Etu mụ na Jimmy 'Nwachukwu' si zute onwe anyị ma bụrụ oke enyi – Mc A1

Nwamadị bụ Nwafor Emmanuel Nkemakolam 'Mc A1' a ma ama n'akpaọchị akọwaala etu o siri zute nnukwu enyi ya nwoke bụ Eugene e ji 'Jimmy Nocap' maara.

Na mkparịtaụka Mc A1, Jimmy na BBC Igbo nwere, ha kọwaara etu njem ha n'ịkpaọchị siri malite ma ruo ogogo ha nọ ugbua.

Mc A1 kwuru na o zutere Jimmy mgbe ọ gara ise ihe onyonyo n'ọgbọ ebe a kpọro 'Clappers junction' dị na Lọndọn, oge ọ na-achọ onyeọcha ga na-eso ya eme ihe onyonyo ịkpaọchị.

O kwuru na mgbe ọ gwara Jimmy ka o see ya ihe onyonyo, na ọ maghị na Jimmy n'onwe ya bịakwara ebe ahụ ise ihe onyonyo, na ọ bụ etu ahụ ka ha siri sekọọ ihe onyonyo.

Mc A1 kwuru na ha gara n'ihu mee ihe onyonyo n'ụbọchị ọzọ ma sizie ebe ahụ na-emekọta ihe ọnụ ma bụrụzie enyi ugbua.

N'aka nke ọzọ, Jimmy kwuru na ezi aha ya bụ Eugene, na ọ bụ nwafọ mba Rọshịa mana o biela na mba Briten ihe ruru afọ iri abụọ (20yrs).

O kwuru na ọ dịla mbụ na-eme ihe onyonyo tupu o zute Mc A1. O kwuru na ọ nabatara Mc A1 maka na ọ bụ ezigbo mmadụ, ma bụrụkwa ezi enyi ya nke mere o ji soro ya lọta na Naịjirịa ịbịa mee ihe ngosi.

O kwuru na obi dị ya ụtọ ịbịa Naịjirịa, na ọ bụrụ obodo dị mma nwere ndị mmadụ dị ukwuu.

Jimmy gara n'ihu kwuo na onwebeghi onye ọbụla gwara ya okwu ọjọọ banyere ihe onyonyo ya na Mc A1 na-eme, kama na ọ bụ naanị okwu dị mma na-akpalite mmụọ ka ọ na-enwete.

Ọ gakwara n'ihu kwuo na nri ndị Naịjirịa dịkwa mma mana o nwere ihe ọ gwakọtara ọnụ rie nke sara ya afọ oge ọ bịara na Naịjirịa.

Kirie ihe ha kwuru n'uju;