुवा रोग अस्पतालमा निर्देशक डा. सागरकुमार राजभण्डारीले पहिलो खोप लगाएका छन्।