सांगलीत 'नीट'च्या परीक्षेत मुलींना कपडे उलटे घालून पेपर द्यावा लागण्याचा धक्कादायक प्रकार

'नीट परीक्षेसाठी माझी मुलगी शहरातला परीक्षा केंद्रावर गेली होती, परीक्षा संपल्यावर ती बाहेर पडली. यावेळी तिचा ड्रेस उलटा असल्याचे मला पाहायला मिळालं'.

तिला याबाबत विचारले असता, परीक्षा केंद्राच्या आता चेकिंग करून कपडे काढून उलटे घालण्यास सांगण्यात आले, मगच पेपरला बसण्यास देण्यात आल्याचे तिने सांगितलं.

हे ऐकून मला धक्का बसला, परीक्षेदरम्यान असे प्रकार कसे होऊ शकतात ?

सांगलीच्या मिरज येथील विद्यासागर चौगुले यांनी आपल्या आणि इतर मुलांच्या बाबतीत घडलेल्या प्रकाराबाबत संताप व्यक्त करत याप्रकरणी तक्रार केली आहे.

सांगली जिल्ह्यामध्ये 7 मे रोजी नीट परीक्षा पार पडली.

त्यापैकी सांगली शहरातल्या कस्तूरबाई वालचंद कॉलेज या ठिकाणी पार पडलेल्या परीक्षेच्या दरम्यान घडलेल्या एका घटनेने खळबळ उडाली आहे.

या परीक्षा केंद्रावर आलेल्या विद्यार्थिनी आणि विद्यार्थ्यांना चेकिंग करून परीक्षेसाठी पेपर लिहायला देण्यात आले.

मात्र चेकिंग दरम्यान मुलींना थेट कपडे काढून ते उलटे घालण्यास सांगण्यात आल्या आणि त्यानंतरच त्यांना पेपरला बसण्यासाठी परवानगी देण्यात आल्याचा हा धक्कादायक प्रकार समोर आला आहे.

परीक्षा संपल्यानंतर हा सर्व प्रकार उघडकीस आला आणि त्यानंतर पालकांमध्ये याबाबत संताप व्यक्त करण्यात आला आहे आणि परीक्षा केंद्रावर मुलींच्या बाबतीत घडलेल्या या प्रकारानंतर अनेक पालकांनी नॅशनल टेस्टिंग एजन्सीकडे याबाबत तक्रार दाखल केली आहे.

मिरजेतील डॉक्टर असणारे विद्यासागर चौगुले यांनी ही पहिली तक्रार दाखल केली आहे. चौगुले यांच्या मुलीच्या बाबतीतील हा प्रकार घडला आहे आणि त्यांच्या मुलीने त्यांना ही गोष्ट सांगितल्यावर घडलेल्या प्रकाराबद्दल त्यांनी नॅशनल टेस्टिंग एजन्सीकडे तक्रार दाखल केली आहे.

याबाबत डॉक्टर विद्यासागर चौगुले म्हणाले, 7 मे रोजी नीट परीक्षा पार पडली,या परीक्षेला आपली मुलगी देखील बसली होती.

तिचा नंबर हा सांगली शहरातल्या कस्तुरबा वालचंद कॉलेज या ठिकाणी आला होता.तिला सकाळी आपण परीक्षा केंद्रावर सोडले.

त्यानंतर साडे पाच वाजता पेपर सुटला आणि परीक्षा केंद्र बाहेर आपण तिला घेण्यासाठी थांबलो होतो.ती बाहेर आले त्यावेळी माझी नजर तिच्या ड्रेसवर गेली,

तिचा ड्रेस हा उलटा होता,मग हा ड्रेस उलटा कसा घातला आहेस,अशी विचारणा केली,मग तिने जे सांगितलं,ते खूपच धक्कादायक होतं.

परीक्षा केंद्राच्या आत गेल्यावर चेकिंग करण्यात आलं,चेकिंग करत असताना मग त्या ठिकाणी असणाऱ्या कर्मचाऱ्यांनी अंगावरचे कपडे काढून ते उलटे घालण्यास सांगितले.

आपल्याबरोबर असणाऱ्या इतर मुलींना देखील अशाच पद्धतीने सांगण्यात आलं,याशिवाय या ठिकाणी असणाऱ्या मुलांना देखील त्यांचे टी-शर्ट काढून त्यांना उलटे घालण्यात सांगण्यात आले.

मग खोलीमध्ये जाऊन मुलींनी आपले कुडते असतील किंवा टीशर्ट कपडे काढून ते उलटे घातले.

मुलांच्या बाबतीतही असेच घडले आहे.यानंतरचं आम्हाला पेपर लिहिण्यासाठी रूम मध्ये बसायला देण्यात आले, असे माझ्या मुलीने सांगितल्याचे विद्यासागर चौगुले सांगतात.

या घटनेबद्दल विद्यासागर चौगुले यांनी संताप देखील व्यक्त केला आहे,चौगुले म्हणाले,हा सर्व प्रकार आपल्यासाठी खूपच शॉकींग होता.

त्यामुळे मी परीक्षा संपल्यानंतर एक तासाभरातच नॅशनल टेस्टिंग एजन्सीला तक्रार केली.

मुलांच्या बाबतीत अशी गोष्ट होणं हे, अनपेक्षित नाही. कारण ही परीक्षा इतकी महत्त्वाची असते, की मुलं एक दोन वर्षांपासून याचा अभ्यास करतात.काही मुलं रिपीट करत असतात,एवढा तणाव असताना.

त्यांच्या सोबत असा प्रकार अजिबात अपेक्षित नाही,अस परत कधी व्हायला नको,यासाठी ज्यांनी कोणी हे केले आहे,त्यांना जबाबदार धरायला हवे, अशी आपली मागणी असून त्यासाठी आपण तक्रार केली आहे, असे विद्याधर चौगुले यांनी सांगितले आहे.

हा धक्कादायक प्रकार ज्या महाविद्यालयामध्ये घडला,त्या कस्तुरबा वालचंद कॉलेज,महाविद्यालयाच्या प्रशासनाशी संपर्क साधला असता, नॅशनल टेस्टिंग एजन्सीने आपले महाविद्यालय परीक्षा केंद्र म्हणून मागितले होती.

त्यानुसार त्यांना आपण फक्त परीक्षा केंद्रसाठी जागा उपलब्ध करून दिला. त्यांच्याकडून पर्यवेक्षकाची पहिल्यांदा मागणी झाली होती. मात्र पुन्हा त्यांनी त्याची मागणी केली नाही. त्यामुळे केवळ महाविद्यालयातील जागा परीक्षेसाठी उपलब्ध करून देण्यात आली.

त्या ठिकाणी चेकिंग असेल किंवा अन्य गोष्टी असतील त्यासाठी कॉलेज प्रशासनाकडून कोणते कर्मचारी उपलब्ध करून दिले नाहीत,किंवा त्या परीक्षेचा कसलाही संबंध नसल्याचे वालचंद कस्तुरबा वालचंद कॉलेज प्रशासनाकडून स्पष्ट करण्यात आले आहे.

मुलींना अंतर्वस्त्रे काढण्यास लावलं

केरळमध्ये गेल्या वर्षी झालेल्या नीट परीक्षेदरम्यान एका केंद्रावर परीक्षार्थी मुलींना अंतर्वस्त्रं काढायला लावण्यात आल्याचा धक्कादायक प्रकार उघड झाला होता.

कोल्लम इथल्या एका कॉलेजात नीट परीक्षेसाठी आलेल्या मुलींना अंतर्वस्त्रं काढा असं सांगण्यात आलं. अंतर्वस्त्रं काढल्यानंतरच परीक्षा देता येईल असं त्यांना सांगण्यात आलं होतं.

एका मुलीच्या पित्याने कोल्लम ग्रामीण पोलीस स्थानकात तक्रार दाखल केली. त्यानंतर या प्रकाराबाबत कळलं. परीक्षा केंद्रावर झालेल्या या धक्कादायक प्रकाराने मुलीची अवस्था बिकट झाली.

मुलीचे वडील गोपाकुमार सुरानद यांनी बीबीसीशी बोलताना सांगितलं की, "मुलीने सांगितलं की तिने जो अभ्यास केला होता ते सगळं विसरायला झालं. तिने या प्रकारानंतर कशीबशी परीक्षा दिली."

तक्रारीत गोपाकुमार यांनी म्हटलं आहे की, "माझ्या मुलीला परीक्षा केंद्रावर अंतर्वस्त्रं काढण्यास सांगण्यात आलं आहे. नॅशनल टेस्टिंग एजन्सीने जो ड्रेसकोड निश्चित केला आहे त्यात याचा उल्लेख नव्हता. माझ्या मुलीने तसं करायला नकार दिला तर तुला परीक्षा देता येणार नाही असं सांगण्यात आलं."

"माझ्या मुलीने सांगितलं की एक अख्खी खोली अंतर्वस्त्रांनी भरली होती. त्यापैकी अनेक मुली रडत होत्या. नीट एक महत्त्वाची प्रवेशप्रक्रिया आहे. अशा परीक्षेसाठी आलेल्या मुलींना मानसिक त्रासाला सामोरं जावं लागलं. अनेक मुली आपल्या ब्रेसियरचे हुक उघडून बंद करत होत्या," असं गोपाकुमार यांनी सांगितलं होतं.

सातत्याने असे प्रकार समोर

नीट परीक्षेदरम्यान कपड्यांसंदर्भात वाद होण्याची ही पहिलीच वेळ नाही. 2017 मध्ये केरळमध्येच कन्नूर जिल्ह्यात अशा स्वरूपाची घटना घडली होती. त्यावेळी काळ्या रंगाची ट्राऊजर परिधान केल्याने एका मुलीला परीक्षेला बसू देण्यात आलं नाही.

त्यावेळी त्या मुलीला आईसह वेगळ्या रंगाची ट्राऊजर शोधण्यासाठी बरीच पायपीट करावी लागली. रविवार असल्याने अनेक दुकानं बंद होती. ती मुलगी परीक्षेसाठी केंद्रावर आली तेव्हा मेटल डिटेक्टर बीप बीप आवाज करू लागलं.

त्या मुलीच्या ब्रेसियरच्या मेटल हुकमुळे तो आवाज येत होता. त्या मुलीला ब्रेसियर काढल्यानंतरच परीक्षा देता आली.

त्याच्या पुढच्या वर्षी केरळमध्येच पल्लकड जिल्ह्यात एका मुलीला अशाच एका धक्कादायक अनुभवाला सामोरं जावं लागलं. त्या मुलीला परीक्षा केंद्रावर ब्रेसियर काढण्यास सांगण्यात आलं. त्यानंतर परीक्षा नियंत्रक सातत्याने तिच्याकडे पाहत होता.

हेही वाचलंत का?

(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.

बीबीसी न्यूज मराठीच्या सगळ्या बातम्या तुम्ही Jio TV app वर पाहू शकता.

'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify, JioSaavn आणि Apple Podcasts इथे ऐकू शकता.)