ФБР Трамптын куралдуу тарапкерлеринин демонстрациясынан кооптонууда

Members of the National Guard stand next to a fence and barricades set up around the U.S. Capitol building in Washington

Сүрөттүн булагы, Reuters

Сүрөттүн түшүндүрмөсү, Вашингтондо коопсуздук чаралары күчөтүлдү

АКШнын коопсуздук боюнча расмийлери өлкөнүн булуң-бурчунда Трамптын куралдуу тарапкерлери демонстрацияларды уюштурууну көздөп турганын эскертүүдө. Нааразылык акциялар Жо Байден президент катары ант кармаганга чейин уланмакчы.

Федералдык иликтөө бюросу 50 штатта куралдуу топтор нааразылык акция уюштуруу үчүн биригип жатканы боюнча маалымат бар экенин эскертти. Ошол себептен коопсуздук чаралар күчөтүлмөкчү.

Буга чейин Өкүлдөр палатасындагы көпчүлүктү түзгөн демократтар резолюция кабыл алып, президентти мамлекет башкарууга жараксыз деп табууну сунуштаган. Добуш берүү шаршемби күнү болот. Бул ишке ашса, вице-президент анын милдетин аткарып, шайлоону утуп келген талапкерге бийликти өткөрүп берет.

Speaker of the House Nancy Pelosi

Сүрөттүн булагы, Getty Images

Сүрөттүн түшүндүрмөсү, Өкүлдөр палатасын спикери Пелоси Трамп улуттук коопсуздукка "коркунуч" жаратат деп билдирди

Жо Байден менен вице-президент кызматына дайындала турган Камала Харрис Капитолийде ант кармайт. 6-январда Трамптын миңдеген тарапкерлери дал ушул имаратты басып алышкан. Бирок коопсуздук кызматтар инаугурация учурунда башаламандыкка жол берилбейт деп белгиледи.

Трампты колдогон топтордун жана ашынган оңчулардын атайын баракчаларында демонстрацияга кошулууга чакырыктар айтылган. Ага ылайык, нааразылык акциялар 17-январда жана инаугурация күнү дагы уюштурулмакчы. ФБР топтордун бири жергиликтүү жана федералдык сот имараттарын "басып алууга" чакырганын билдирди. Ошондуктан 16-20-январда Вашингтондо коопсуздук чаралары күчөтүлөт.

Видеонун түшүндүрмөсү, АКШдагы башаламандык: “демократия мурда болуп көрбөгөн чабуулга кабылды”

Трамптын тарапкерлери Конгрессти басып алган окуяда беш киши каза тапты. Алардын бирин полиция атып өлтүргөн. Президент Трамп алгач тарапкерлерин Конгрессти көздөй жүрүшкө барууга чакырган. АКШ лидеринин кайрылуусунан кийин миңдегендер Капитолийди көздөй кирип барышкан. Полиция төрт сааттан кийин гана имараттан демонстранттарды чыгарган эле.

Республикачылар дагы Капитолийди басып алуу аша чапкандык болгонун белгилешип, Трамп администрациясынын айрым өкүлдөрү кызматтар өз ыктыяры менен кетишти. Бирок бир аптадан кийин бийликтен кете турган Трампты кызматтан алууга колдоо көрсөтпөйт деген пикир дагы бар.