Lee Ji Han so na mmadụ 154 nwụrụ n'ọdachi 'stampede' na South Korea

Otiegwu na onye ihe ejije a ma ama bụ Lee Ji Han so na mmadụ 154 nwụrụ dịka ndị mmadụ dagidere onwe ha n'emume 'Halloween" e mere na South Korea na mgbede Satode, ụbọchị 29 nke Ọktoba 2022.

Nsogbu dapụtara dịka ndị na-eto eto, ọkachasị ndị nọ n'agbata afọ 20 gara n' Itaowen, isi obodo South Korea, maka emume 'Halloween', nke mbụ ya a na-ewepụ mmachi ụdị ọgbakọ a n'ihi Covid-19, bụ ebe igwe mmadụ karịrị etu a tụrụ anya.

Ụfọdụ ndị nọ ebe ihe mere kwuru na ihe ruru mmadụ 100,000 pụtara maka Halloween n'ihi obi ụtọ ime oriri na nkwarị kemgbe afọ abụọ a machiri ụdị ọgbakọ ahụ n'ọha n'ihi nsogbu Covid-19.

Dịka mịnịstri na-ahụ maka agụmakwụkwọ na nke na-ahụ maka nchekwa mba ahụ si kwuo, ndị ọzọ nwụrụ gụnyere ndị mba ọzọ mmadụ 26, ụmụakwụkwọ isii, ndị nkuzi atọ na ndị agha mba South Korea atọ.

Ha gụnyere:

Lee Ji Han, 24, onye ihe ejije

Lee Ji Han so na ndị a zọgburu n'abalị Satode.

Nwa amadị a bụụrụ onye a ma ama dịka o sonyere n'asọmpi e ji ahọpụta onye nwere nka n'ịkpa obi ụtọ a kpọrọ "Produce 101".

Ndị na-anọchite Ji Han ndị wepụtara ozi gbasara nke a n' Instagram sị, "Ọ bụ eziokwu na Lee Ji anwụọla n'ihe mberede mere n'Itaewon."

"Ọnụọgụgụ ụmụnwaanyị nwụrụ n'ọdachi ahụ karịrị nke ụmụnwoke."

"Anyị na-enwebu olileanya ka ọ ghara ịbụ eziokwu mana ọ riri anyị ọnụ ịnụ ya bụ akụkọ.

"Ezinaụlọ ya nọ na nnukwu iru ụjụ, ya mere anyị ji akpachapụ anya. Ka o zuru ike na ndokwa."

Ndị ihe nwa amadị a na-amasị tụkwara arịrị maka ọnwụ ya.

Grace Rached, 23 , onye na-emepụta onyonyo

Gọọmentị mba Ọstrelia ekwuola n'ezie na nwa amaala ha bụ Grace Rached nke ga-agba afọ 24 n'ọnwa na-abịanụ so na ndị nwụrụ.

N'ozi ha wepụtara, ezinaụlọ ya kwuru sị, " Grace bụ "mmụọozi mara mma," na "onye na-eme ka eweta aṅụrị ebe ọ bụla ọ batara".

"Grace na-akpọ mmadụ mmadụ ma nwekwa obioma nye onye ọbụla o zutere." "O jighị ụmụnne ya nwaanyị abụọ egwu egwu, ọ bụ nwa onye na-egosi agwa kwesịrị nṅomi."

Ndị ya na ya na-arụkọ nakwa na ndị enyi ya ezipụtala ozi na-ekwu maka ndụ ya."

Steve Blesi ,20, nwata akwụkwọ

Nwaokorobịa gbara afọ 20 a kpọrọ Steve Blesi, onye Amerịka, na nna ya soro gaa emume ahụ mana nwata ahụ ejighị isi ya pụta.

N'ozi nna ya zipụtara na Twitter tupu a mata n'ezie na nwata ahụ nwụrụ anwụ, o kwuru na nwa ya nọ nso ebe a zọgidere ndị mmadụ ma rịọ enyemaka n'ịchọta ya.

Anne Gieske, 20 , nwata akwụkwọ

Anne Gieske gbara afọ 20, bụ nwa akwụkwọ mahadum 'University of Kentucky mere njem gaa Seoul dị na South Korea.

Nwaada ahụ na-agụ nọọsụ hiwere ọbaozi maka njem akwụkwọ ọ gara na South Korea ma zipụta ozi maka ime afọ 20 n'akara Instagram ya.

Nna ya bụ Dan kọwara Anne dịka "nwa nke onye ọbụla hụrụ n'anya."

Ọ gwara ụlọntaakụkọ NBC News na ihe mere ha gbarriri ha obi.

Ndị ma Anne kọwara ya dịka onye obi ọma.