पी. चिदंबरम : जीडीपीचा दर 4.5 टक्के होणं, हेच का अच्छे दिन
फोटो स्रोत, Getty Images
काँग्रेस नेते पी. चिदंबरम यांना 4 डिसेंबरला आयएनएक्स मीडिया मनी लाँड्रिंगप्रकरणी सुप्रीम कोर्टानं जामीन मंजूर केला. 106 दिवस तुरुंगात घालवून बाहेर आलेल्या चिदंबरम यांनी गुरुवारी (5 डिसेंबर) पत्रकार परिषद घेतली.
या पत्रकार परिषदेत चिदंबरम यांनी मोदी सरकारच्या आर्थिक धोरणांवर कडाडून टीका केली. तसंच या सरकारच्या काळात सर्व संस्थांमध्ये, माध्यमांमध्ये भीतीचं वातावरण असल्याचंही त्यांनी म्हटलं.
या पत्रकार परिषदेतील महत्त्वाचे मुद्दे -
1. तब्बल 106 दिवसांनंतर तुमच्याशी बोलताना मला आनंद होत आहे. काश्मीरधील संचारबंदी आणि नेत्यांच्या नजरकैदेबाबत, त्य़ांच्या स्वातंत्र्याबाबत मला चिंता आहे.
2. तुरुंगातील 106 दिवसांत मी अधिक मजबूत झालो, याला 3 कारणं आहेत. मंत्री म्हणून माझा कारभार पारदर्शक राहिला, माझ्या कुटुंबाचा देवावर विश्वास आहे आणि न्यायालयात मला न्याय मिळेल, असा मला विश्वास आहे.
3. सरकार चुकतंय...कारण त्यांना त्रुटीच कळत नाहीयेत. नोटांबदी, जीएसटी आणि पंतप्रधान कार्यालयाच्या हातातील एककेंद्री नेतृत्व या गंभीर चुका आहेत.
4. जीडीपीचा दर 4.5 टक्क्यांवर घसरणं हेच का अच्छे दिन?
5. कांद्याचे जर गगनाला भिडले आहेत, पण यावर उत्तर काय तर अर्थमंत्री कांदे खात नाहीत. देशाच्या अर्थव्यवस्थेबाबत सरकार दिशाहीन आहे. अर्थव्यवस्था सांभाळण्यात सरकार असमर्थ आहे.
6. काँग्रेसनं 150 कोटी लोकांना दारिद्र्यरेषेच्या बाहेर काढलं, तर मोदी सरकारनं नोटाबंदीमुळे लाखो लोकांना गरिबीत ढकललं.
7. आर्थिक सुधारणांसाठी भाजप याच धोरणांनी पुढे जाणार असेल, तर देवानं या देशाला वाचवावं.
चिदंबरम यांचं नाव INX मीडिया घोटाळ्यात कसं आलं?
पी. चिदंबरम हे अर्थमंत्री असताना INX मीडियामध्ये 305 कोटी रुपयांच्या परदेशी गुंतवणुकीचं हे प्रकरण आहे. मर्यादेपेक्षा जास्त गुंतवणूक स्वीकारण्यासाठी आयएनएक्स मीडियाला Foreign Investment Promotion Board (FIPB) कडून देण्यात आलेल्या परवानग्यांमध्ये अनियमितता आढळून आल्याचा आरोप आहे.
फोटो स्रोत, Getty Images
2007मध्ये जेव्हा या कंपनीला गुंतवणूक स्वीकारण्यासाठीची परवानगी देण्यात आली, तेव्हा पी चिदंबरम अर्थमंत्री होते.
आयएनएक्स मीडियाच्या प्रमोटर इंद्राणी मुखर्जी आणि त्यांचा नवरा पीटर मुखर्जी यांची अमंलबजावणी संचालनालयानं चौकशी केल्यानंतर चिदंबरम तपास यंत्रणांच्या रडारवर आले.
2018मध्ये ईडीनं याविषयी मनी लाँडरिंगची केस दाखल केली.
टाईम्स ऑफ इंडियाच्या वृत्तानुसार "इंद्राणी मुखर्जींनी तपास अधिकाऱ्यांना सांगितलं की एफआयपीबीच्या मंजुरीच्या बदल्यात चिदंबरम यांनी त्यांचा मुलगा कार्ती चिदंबरम यांना परदेशी पैशाबाबतच्या प्रकरणामध्ये मदत करायला सांगितलं होतं."
त्यानंतर अंमलबजावणी संचालनालयाने (Enforcement Directorate अर्थात ED) कार्ती चिदंबरम यांच्याविरुद्ध एक केस दाखल केली होती. या केसमध्ये कार्ती चिदंबरम यांनी लाच घेतल्याचा आरोप लावण्यात आला आहे.
INX मीडियाद्वारे कथित बेकायदेशीर रक्कम वळवल्याच्या माहितीच्या आधारे CBI ने कार्ती चिदंबरम आणि इतर काही जणांवर एक स्वतंत्र केस दाखल केली आहे.
पीटर आणि इंद्राणी मुखर्जी यांच्या मीडिया फर्मवरील कर चौकशी रद्द करण्यासाठी कथितरित्या रक्कम घेतल्याच्या प्रकरणात CBIने चार शहरांमध्ये चिदंबरम यांच्या घरांवर आणि कार्यालयांवर छापे मारले होते.
फोटो स्रोत, KARTI P CHIDAMBARAM FACEBOOK
या आधीही CBIनं अनेक वेळा कार्ती चिदंबरम यांची चौकशी केलेली आहे.
एअरसेल - मॅक्सिस प्रकरण
3500 कोटीच्या एअरसेल - मॅक्सिस करारप्रकरणीही केंद्रीय तपास यंत्रणा चिदंबरम यांची भूमिका सीबीआय तपासत आहेत.
मलेशियन कंपनी मॅक्सिसने 2006मध्ये एअरसेलचे 100 टक्के समभाग घेतले. यासाठीच्या परवानग्यांमध्येही अनियमितता असल्याचा आरोप चिदंबरम यांच्यावर आहे.
अर्थमंत्र्यांना 600 कोटींपर्यंतच्या परदेशी गुंतवणुकीला परवानगी देण्याचे अधिकार असतात. पण चिदंबरम यांनी 3500 कोटींच्या एअरसेल - मॅक्सिस सौद्याला आर्थिक बाबींविषय कॅबिनेट समितीच्या परवानगीशिवाय मंजुरी दिल्याचा आरोप आहे.
पैसे मागितल्याचा आरोप
2018 मध्ये सीबीआयने कार्ती चिदंबरम यांना चेन्नई विमानतळावरून अटक केली होती.
आयएनएक्स कंपनी विरोधातली संभावित चौकशी थांबवण्यासाठी कार्ती यांनी 10 लाख डॉलर मागितल्याचा आरोप आहे.
त्यानंतर कार्ती यांना कोर्टाकडून जामीन मिळाला.
फोटो स्रोत, FCEBOOK PAGE OF INDRANI MUKHERJEE
आयएनएक्स मीडिया कंपनीच्या माजी संचालक इंद्राणी मुखर्जी यांनी कार्ती यांनी आपल्याकडे पैसे मागितल्याचा आरोप सीबीआय चौकशीदरम्यान केला होता.
दिल्लीतील पंचतारांकित हॉटेलात हा सौदा झाल्याचं तपास यंत्रणांचं म्हणणं आहे.
दरम्यान इंद्राणी मुखर्जी या त्यांची मुलगी शीना बोरा हत्या प्रकरणी तुरुंगात आहेत.
हेही वाचलंत का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)
