Suya Death Umahia: Etu di na nwunye ụmụ anọ ha nwụrụ n'otu ụbọchị si ebi ndụ ha ugbua

Chibuzor Kenneth Ikwunze na nwunye ya ka na-akwa akwa maka ọnwụ ụmụ ha anọ nwụrụ n'otu ụbochị n'Abia steeti.

O kwuru na ọ kpọgara ụmụ ya anọ na bee ọyị ya nwoke na-aza Sunny n'Umuahia ka ha na ndị bee ya nọrịa n'ọnwa Ọgọstụ.

Ọ kpọpụtara aha ụmụ ya anọ dịka Kelechi(afọ iri na abụọ), Chimdi(afọ iri), ọlụọmachi(afọ asatọ) na Kingsley(afọ atọ).

"N'ụbọchị Ọgọstụ 25, 2021, ka a kpọrọ m n'ekwenti si na Sunny anwụọla, e mechara kpọm si na ụmụ m niile anwụọla."

O kwuru na mgbe ọ gwara nwunye ya na ụmụ ya anọ anwụọla, ọ dara n'ụzọ.

Ikwunze kwuru na ụmụ abụọ Sunny nwụkwara n'otu ụbọchị ahụ nke mere ya ozu asaa tọgbọọ na bee Sunny mgbe ọ garuru ebe ihe mere.

Ihe a gwara m gburu ụmụ m ụbọchị ọdachị a merenụ

Ikwunze kwuru na nwunye Sunny nọkwa n'ọnọdụ amaghị onwe ya n'ụlọọgwụ.

Mgbe ọ nwetere onwe ya, o kwuru na ụmụaka anọ ahụ nakwa di ya na ụmụ abụọ ha bu ụzọ rie Suya na juice ma rikwa nri ndị ọzọ nke mere na ọ maghị nri nke kapatara ọnwụ ha.

O kelere Chinedu Orji bụ onyeisi ụlọomeiwu Abia steeti biara ya mgbarụ ka elichara ụmụ ha nwụrụnụ.

O kwukwara na Orji nyere ya ụgbọala, nye ya ego ha ga-eji kwapụ n'ụlọ a ha bi ugbua ma nye ya ọrụ.

O nwere ka ha si mee nchọpụta ebe e si gote ya bụ Suya?

Chibuzor Ikwunze kwuru na ọ hụrụ ka ọyị ya nwoke na-egote Suya ahụ ya na ụmụ ya mechara taa.

"Anyị ka na-eche ka nyocha "autopsy " nke gọọmenti pụta ka nayị mara maọbụ Suya maọbụ ihe ọzọ gburu ụmụ anyị nakwa ọyị nwoke na ụmụ ya."