धनुष : इंग्रजी बोलण्याचा आत्मविश्वास नसणारा मुलगा ते सुपरस्टार अभिनेता

आज धनुषचा वाढदिवस. त्यानिमित्तानं त्याचा प्रवास सांगणारी ही बातमी पुन्हा शेयर करत आहोत.

दाक्षिणात्य चित्रपटसृष्टीतील मोठं नाव असलेला अभिनेता धनुष अलीकडेच 'अतरंगी रे' या सिनेमाच्या माध्यमातून पुन्हा एकदा बॉलिवूडमधून झळकला. या चित्रपटात त्याच्याबरोबर अक्षय कुमार आणि सारा अली खान मुख्य दिसले.

अभिनेता, निर्माता, गीतकार व गायक अशा अनेक भूमिकांमधून धनुषनं त्याच्या चाहत्यांना मनमुराद आनंद दिला आहे. कॉलिवूड, बॉलिवूड आणि हॉलिवूड असा समांतरपणे प्रवास तो सध्या करत आहे.

2002 मध्ये 'थुल्लुवाढो इलामाई' चित्रपटातून 'महेश' नावाचं पात्र रंगवत त्यानं अभिनयाची कारकिर्द सुरू केली. तेव्हापासून आतापर्यंतचा त्याचा प्रवास अगदीच सोपा राहिलेला नाही.

चित्रपट क्षेत्रातील जडणघडणीच्या काळात त्याला अनेक वादांना सामोरं जावं लागलं. शारीरिक ठेवणीवरून त्याच्यावर टीका झाली, त्याला अपयशही सहन करावं लागलं.

मात्र, या सगळ्यावर मात करून बहुआयामी व्यक्तिमत्वाचा धनुष जगासमोर आहे. 'अतरंगी रे' या चित्रपटाच्या निमित्तानं पुन्हा एकदा तो चर्चेत आहे. त्याच्या या रंजक प्रवासातील काही खास गोष्टी जाणून घेऊयात.

शेफ व्हायचं होतं

कारकिर्दीच्या सुरुवातीच्या काळामध्ये इंजिनीअर व्हायचं की शेफ व्हायचं याबद्दल धनुषच्या मनात संभ्रमाची स्थिती होती. पण त्याच्या भावानं त्याला चित्रपट क्षेत्रामध्ये आणलं.

धनुषचं त्याच्या आईवर खूप प्रेम आहे. आईच्या हातचं जेवायला त्याला खूप आवडतं.

धनुषला शेफ व्हायचं होतं. आईला स्वयंपाकामध्ये मदत करायला आणि घरातील सर्वांना जेवण वाढायलाही त्याला आवडतं. पण त्याला स्वयंपाक करता येत नाही.

राजकिरण यांचा प्रभाव

धनुषवर तामिळ अभिनेते राजकिरण यांचा प्रचंड प्रभाव आहे. ते माझ्या कुटुंबासाठी 'देवासमान' आहेत, असं धनुष म्हणतो. राजकिरण यांनीच धनुषचे वडील कस्तुरीराजा यांच्या पहिल्या चित्रपटाची निर्मिती केली होती, तसंच धनुषचा दिग्दर्शक म्हणून पहिला चित्रपट 'पा पांडी'चेही निर्माते तेच होते.

दिग्दर्शक वेत्रीमारन आणि धनुष हे अगदी जिवलग मित्र आहेत. "वेत्रीमारन माझ्याबरोबर जिममध्ये व्यायाम करायचा. आता तो योगा करायला लागलाय. तो तसाही आळशी असल्यामुळं त्याच्यासाठी ते सोपं आहे," असं धनुष गमतीनं सांगतो.

दोन दिग्दर्शकांबरोबर कथा न ऐकताही काम करायची धनुषची तयारी असते. त्यापैकी भाऊ सेल्वाराघवन असून दुसरा वेत्रीमारन आहे.

बॉलिवूडमध्ये पदार्पण

धनुषने "रांझणा" या चित्रपटाद्वारे बॉलिवूडमध्ये पदार्पण केलं होतं. त्यावेळी हिंदी येत नसल्याचं त्यानं दिग्दर्शक आनंद एल. राय यांना स्पष्टपणे सांगितलं होतं.

आनंद एल राय यांनी त्याला तामिळमध्येच बोलायला सांगितलं. डबिंग हिंदी कलाकाराकडून करून घेऊ असं ते म्हणाले होते.

मात्र दुसऱ्या दिवशी धनुषने त्याचे हिंदी संवाद तामिळमध्ये लिहिले आणि ते पाठ केले. चित्रीकरणाच्या वेळी तो हिंदीतच बोलला. एक-दोन टेकमध्येच तो दिग्दर्शकाचं समाधान होईल अशा रितीने काम करत होते.

"अभिनेता म्हणून माझ्याकडून दिग्दर्शकाला बऱ्याचा आशा असणार. त्यामुळं त्यांची निराशा व्हावी असं मला वाटत नाही," असं धनुष सांगतो.

'अतरंगी रे' या चित्रपटाद्वारे आनंद एल राय यांनी पुन्हा एकदा धनुषला बॉलिवूडच्या चित्रपटात संधी दिली.

संगीताशी वेगळं नातं

"धनुषला संगीताविषयी बरंच ज्ञान आहे, पण तो दिखावा करत नाही. 'जगामे थन्धीरम' करताना आम्ही त्याच्या सूचना ऐकूण मग गाणी चांगली झालीत का ते ठरवायचो," असं बीबीसीला दिलेल्या मुलाखतीत संगीतकार संतोष नारायणन यांनी सांगितलं होतं.

'जगामे थन्धीरम'पूर्वी संतोष नारायणन यांनी धनुषच्या 'कर्नन' या चित्रपटासाठी संगीत दिलं होतं. या चित्रपटात धनुषने 'थत्तन थत्तन' हे गाणं गायलं. 45 मिनिटांत गाण्याचं रेकॉर्डिंग करून तो पुढच्या चित्रिकरणासाठी रवाना झाला होता.

'कोलावेरी डी' हे गाणं धनुषच्या आयुष्यातील एखाद्या अध्यायासारखं आहे. हे गाणं प्रचंड हिट ठरलं. या गाजलेल्या गाण्याद्वारेच त्यानं गाणं लिहिण्याची सुरुवात केली. आतापर्यंत धनुषनं 30 पेक्षाही जास्त गाणी लिहिली आहेत.

संगीत दिग्दर्शक युवन शंकर राजा यांच्याबरोबर त्यानं गायक म्हणून सर्वप्रथम काम केलं. जी.व्ही.प्रभासकुमार, देवा, हॅरिस जयराज अशा अनेक संगीतकारांसाठीही त्यानं गाणी गायली आहेत.

इलाईराजा यांच्या संगीताचा धनुष हा प्रचंड मोठा चाहता आहे. इलाईराजा यांचं संगीत इतर कशाहीपेक्षा महत्त्वाचं आहे, असं धनुष म्हणतो.

त्यांच्या संगीतातून मला अभिनयामध्ये प्रेरणा मिळते असं धनुष सांगतो. दुःखी, आनंदी व रोमँटिक दृश्यांचं चित्रीकरण करताना इलाईराजा यांचं संगीत ऐकून मग तो अभिनयाला सुरुवात करतो.

धनुषने अनिरुद्धला '3' या चित्रपटाद्वारे संगीत दिग्दर्शनाची संधी दिली.

लवकरच हॉलिवूडमध्ये झळकणार

धनुष आता त्याच्या कामाची व्याप्ती आणखी वाढवत आहे. 'द ग्रेमॅन' या चित्रपटाद्वारे धनुष हॉलिवूडमध्ये पदार्पण करत आहे.

'आधी मला इंग्रजी बोलण्यासाठीचा आत्मविश्वास नव्हता. कोणी माझ्याशी इंग्रजीत बोललं, तर मी फक्त 'येस' आणि 'नो' एवढंच बोलायचो. पण माझ्या बायकोने मला बरीच इंग्रजी पुस्तकं वाचायला लावली. त्यामुळं इंग्रजी बोलायला मदत झाली," असं तो सांगतो.

धनुष स्वतःला दिग्दर्शकाचा अभिनेता म्हणतो. "एखाद्या दृश्यात मी कोणत्या प्रकारचा अभिनय करायला हवा, हे माझ्या दिग्दर्शकानं ठरवणं मला योग्य वाटतं," असं त्याचं मत आहे.

दिग्दर्शक शेखर कमुला या चित्रपटाद्वारे तो टॉलिवूडमध्येही पदार्पण करत आहे. धनुषने त्याच्या ट्विटर अकाऊंटद्वारे ही माहिती दिली होती.

प्रथम दिग्दर्शन करताना त्यानं अभिनेते राजकिरण यांना 'पा पंडी' या चित्रपटामध्ये घेतलं. तसंच अभिनेते गौंडामनी यांनाही त्याला चित्रपटात घ्यायचं होतं.

धनुष गौंडामनी यांचा मोठा चाहता आहे. आपल्या दिग्दर्शनात त्यांनी काम करावं, असं त्याला कायमच वाटत आलं आहे.

21 व्या वर्षी लग्न

धनुषचं लग्न 21 व्या वर्षीच झालं होतं. त्यावर त्यानं खूपच कमी वयात लग्न केलं, असं लोक त्याला म्हणायचे.

मात्र मला माझं तारुण्य माझ्या मुलांबरोबर घालवायचं आहे असं त्याचं त्यावर उत्तर असायचं. सध्या धनुषचा मोठा मुलगा 15 वर्षांचा तर धाकटा मुलगा 10 वर्षांचा आहे.

चित्रपट निर्मितीतही मिळवले यश

धनुषने त्याच्या 'वंडरबार' या कंपनीद्वारे 16 चित्रपटांची निर्मिती केली आहे. कक्का मुत्ताई, विसारनाई, काला व वाडाचेन्नई अशा चित्रपटांना प्रेक्षकांनी चांगली दाद दिली. कक्का मुत्ताई व विसारनाई या चित्रपटांचा निर्माता म्हणून धनुषला दोन राष्ट्रीय पुरस्कारही मिळाले.

त्याला 'आडुकलम' व 'असुरन' या चित्रपटांसाठी दोन वेळा अभिनयाचे राष्ट्रीय पुरस्कार मिळाले आहेत.

गेल्या दोन वर्षांमध्ये त्याच्या कारकिर्दीचा आलेख चढउतार असलेला राहिला आहे. वाडा चेन्नई, मारी-२, असुरन, पत्तास, कर्नन व जगामे थन्धीरम हे त्याचे चित्रपट या दरम्यान आले.

काधल कोन्देन, पुदुपेट्टई, आदुकलम, वाडाचेन्नई, असुरन व कर्नन या चित्रपटांनी त्याच्या अभिनयाला नवी ओळख मिळवून दिली.

ट्विटरवर धनुषचे एक कोटींहून अधिक फॉलोअर आहेत.

आगामी काळात धनुषच्या काही महत्त्वाच्या चित्रपटांसह त्याला पहिला हॉलिवूड चित्रपट 'द ग्रेमॅन' देखील येत आहे. त्यानंतर स्वतःच्या दिग्दर्शक म्हणून पुढच्या प्रोजेक्टचा विचार करणार असल्याचं त्यानं सांगतलं आहे.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)