Otiegwu, ọgbaegwu, onye oziọma, onye ejije... Lee ọkpụrụkpụ ihe maka ndụ Chinedu Nwadike

Ndị Igbo na-ekwu okwu sị na ọnwụ na-eme ka obodo jụọ oyi, n'ezie ọnwụ Chinedu Nwadike emeela ka obodo jụọ oyi.

Chinedu Nwadike bụ onye ọtụtụ mmadụ ma dịka onye na-eti egwu ụka, nakwa onye na-eme ejije Nollywood.

N'ọdị nso a ka onyonyo ya gbasara na soshal midia ebe ọ na-yọ ndị mmadụ enyemaka ego iji nweta ọgwụgwọ maka ọrịa akịrị (kidney failure).

Mana n'ụbọchị Sọnde, abalị iri abụọ na abụọ nke ọnwa Maachị ka akụkọ gbasara ọnwụ ya pụtara.

Ihe i kwesịrị ịma maka Chinedu Nwadike

  • A mụrụ Chinedu Nwadike n'afọ 1983, nke pụtara na ọ gbara afọ iri atọ na itoolu tupu ọ laa mmụọ.
  • Ọ lụrụ nwaanyị, mụọ ụmụ anọ, mana otu nwa ya bụ Ryan Obiajuru Chinedu Nwadike nwụrụ n'afọ 2020
  • Chinedu Nwadike malitere ọrụ ịkpa ndị mmadụ obiọma (entertainment) dịka onye na-agba egwu
  • Ọ gbara egwu n'ihe onyonyo ndị oti egwu dị icheiche dịka Gozie Okeke, Chineyere Udoma, na ndị ọzọ
  • O mechara malite iti egwu nke ya. Egwu ya kacha wuo ewu bụ nke ọ kpọrọ "Ọkụ gbajie aka ji ngọzị m"
  • Chinedu Nwadike sikwa n'iti egwu banye ime ejije Nollywood. N'afọ 2018, o mere ihe ejije ebe o kere ekike dịka nwaanyị, nke mere ọtụtụ ndị mmadụ ji kọọ ya ọnụ.
  • Ọ rụkwara ọrụ dịka onye oti mkpu ndị na-eme ndọrọndọrọ ọchịchị; ndị ọ kwadoro gụnyere Rochas Okorocha na Ifeanyi Ubah
  • Chinedu bụkwa onye oziọma n'okpukerechi Kraịst, nke bekee na-akpọ 'Evangelist'

Ọrịa Chinedu Nwadike

Ọ bụ n'ọnwa Febụwarịa afọ 2022 ka akụkọ gbasara ọrịa Chinedu Nwadike malitere ịgbasa na soshal midia.

Onyonyo ya pụtara ebe ọ na-ekwu na ya nwere ọrịa metụtara akịrị ya nke bekee na-akpọ 'kidney failure'.

O kwuru na ndị dọkịta sị na a ga-etinyere ya akịrị ọhụrụ nke a na-akpọ 'kidney transplant' na bekee.

N'oge ahụ, BBC Igbo kpọrọ ya n'ekwentị, o wee kwuo na ya nọ n'ụlọọgwụ 'National Hospital' n'Abuja.

Skip Akachasị Gụọ and continue reading
Akachasị Gụọ

End of Akachasị Gụọ

Ka izuụka olemole gachara, Chinedu Nwadike mekwara onyonyo ọzọ ebe ọ nọrọ kelee Andy Ubah, bụ onye omeiwu Naịjirịa, maka ịgbatara ya ọsọ enyemaka.

O kwuru na ya enwerela onwe ya n'ọrịa akịrị, mana na-agbakekwa obere obere.

Mana ka obere oge gachara, Chinedu Nwadike kwukwara okwu n'onyonyo wee sị na a chọpụtala na o nwere ọrịa kansa ọbara nke bekee kpọrọ 'leukemia'.

Ọ sị na ya na-adị nkwadebe ịga mba India ebe a ga-anọ gwọọ ya, mana nke a enweghịzi isi.

'Ọ bụ eziokwu, Chinedu Nwadike anwụọla' - Anyi Don

Onye oti egwu Ifeanyi Donatus, onye eji Anyị Don onye Ichaka mara, ekwuola na ọ bụ eziokwu na Chinedu Nwadike anwụola.

Ọ bụ n'ehihe ụbọchị Sọnde, Maachị 28, ka kepukepu bidoro fegharịwa na otiegwu ahụ anwụọla.

Na mkparịtaụka ya na BBC Igbo nwere n'ekwentị, Anyi Don kwuru na ọ bụ eziokwu na Nwadike alaala mmụọ.

Anyi Don kwuru na akwụkwọ Chinedu Nwadike ga-eji gaa mba India ịnata ọgwụgwọ pụtara n'ụbọchị Satọdee, mana nwa amadi ahụ nwụrụ n'ụbọchị Sọnde.

Akụko na-ekwu na ọ bụ ọrịa kansa ọbara gburu ya.

Nwadike nọbu n'ute ọrịa, nke mere ka ndị mmadụ gbatara ya ọsọ enyemaka.