Ndị ojiegbe gbara m egbe maka m na-azọ Gọvanọ Anambra Steeti - Jude Ezenwafor ji ọkọlọtọ PDP azọ ọkwa
- Onye dere ya, Adline Okere
- Ndị mere akụkọ a, Onyenchịkọta ndị ntaakụkọ (Editor)
- Onye dere ya, Ebere Ekeopara
- Ndị mere akụkọ a, Onyentaakụkọ (Reporter)
- Ebeg o si,
- Onye dere ya, Donald Wogu
- Ndị mere akụkọ a, Onye ntaakụkọ na-ese onyoonyo (Video Journalist)
Kemgbe ndị omekome wakporo Maazị Jude Ezenwafor, a hụbeghị ya n'ihu igwe onyoonyo.
Kemgbe ahụ, ọ na-anata ọgwụgwọ maka mmerụ ahụ mgbọ egbe tụrụ ya merụrụ ya.
O ji obi ya niile kwụrụ chim na ọ ga-azọ ọkwa Gọvanọ Anambra steeti.
Onye bụ Jude Ezenwafor?
Jude Ezenwafor bụ onye na-azọ ọkwa Gọvanọ Anambra steeti.
O si na Nnobi dị n'okpuru ọchịchị Idemili Saụt, Anambra steeti.
Ọ bụ onye ji ego achụ ego na-ere ụlọ.
O bi n'Abuja, ọ lụọla nwunye ma nwe ezinaụlọ nke ya.
O kwere nkwa inweta ezi nchekwa ma wulite ezi ọnọdụ agụmakwụkwọ ma o merie ntuliaka ọkwa Gọvanọ a ga-eme na Nọvemba 8, 2025 n'Anambra Steeti.
Lee edemede mkparịtaụka ya na BBC Igbo nwere.
"Mgbọ egbe ka ndị omekome ji saa m ahụ", ka Jude Ezenwafor kwuru
Ọ gara n'ihu kwuo "Amaghị m ebe ha si, mana ama m na ọ bụ maka ọchịchị m na-azọ.
Amaghị m onye zitere ha mana ndị uweojii na ndị nchekwa na-agba mbọ ịchọpụta ndị ha bụ.
Abụ m onye Chukwu chọrọ iji napụta Anambra na ngalaba nchekwa, agumaakwụkwọ na mmepe ime obodo.
O nwere obodo ndị na-enweghị ọkụ latrik kemgbe.
O nwere obodo ndị na-enweghị ụlọakwụkwọ maọbụ na ụlọakwụkwọ ha na-ehi mmiri maọbụ na ha na-anọ n'ukwu osisi akụziri ụmụakwụkwọ ihe.
Ewepụtara m onwe m ka m nweeike dugaa Anambra n'ala e kwere ha na nkwa. Anambra ekwesịla inwe ọdọụgbọmmiri.
Ọ ga-eso n'ihe mbụ onyeisiala ga-emere m oge mbụ m ga-ezute ya dịka gọvanọ.
Ọ ga-abụ arịrịọ nke mbụ maọbụ nke abụọ maọbụ nke atọ m ga-arịọ ya ka o meere m.
Arụbuola m ọrụ dịka nnukwu onye enyemaka gọvanọ Anambra steeti n'ihe gbasara nchekwa obodo.
A sị na ọnọdụ enweghị nchekwa ọbụla gafere otu izuụka, a mara na aka gọọmenti dị ya."
Ọ gara n'ihu kọwa na, "Ọnọdụ enweghị nchekwa Anambra Steeti agafeela otu izuụka, gafee otu afọ, maka na a sị arụ gbaa afọ ọ bụrụzie omenala."
"Mana ribe okwu m ama, n'ime ọnwa abụọ m ga-abanye n'ọchịchị n'Anambra steeti, o nweghị ebe a na-abanye abanye nke mụ agaghị abanye."
Achụọla m nta vootu n'Isseke, gafee ebe ha anaghị aga. Ma Ọkịja, ma Lilu, anyị ga-abanye ma weghachi udo ebe ahụ.
Ebe a ga-eme udo, e mee udo. Ebe a ga-enye mgbaghara, e nye mgbaghara. Ebe a ga-akwa mgbọ, a kwaa mgbọ, maka na ndị be anyị ga-ebu ụzọ kwete na anyị ga-adị mma.
Gbasara ntuliaka na-abịa o kwuru, "Ana m akwalite mmadụ 100 ga-akpọta mmadụ iri ga-atụnyere m vootu na wọọdụ niile, nke a pụtara na m ga-enweta vootu 1,100 na wọọdụ niile.
Anambra steeti enwetabeghị vootu ruru 200,000 n'oge ntụliaka, mana aga m enweta vootu 326,000.
Ndị a m na-akwalite bụ ndị m kpọrọ 'Anambra Millionaires Club'. Anyị bụ ndị Igbo... o nwee onye chọrọ ịmụ ọrụaka, anyị ga-akụziri ya.
Ma ndị ga-amụ ọrụaka, ma ndị ga-amụ kọmputa, ma ndị ga-amụ AI, robotics na ihe ndị ọzọ dị etu ahụ, ma ndị ga-amụ ka e si edozi isi anyị ga-akụziri ha ya.
Onye ọbụla ga-edebanye aha ya nakwa ihe ọ chọrọ ịmụ. Etu a ka anyị ga-esi zụọ ma ndị ọkwanka ma ndị ọkwọụgbọala nakwa ndị ọkwọụgbọelu.
Achọrọ m ịhụ na ọkpuru ọchịchị niile zụpụtara opekatampe ndị ọkwọụgbọelu ise maka na oge na-adịghị anya, a ga-enwe ụgbọala ndị na-efe efe.
Mụ onwe m bụ Jude Ezenwafor na-arịọ ụmụnne m ndị Anambra Steeti ka ha pụta n'ìgwè n'ụbọchị ntuliaka bụ 8 Nọvemba, 2025, ka ha bịa tụnyere pati m bụ mbụlarị na-echekwa pati ndị ọzọ, bụ PDP.
Ha bịa tụnyere Jude Ezenwafor na PDP ka ìhè bata n'Anambra steeti, ka Anambra chawapụ.
