ENG vs NED : अखेर इंग्लंड विजयी; पुण्यात बेन स्टोक्सचं शतक
फोटो स्रोत, Getty Images
गतविजेत्या इंग्लंडची यंदाच्या विश्वचषक स्पर्धेतील पराभवाची मालिका अखेर 8 नोव्हेंबरला पुण्यात तुटली.
गहुंजे इथे एमसीए स्टेडियममध्ये झालेल्या सामन्यात इंग्लंडनं नेदरलँड्सचा 160 धावांनी पराभव केला.
इंग्लंडनं दिलेल्या 340 रन्सच्या लक्ष्याचा पाठलाग करताना नेदरलँड्सचा संपूर्ण संघ 37.2 ओव्हर्समध्ये 179 धावांवर बाद झाला.
इंग्लंडचा या स्पर्धेतील हा दुसराच विजय आहे. तब्बल पाच सामने सलग पराभूत झाल्यानंतर त्यांनी हा विजय मिळवला आहे. याआधी 10 ऑक्टोबरला त्यांनी बांगलादेशला हरवलं होतं.
नेदरलँड्सवरील विजयामुळे इंग्लिश टीमच्या नेट रनरेटमध्येही वाढ झाली असून पाकिस्तानमध्ये 2025 साली होणाऱ्या चॅम्पियम्स ट्रॉफी स्पर्धेत प्रवेश मिळवण्याच्या इंग्लंडच्या आशा कायम आहेत. विश्वचषकाच्या गुणतालिकेत पहिल्या आठ क्रमांकाचे संघ चॅम्पियन्स ट्रॉफीसाठी पात्र ठरतील.
इंग्लंडचा शेवटचा सामना 11 नोव्हेंबरला पाकिस्तानविरुद्ध होणार असून चॅम्पियन्स ट्रॉफीसाठी पात्र ठरायचं तर त्यांना पाकिस्तानविरुद्धही जिंकावं लागेल.
दक्षिण आफ्रिका आणि बांगलादेश यांना हरवणाऱ्या डच आर्मीनं या सामन्यात निराशा केली. फलंदाजी आणि गोलंदाजीमध्ये इंग्लंडनं नेदरलँड्सवर वर्चस्व गाजवलं.
नेदरलँड्सकडून तेजा निदामानुरूनं सर्वाधिक नाबाद 41 धावा केल्या. तर, कर्णधार स्कॉट एडवर्ड्सनं 38 धावा केल्या. या दोघांनी सहाव्या विकेट्ससाठी 59 धावांची भागिदारी केली.
इंग्लंडकडून आदिल रशीद आणि मोईन अली यांनी प्रत्येकी 3 विकेट्स घेतल्या. डेव्हिड वायलीला 2 तर ख्रिस वोक्सला 1 विकेट मिळाली.
त्यापूर्वी बेन स्टोक्सच्या शतकाच्या जोरावर इंग्लंडनं 50 षटकांत 9 बाद 339 रन्सची मजल मारली होती.
स्टोक्सचं शतक
बेन स्टोक्सनं खरंतर वन डेतून निवृत्ती घेतली होती पण विश्वचषकासाठी त्यानं निवृत्तीचा निर्णय मागे घेतला होता. मात्र फिट नसल्यानं तो सुरूवातीचे काही सामने खेळू शकला नाही.
श्रीलंकेविरुद्ध 43 आणि ऑस्ट्रेलियाविरुद्ध 64 धावा करणाऱ्या स्टोक्सला मोठी खेळी करण्यात अपयश येत होतं. त्यानं नेदरलँड्सविरुद्ध ही कसर भरून काढली.
फोटो स्रोत, Getty Images
सुरूवातीला संघाची गरज म्हणून संथ खेळणाऱ्या स्टोक्सनं पाहता-पाहता गियर बदलला आणि शेवटच्या ओव्हर्समध्ये फटकेबाजी करत शतक झळकावलं.
बेन 84 चेंडूंमध्ये 6 चौकार आणि 6 षटकारांसह 108 धावा केल्या. त्यानं ख्रिस वोक्ससोबत सातव्या विकेटसाठी 129 धावांची भागिदारी केली. वोक्सनं 51 धावा काढल्या.
पण त्याआधी इंग्लंडची 1 बाद 133 वरुन 6 बाद 192 अशी घसरगुंडी उडाली होती.
फोटो स्रोत, Getty Images
इंग्लंडचा सलामीवीर दाविद मालननं 87 धावा करत चांगली सुरूवात केली होती. पण, जॉनी बेअरस्टो, ज्यो रूट, जोस बटलर, मोईन अली मोठी खेळी खेळण्यात अपयशी ठरले.
इंग्लंड पूर्ण 50 ओव्हर्स फलंदाजी करणारा का ? असा प्रश्न निर्माण झाला होता. त्यावेळी स्टोक्स आणि वोक्स यांच्या भागिदारीनं चित्र बदललं.
हेही नक्की वाचा
हा व्हीडिओ पाहिलात का?
या लेखात सोशल मीडियावरील वेबसाईट्सवरचा मजकुराचा समावेश आहे. कुठलाही मजकूर अपलोड करण्यापूर्वी आम्ही तुमची परवानगी विचारतो. कारण संबंधित वेबसाईट कुकीज तसंच अन्य तंत्रज्ञान वापरतं. तुम्ही स्वीकारण्यापूर्वी सोशल मीडिया वेबसाईट्सची कुकीज तसंच गोपनीयतेसंदर्भातील धोरण वाचू शकता. हा मजकूर पाहण्यासाठी 'स्वीकारा आणि पुढे सुरू ठेवा'.
YouTube पोस्ट समाप्त
(बीबीसी न्यूज मराठीचे सर्व अपडेट्स मिळवण्यासाठी आम्हाला YouTube, Facebook, Instagram आणि Twitter वर नक्की फॉलो करा.
'गोष्ट दुनियेची', 'सोपी गोष्ट' आणि '3 गोष्टी' हे मराठीतले बातम्यांचे पहिले पॉडकास्ट्स तुम्ही Gaana, Spotify आणि Apple Podcasts इथे ऐकू शकता.)
