Unknown Gunmen Attack in Anambra: Etu ndị oji egbe si gbagbuo Igwe Edozieuno n'okporoụzọ Anambra Steeti

Ndị oji egbe gbagburu Igwe Alex Edozieuno onye bụbu Igwe ndị obodo Mkpunando Aguleri n'Anambra Steeti.

Ọnụ na-ekwuru ndị uweojii n'Anambra Steetị bụ Ikenga Tochukwu sị na nke a mere n'elekere iri nke ụtụtụ Fraịde 10 Septemba, afọ 2021.

Ọ sịkwara na o mere n'obodo Ikem Ivite dị n'akụkụ akwammiri Ezu dị n'Otuocha n'okpuruọchịchị Anambra East.

Ọ kọwara nke a dịka "arụ karịrị arụ mmadu mere ibe ya"

Ikenga sị na e gburu Igwe Edozieuno dị afọ iri isii na abụọ na onye ọkwọ ụgbọala ya.

Ọ sị na ihe ha wetere n'ebe ihe a mere gụnyere ụgbọala 'ọkwụọtọ ekele Eze' bụ nke Igwe ahụ.

Ọ gara n'ihu sị na nyocha tara ọchịchị na-aga n'ihu ịchọpụta ndị kpara arụ a ma taa ha ahụhụ ruuru ha.

Otu onye obodo ahụ na-achọghị ka a kpọọ aha ya sị na ọ maghi kpọkwem ma ọ bụ mwakpo e chere maka Igwe n'ihi na ndị oji egbe ahụ zukwara ọtụtụ ụgbọala ohi n'okporoụzọ ahụ.

N'otu aka ahụ gọvanọ Willie Obiano nke Anambra Steeti akatọọla ogbugbu e gburu Igwe Edozieuno ma nye ndị uweojii iwu ka e sie imi n'ala chọpụta ndị kpara arụ a.

Nke a dị n'ozi kọmishọna mgbasaozi bụ Don Adinuba wepụtara bụ ebe ọ kasikwara ezinaụlọ Igwe a obi.

Cheta n'afọ 2020 na gọvanọ Willie Obiano nke Anambra Steeti na-apụrụ Igwe a ọkwa ma were Igwe Hon. Johnson Onyeaka Mbanefo dochie ya.

O so n'otu n'ime Igwe iri na atọ gọvanọ Obiano kwụsịrị ọrụ mana ọ kpọghachịrị mmadụ iri n'ime ha ma chụpụ mmadụ atọ bụ nke Igwe Alex so na ha.