WPL 2023 Auction: स्मृती मंधानासाठी बंगळुरूने केला खजिना रिता; 3.4 कोटींची बोली

'विमेन्स प्रीमिअर लीग' अर्थात महिलांच्या आयपीएल स्पर्धेसाठी खेळाडूंचा लिलाव आज मुंबईत झाला.

भारतात महिला क्रिकेट 1976 पासून खेळलं जात आहे. 2008 पासून पुरुषांची आयपीएल स्पर्धा होत आहे. यंदापासून वूमन्स प्रीमिअर लीगची सुरुवात होत आहे.

या स्पर्धेसाठी रॉयल चॅलेंजर बंगळुरूने स्मृती मंधानाला 3.4 कोटी रुपये देऊ केले आहेत.

वूमन्स प्रीमिअर लीग स्पर्धेसाठीच्या लिलावात स्मृती मन्धानासाठी बंगळुरु संघाने खजिना रिता केला. बंगळुरु संघाने 3.4 कोटी रुपये खर्चत स्मृतीला ताफ्यात समाविष्ट केलं.

प्रत्येक संघासाठी 12 कोटी रुपयांची मर्यादा आहे. मात्र तरीही बंगळुरुने स्मृतीसाठी जोरदार दावेदारी केली. 26 वर्षीय स्मृतीला संघात समाविष्ट करण्यासाठी मुंबईचा संघही आतूर होता. मात्र बंगळुरुने बाजी मारली.

भारतीय संघाची उपकर्णधार असलेली स्मृती ऑस्ट्रेलियातल्या बिग बॅश तसंच इंग्लंडमधल्या द हंड्रेड स्पर्धेतही खेळते. भारतीय संघाच्या कर्णधारपदाची धुराही तिने सांभाळली आहे. डावखुऱ्या स्मृतीची फलंदाजी पाहणं ही पर्वणी असते. सांगलीची स्मृती आता विराट कोहलीच्या बंगळुरू संघाकडून खेळताना दिसेल.

विदेशी खेळाडूंमध्ये ऑस्ट्रेलियाच्या अॅशले गार्डनरसाठी गुजरात टायटन्स संघाने 3.2 कोटी रुपयांची बोली लावली. ऑस्ट्रेलियाची एलियास पेरी बंगळुरूकडून खेळताना दिसेल. तिच्यासाठी बंगळुरूने 1.7 कोटी रुपये मोजले.

नताली शिव्हरसाठी मुंबईने अहमहमिकेने पॅडल उंचावलं. 3.2 कोटी रुपये खर्चत मुंबईने बाजी मारली. ऑस्ट्रेलियाची कर्णधार मेग लॅनिंग दिल्लीकडून खेळणार आहे.

रविवारी दक्षिण आफ्रिकेत सुरू असलेल्या महिला ट्वेन्टी20 वर्ल्डकप स्पर्धेत पाकिस्तानविरुद्धच्या सलामीच्या लढतीत झुंजार अर्धशतकी खेळी करणारी जेमिमा रॉड्रिग्ज दिल्ली कॅपिटल्स संघाचा भाग असणार आहे. दिल्लीने जेमिमाकरता 2.2 कोटी रुपयांची बोली लावली.

काही दिवसांपूर्वीच भारताच्या मुलींनी U19 वर्ल्डकपच्या जेतेपदावर नाव कोरलं होतं. या संघाची कर्णधार आणि धडाकेबाज फलंदाज शफाली वर्मा दिल्लीकडून खेळणार आहे. मूळच्या हरियाणाच्या शफालीसाठी दिल्लीने 2 कोटी रुपये खर्च केले.

हरमनप्रीत कौरसाठी 1.8 कोटींची बोली

भारतीय संघाची विकेटकीपर आणि वादळी खेळींसाठी प्रसिद्ध ऋचा घोष बंगळुरू संघाकडून खेळणार आहे. ऋचासाठी बंगळुरू संघाने 1.9 कोटी रुपयांची बोली लावली.

भारतीय संघाची कर्णधार हरमनप्रीत कौर मुंबई इंडियन्स संघाकडून खेळणार आहे. भारतीय पुरुष संघाचा कर्णधार रोहित शर्मा मुंबई इंडियन्सचा कर्णधार आहे. आता महिला संघाची कर्णधारही मुंबईकडेच असणार आहे. तडाखेबंद खेळींसाठी प्रसिद्ध हरमनप्रीतसाठी मुंबईने 1.8 कोटी रुपये खर्च केले.

दीप्ती शर्मा युपी वॉरियर्स संघाकडून खेळणार आहे. फिरकीपटू दिप्तीसाठी जोरदार मुकाबला पाहायला मिळाला. मूळच्या उत्तर प्रदेशच्या दिप्तीसाठी वॉरियर्स संघाने सर्वोच्च अशी 2.6 कोटी रुपयांची बोली लावत बाजी मारली.

वेगवान गोलंदाज रेणुका सिंगसाठी बंगळुरू संघाने 1.5 कोटी रुपयांची सर्वोच्च बोली लावली.

मुंबई संघाने पूजा वस्त्राकरसाठी 1.9 कोटी रुपयांची बोली लावत बाजी मारली. फलंदाज यात्सिका भाटियासाठी मुंबईने 1.5 कोटी रुपये खर्च केले. युपी वॉरियर्स संघाने 55 लाख रुपये खर्च करत अंजली सार्वणीला संघात समाविष्ट केलं.

संघ असे आहेत

बंगळुरू- स्मृती मन्धाना, सोफी डेव्हाईन, एलियास पेरी, रेणुका सिंग, ऋचा घोष, एरिन बर्न्स, दिशा कसाट, इंद्राणी रॉय, श्रेयांका पाटील, कनिका अहुजा, आशा शोबना, हिदर नाईट, डेन व्हॅन निइकर्क, प्रीती बोस, पूनम खेमना, कोमल झंझाड, मेगन शूट, सहाना पवार

मुंबई- हरनप्रीत कौर, नताली शिवर, अमेलिआ केर, पूजा वस्राकर, यात्सिका भाटिया, हिदर ग्रॅहम, इसी वोंग, अमनजोत कौर, धारा गुज्जर, साइका इशाक, हायली मॅथ्यूज, चोल टायरॉन, हुमाइरा काझी, प्रियंका बाला, सोनम यादव, जिंतामनी कलिता, नीलम बिश्त

गुजरात जायंट्स- अॅश गार्डनर, बेथ मूनी, सोफिया डंकले, अनाबेल सदरलँड, हरलीन देओल, दिआंद्रा डॉटिन, स्नेह राणा, एस.मेघना, जॉर्जिया वेरहम, मानसी जोशी, डी.हेमलता, मोनिका पटेल, तनुजा कंवर, सुषमा वर्मा, हर्ले गाला, अश्वनी कुमारी, परुनिका सिसोदिया, शबनिम शकील.

उत्तर प्रदेश वॉरियर्स- सोफी इक्लेस्टोन, दिप्ती शर्मा, ताहिला मॅकग्रा, शबनम इस्माईल, एलिसा हिली, अंजली सर्वानी, राजेश्वरी गायकवाड, श्वेता सेहरावत, एस.यशश्री, किरण नवगिरे, ग्रेस हॅरिस, देविका वैद्य, लॉरेन बेल, लक्ष्मी यादव, पार्श्वी चोप्रा, सिमरन शेख.

दिल्ली कॅपिटल्स- जेमिमा रॉड्रिग्ज, मेग लॅनिंग, शफाली वर्मा, राधा यादव, शिखा पांडे, मॅरिझॉन काप, तितास साधू, अलाइस काप्से, तारा नॉरिस, लॉरा हॅरिस, जासिआ अख्तर, मिनू मानी, तानिया भाटिया, पूनम यादव, जेस जोनासन, स्नेहा दिप्ती, अरुंधती रेड्डी, अपर्णा मोंडल.

कधी होईल वीपीएल?

4 ते 26 मार्च या कालावधीत वीपीएल मुंबईत खेळवण्यात येईल.

विमेन्स प्रीमिअर लीगची तयारी म्हणून बीसीसीआयने 'ट्वेन्टी-20 चॅलेंज' नावाने स्पर्धा आयोजित केली होती. पुरुषांच्या आयपीएल स्पर्धेदरम्यान चॅलेंज स्पर्धेच्या मॅचेस खेळवण्यात आल्या.

सुपरनोव्हा, ट्रेलब्लेजर्स आणि वेलोसिटी अशा नावाचे तीन संघ होते. भारताच्या प्रमुख खेळाडूंसह जगभरातील अव्वल खेळाडू या स्पर्धेत सहभागी झाल्या होत्या.

लिलाव कुठे झाला?

मुंबईत वांद्रे-कुर्ला संकुलातील जिओ कन्व्हेशन सेंटर इथे लिलाव झाला.

सामने कुठे होणार?

पहिला हंगाम मुंबईतच होणार आहे. मुंबईत वानखेडे स्टेडियम, ब्रेबॉर्न स्टेडियम आणि डीवाय पाटील स्टेडियम अशी तीन मैदानं उपलब्ध असल्याने लॉजिस्टिक्सच्या दृष्टीने सामने आयोजित करणं सोयीचं आहे. पण अद्याप यासंदर्भात अधिकृत घोषणा झालेली नाही.

संघ कुठले आहेत?

वीपीएलमध्ये एकूण 5 संघ असणार असून त्यांचं एकूण मूल्य 4,669 कोटी रुपये एवढं आहे. अदानी स्पोर्ट्सलाईन प्रायव्हेट लिमिटेड कंपनीने अहमदाबाद संघ खरेदी केला असून त्यासाठी 1,289 कोटी रुपये मोजले आहेत.

इंडियाविन स्पोर्ट्स प्रायव्हेट लिमिटेड कंपनीने मुंबई संघ खरेदी करण्यासाठी 912 कोटी रुपये खर्च केले. रॉयल चॅलेंजर्स स्पोर्ट्स प्रायव्हेट लिमिटेडने बंगळुरू संघासाठी 901 कोटी रुपये मोजले.

810 कोटी रक्कम देऊन जेएसडब्ल्यू जीएमआर क्रिकेट प्रायव्हेट लिमिटेडने तर कॅप्री ग्लोबल होल्डिंग्ज प्रायव्हेट लिमिटेडने 757 कोटी रुपये खर्चून लखनौचा संघ विकत घेतला आहे.

लिलावाचे नियम

लिलावात 90 खेळाडू संघाच्या ताफ्यात सामील होतील. लिलावात 448 खेळाडू असून त्यापैकी 269 भारतीय तर 179 विदेशी खेळाडू आहेत. प्रत्येक संघाला खेळाडू खरेदी करण्यासाठी 12 कोटी रुपये मिळणार आहेत.

प्रत्येक संघ 15 ते 18 खेळाडू खरेदी करु शकतो. प्रत्येक संघ सहा विदेशी खेळाडूंना ताफ्यात समाविष्ट करु शकतात. असोसिएट देशांचे खेळाडूही लिलावात असतील.

खेळाडूंना त्यांची बेस प्राईज 30 लाख, 40 लाख किंवा 50 लाख निश्चित करण्याचा अधिकार देण्यात आला होता. देशासाठी न खेळलेल्या खेळाडूंसाठी ही रक्कम 10 लाख आणि 20 लाख अशी निश्चित करण्यात आली आहे.

ऑस्ट्रेलिया (29), इंग्लंड (31), वेस्ट इंडिज (23), न्यूझीलंड (19) दक्षिण आफ्रिका (17) तर श्रीलंका (15) झिम्बाब्वे (11) खेळाडू असणार आहेत. बांगलादेश आणि थायलंडचे प्रत्येकी 9 खेळाडू असणार आहेत.

सर्वाधिक बेस प्राईज

24 खेळाडूंची बेस प्राईज सर्वोच्च गटात आहे. हरमनप्रीत कौर, स्मृती मन्धाना, दीप्ती शर्मा, रेणुका सिंग, जेमिमा रॉड्रिग्ज, शफाली वर्मा, पूजा वस्त्राकर, ऋचा घोष, स्नेह राणा, मेघना सिंग यांचा समावेश आहे.

अॅशले गार्डनर, एलियास पेरी, मेग लॅनिंग, अॅलिसा हिली, जेस जोनासन, डार्सी ब्राऊन या विदेशी खेळाडूंवर फ्रँचाइजींचं लक्ष असेल.

काही दिवसांपूर्वीच भारताच्या मुलींनी U19 महिला विश्वचषकावर नाव कोरलं होतं. या संघातील सर्व खेळाडूंची लिलावात आहेत.

लिलावकर्त्या कोण?

पहिल्यावहिल्या विमेन्स प्रीमिअर लीगच्या लिलावाची जबाबदारी बीसीसीआयने मल्लिका सागर यांच्याकडे सोपवली आहे. प्रो कबड्डी स्पर्धेसाठी झालेल्या लिलावाचं समन्वयन त्यांनी केलं आहे.

आर्ट कलेक्टर आणि कला क्षेत्रातील विविध लिलावांच्या समन्वयक म्हणून त्यांनी काम पाहिलं आहे. पुरुषांच्या आयपीएल स्पर्धेसाठी रिचर्ड मेडले आणि ह्यू एडमेडेस यांनी काम पाहिलं आहे.

सपोर्ट स्टाफ

इंग्लंडच्या माजी कर्णधार चार्लोट एडवर्ड्स विमेन्स प्रीमिअर लीगमधल्या मुंबई संघाच्या मुख्य प्रशिक्षक असणार आहेत. भारताच्या माजी वेगवान गोलंदाज झूलन गोस्वामी मुंबई संघाच्या मेन्टॉर असतील. भारताच्या माजी अष्टपैलू खेळाडू देविका पळशीकर बॅटिंग कोच असणार आहेत.

राचेल हेन्स गुजरात जायंट्स संघाच्या मुख्य प्रशिक्षक असतील. गुजरात जायंट्सने हेन्स यांच्याव्यतिरिक्त भारताच्या माजी कर्णधार मिताली राज यांची मेन्टॉर म्हणून नियुक्ती केली आहे. भारताच्या U19 युवा संघाच्या प्रशिक्षक नूशीन अल खादीर बॉलिंग कोच तर तुषार आरोठे बॅटिंग कोच असणार आहेत.

उत्तर प्रदेश वॉरियोझ संघाने जॉन लुईस यांची मुख्य प्रशिक्षक म्हणून नियुक्ती केली आहे. त्यांच्या बरोबरीने अंजू जैन (सहाय्यक कोच), अॅशले नॉफक (बॉलिंग कोच), लिला स्थळेकर (मेन्टॉर) असणार आहेत.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)