पृथ्वी शॉ : 'दणका उडवेल' असं सांगणाऱ्या पॉन्टिंगवरच ओढवली डच्चू देण्याची वेळ

यंदाच्या हंगामात तुम्हाला खरा पृथ्वी शॉ दिसेल, हा हंगाम त्याच्यासाठी भरपूर धावांचा असेल असं म्हणणाऱ्या रिकी पॉन्टिंगवर यांच्यावर पृथ्वी शॉ याला डच्चू देण्याची वेळ ओढवली.

सनरायझर्स हैदराबादविरुद्ध दिल्ली कॅपिटल्स संघाने पृथ्वी शॉ याला संघातून वगळलं. आतापर्यंतच्या सामन्यात दिल्लीने पृथ्वीवर विश्वास ठेवला. पण पॉवरप्लेची षटकंही खेळून काढू न शकणाऱ्या पृथ्वीला एकाही लढतीत मोठी खेळी करता आली नाही.

"यंदाच्या हंगामात खरा पृथ्वी शॉ आपल्याला दिसेल. त्याचा फिटनेसही चांगला झाला आहे. त्याच्या दृष्टिकोनाबद्दल मी त्याच्याशी बोललो. ज्या पद्धतीने तो सराव करतो आहे, ते पाहून मला तरी तो मोठ्या हंगामासाठी सज्ज आहे असं वाटतं.

मला प्रामाणिकपणे वाटतं यंदाचा हंगाम त्याच्यासाठी सर्वाधिक धावांचा असेल. त्याच्या डोळ्यात ती चमक मी पाहिली आहे. त्याची धावांची भूक आधीपेक्षा वाढली आहे", असं दिल्ली कॅपिटल्सचे मुख्य प्रशिक्षक रिकी पॉन्टिंग महिनाभरापूर्वी म्हणाले होते.

ते पुढे म्हणाले, "यंदाच्या हंगामापूर्वी सगळं काही चांगलं जुळून आलं आहे. दोन दिवसांपूर्वी सरावाच्या वेळेस मी त्याला म्हणालो. जर तुम्ही खेळाप्रति अतीव निष्ठा दाखवलीत तर खेळ तुम्हाला भरभरुन देतो. त्याच्यामुळेच यंदाचा हंगाम त्याच्यासाठी मोठा असेल असं मला वाटतं. स्वत:प्रति प्रामाणिक असणं महत्त्वाचं. मला खेळाडूंकडून कोणताही आळशीपणा आवडत नाही. खेळाडूंना त्यांच्या प्रतिभेला न्याय द्यायला हवा. त्यांच्याकडून चांगला सराव करवून घेणं हे माझं काम आहे. भारतीय खेळाडूंवर चांगली कामगिरी करण्याचं, प्रसारमाध्यमांचं, चाहत्यांचं दडपण आहे".

यंदाच्या हंगामातील पृथ्वीची कामगिरी

लखनौविरुद्धच्या सलामीच्या लढतीत पृथ्वी 9 चेंडूत 12 धावा करुन तंबूत परतला. मार्क वूडने त्याला त्रिफळाचीत केलं.

लखनौ सुपरजायंट्सविरुद्ध 5 चेंडूत 7 धावा करुन तो बाद झाला. मोहम्मद शमीच्या गोलंदाजीवर अल्झारी जोसेफने त्याचा झेल टिपला.

राजस्थानविरुद्ध इम्पॅक्ट प्लेयर म्हणून त्याचा संघात समावेश करण्यात आला. वेगवान गोलंदाज खलील अहमदच्या जागी त्याचा समावेश करण्यात आला. ट्रेंट बोल्टने त्याला भोपळाही फोडू दिला नाही.

मुंबईविरुद्ध 10 चेंडूत 15 धावांची खेळी करुन तो माघारी परतला. हृतीक शोकीनने त्याला बाद केलं.

दिल्लीविरुद्ध हलगर्जीपणामुळे पृथ्वी धावचीत झाला. अनुज रावतच्या अफलातून फेकीमुळे त्याला भोपळाही न फोडता तंबूत परतावं लागलं.

कोलकाताविरुद्ध वरुण चक्रवर्तीने त्याला त्रिफळाचीत केलं. 11 चेंडूत 13 धावा करुन तो बाद झाला. याही सामन्यात तो पॉवरप्लेची वेस ओलांडू शकला नाही.

कमी वयात मिळालं होतं यश

अतिशय कमी वयात यश मिळवलेल्या क्रिकेटपटूंच्या यादीत पृथ्वी शॉचं नावही घेता येईल.

वयाच्या 14 व्या वर्षी जेव्हा पृथ्वी शॉने हॅरिस शिल्ड स्पर्धेत आपल्या शाळेकडून खेळताना 330 चेंडूमध्ये 546 धावा केल्या, तेव्हा त्याचं नाव पहिल्यांदा चर्चेत आलं.

2016 मध्ये पृथ्वी शॉ भारताच्या अंडर-19 टीमचा भाग होता. या संघाने आशिया कप स्पर्धा जिंकली होती.

त्याचवर्षी पृथ्वी शॉ मुंबईकडून रणजी ट्रॉफीमधला त्याचा पहिला सामना खेळला. हा रणजी ट्रॉफीचा उपांत्य सामना होता आणि मुंबई विरूद्ध तामिळनाडूची टीम होती.

या सामन्याच्या दुसऱ्या डावात पृथ्वी श़ॉ ने शतक केलं. या शतकामुळे मुंबईच्या टीमला विजय मिळाला.

2017मध्ये दलीप ट्रॉफीमधल्या आपल्या पहिल्याच सामन्यात शतक झळकावलं. दलीप ट्रॉफीमध्ये शतक झळकावणारा तो सर्वांत तरुण खेळाडू ठरला. आधी हा विक्रम सचिन तेंडुलकरच्या नावावर होता.

वर्ष 2017 मध्ये भारताने अंडर-19 वर्ल्ड कप जिंकला. त्या टीमचा कर्णधार होता पृथ्वी शॉ.

2018 मध्ये आयपीएल ऑक्शनमध्ये दिल्लीच्या टीमने पृथ्वी शॉला 1.2 कोटी रुपयांमध्ये खरेदी केलं होतं.

आयपीएलमध्ये पृथ्वी शॉच्या बेडधक खेळामुळे रिकी पॉन्टिंगही त्याचा चाहता बनला होता.

मात्र, आंतरराष्ट्रीय क्रिकेटमधल्या त्याच्या करिअरमध्ये अनेक चढ-उतारही आले.

2018 मध्ये त्याला वेस्ट इंडीजविरुद्धच्या कसोटी सामन्यात पहिला आंतरराष्ट्रीय सामना खेळण्याची संधी मिळाली. आपल्या पहिल्याच आंतरराष्ट्रीय कसोटी सामन्यात शतक झळकावलं.

पृथ्वी शॉला भारताकडून एकदिवसीय सामन्यांसाठी खेळण्याची संधी पहिल्यांदा 2020 मध्ये मिळाली.

पृथ्वी शॉने आतापर्यंत भारताकडून पाच कसोटी सामने, सहा एकदिवसीय सामने आणि एक टी-20 सामना खेळला आहे. कसोटी सामन्यात त्याच्या नावावर एक शतक आणि दोन अर्धशतकं आहेत.

पण पृथ्वी शॉला भारतीय संघात कायमस्वरूपी जागा मिळवता आली नाही.

उत्तेजक चाचणीत दोषी

2019 साली पृथ्वी शॉ उत्तेजक चाचणीमध्ये दोषी आढळला होता आणि त्याच्यावर आठ महिन्यांची बंदी घालण्यात आली होती.

पायाला झालेल्या दुखापतीमुळे पृथ्वी ऑस्ट्रेलिया दौऱ्यातून मायदेशी परतला होता. या दुखापतीतून सावरणाऱ्या पृथ्वीला लवकरात लवकर टीम इंडियात पुनरागमन करायचं होतं. मात्र खोकल्याने तो त्रस्त होता.

IPLपूर्वी झालेल्या सय्यद मुश्ताक अली स्पर्धेच्या माध्यमातून पुनरागमन करण्याचा पृथ्वीचा निर्धार होता. मात्र इंदूरला पोहोचल्यानंतर पृथ्वीला कफाचा त्रास जाणवू लागला. थंडी वाजत असल्याचं स्पष्ट झालं होतं.

काही दिवस कफ सिरप घेतल्याचं पृथ्वीने स्पष्ट केलं. BCCIला सांगितलं की त्याला कफ सिरपचं नाव आठवत नाही, कफ सिरपची बाटली आणि त्याचं कव्हरही त्याने काम झाल्यावर फेकून दिलं. त्यानंतर 21 फेब्रुवारीला तो मॅचही खेळला. त्याच्या आदल्या दिवशी त्याच्या लघवीचा नमुना घेण्यात आला होता.

आंतरराष्ट्रीय खेळाडूंना ICC तसंच BCCIच्या कोड ऑफ कंडक्टचं पालन करणं अनिवार्य असतं. उत्तेजकविरोधी पथकाकडून कोणते घटक प्रतिबंधित आहेत आणि कोणते नाहीत, याची माहिती खेळाडूंना देण्यात येते. कोणती औषधं घेतल्याने बंदीची कारवाई होऊ शकते, याची कल्पनाही त्यांना देण्यात येते.

यो-यो टेस्ट

भारतीय क्रिकेट नियामक मंडळाने क्रिकेटपटूंच्या फिटनेसला प्राथमिकता दिली आहे आणि याचं कसोशीने पालनही केलं आहे.

प्रत्येक खेळाडूला निवडीच्या आधी यो-यो टेस्ट द्यावी लागायची आणि त्याच आधारे टीम निवडली जायची.

2022 साली पृथ्वी शॉ यो-यो टेस्टमध्ये अपयशी ठरला होता. ही चाचणी बेंगळुरूच्या नॅशनल क्रिकेट अकेडमीमध्ये झाली होती. त्याच वेळी पृथ्वी आयपीएलमध्ये खेळला होता.

त्यावेळी पृथ्वी शॉने इन्स्टाग्रामवर एक पोस्ट लिहिली होती. त्यात त्याने लिहिलं होतं- तुम्हाला माझी आताची परिस्थिती माहीत नसेल, तर मला जज करू नका.

हे वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)