Mkpọnala - Egbe ike na-emete mmụọ na mmadụ n'ụra

Aha onyonyo, Igbo Tradition: Mkpọnala - Egbe ike na-emete mmụọ na mmadụ n'ụra

Emume ọdịnala ọbụla e mere n'ala Igbo ma agbaghị mkpọnala, mara na ọ bụ emume ụmụaka.

Mkpọnala bụ ụda e ji akọrọ mmụọ na mmadụ na nnukwu ihe na-eme n'obodo.

Akụkụ Igbo ụfọdụ na-akpọ ya mkpọnanị, ndị ọzọ na-akpọ ya ntụnala, ebe ndị ọzọ na-akpọkwa ya egbenduru.

Oge ọbụla ya bụ egbe dara, ụmụ nnụnụ eju ọhịa, ụmụ anụmanụ adaa jụụ, obodo niile edere jijiji.

Uru mkpọnala bara n'omenala Igbo

Akirika Jingo
Nkọwa foto, Akirika Jingo bụ onye e ji ịgba mkpọnala mara n'Ideato, Imo steeti

Akịrịka Jingo, bụ onye e ji ịgba mkpọnala mara na mpaghara Ideato North n'Imo steeti, kọwaara BBC Igbo na ịgba mkpọnala bụ ụzọ e ji ekele Chukwu maka ihe mere n'obodo.

Jingo kọwakwara na ọ bụghị naanị n'ọnwụ mmadụ maọbụ ihe iru uju ka a na-agba mkpọnala, a na-agba ya ma nnukwu ihe ọbụla mee.

Lee uru mkpọnala bara dịka Jingo si kọwaa:

  • E ji ya eto Chukwu ma ihe ọma mee
  • E ji mkpọnala asị onye nwụrụ anwụ laa nke ọma
  • Nnukwu onye ọbịa bịa n'obodo, ọ bụ ụda mkpọnala ka a ga-eji anabata ya
  • A na-eji mkpọnala agbapụ ihe ọjọọ ma gbabata ihe ọma.
  • Na nnukwu mmemme, dịka iri ji ọhụrụ, a na-agbakwa mkpọnala iji gosi na ọṅụ juru ndị obodo obi
  • Ejikwa mkpọnala agbasa ozi. Mkpọnala daa, ndị mmadụ ga-ajụwa ihe na-emenu, oge ahụ ozi ga-eru ha ntị maka ihe ya bụ mkpọnala jiri daa.

Mana Jingo kwukwara na ụfọdụ na-agbakwa mkpọnala iji ya mee ihe ọjọọ.

Kama ọ bụghị ha ga-eji aka ha agba ya n'ihi na ha na-asọ nsị egbe e ji agba mkpọnala asọ.

Ihe e ji agba mkpọnala

Ọ bụ nsị egbe bụ akụrụngwa kacha mkpa e ji agba mkpọnala.

Jingo kọwara na ọ bụ kemịkalụ dị icheiche ka a gwakọrọ ọnụ iji rụpụta nsị egbe.

Nke ọzọ bụ egbe mkpọnala na onwe ya, nke bụ igwe ndị ọkpụ ụzụ na-akpụ.

A ga-ewere nsị egbe sụjuo n'ime igwe ahụ ma were obere aja wụchie elu ya.

Jingo kọwara na ọ bụrụ na awụchighi ya aja, ọ gaghị agba.

Ọ bụ onye ọbụla nwere ike ịgba mkpọnala?

Jingo kọwara na ọ bụ n'aka nna ya ka ya si mụta ịgba mkpọnala.

Mana o nweela ndị bịara ka ya mụgosi ha etu e si agba ya.

Ọ gara n'ihu dọọ aka na ntị na onye aka ya adịghị ọcha anaghị agba mkpọnala.

Jingo kwuru na "nsị egbe na-akpa nnukwu ike, ọ naghị emere onye ọjọọ ebere."

Akụkọ ndị ọzọ ga-amasị gị: