Ihe mere m ji azọ ọkwa n'ụlọomeiwu Naịjirịa n'aha Labour Pati - Hilda Dokubo

Nwada na-eme ihe nkiri na Nollywood a ma ama bụ Hilda Dokubo ekwuola ihe mere o ji azọ ọkwa ịnọchịte anya ndị Asalga/Akulga, Rivers Steeti n’ụlọomeiwu nta nke Naịjirịa.

Na mkparịtaụka ya na BBC Igbo mere, ọ sị na ọ chọrọ ịnọchi anya ndị obodo ya ọfụma iji mee ka oke ruuru ha rute ya aka.

Ọ sị na ndị obodo ya enweghi ọtụtụ ihe dịka ụlọọrụ, ụzọ dị mma nakwa ihe ndị ọzọ na-agbanyeghi na gọomentị na-egwupụta mmanụ agbidi n’obodo ha.

Hilda bụ onye ji ọkọlọtọ Labour Pati azọ ọkwa a, sị na ọrụ ikwuchitere ndị mmadụ ọnụ bụ ihe ọ dị mbụ arụbu mana ugbua ọ chọrọ ka ọ gbatịkwuo ngalaba ya ka ọtụtụ ndị mmadụ keta oke n’ọrụ ya.

O kwuru na ihe mere o jiri họrọ Labour Pati bụ maka Peter Obi ma tinyekwara na ọ bụ pati nwere ezi ntọala metụtara ndị ọrụ.

Hilda gara n’ihu kwuo na-agbanyeghi na ọ bụ nwaanyị na ọ gaghị egbochi ya ịzọ ọkwa a ma nwete mmeri ịrụrụ ndị obodo ya ọrụ.

“Maka ndị na-ekwu na ọchịchị Naịjirịa abụghị maka ịgba nkiri, ha amaghị na ọ bụ ndị na-eme ihe nkiri maara ihe banyere ọnọdụ ndị mmadụ nakwa ihe a ga-eme ka obi dị ha mma.”

O kwuru na ndị niile nọ n’ọchịchị ugbua nwere ngalaba ha nọbu tupu ha abanye n’ọchịchị>

“Onye ọbụla nọ n’ọchịchi nwere ebe o si bịa ma banye n’ọchịchị, ihe dị mkpa bụ ị maara ihe ị ga-arụ ma ịbanye n’ọchịchị.”

Kirie ihe o kwuru n’uju;

Onye bụ Hilda Dokubo?