INEC: Ofisoshin hukumar zaben Najeriya da suka kone daga 2019 zuwa 2021

Hukumar Zabe Mai Zaman Kanta ta Kasa a Najeriya ta yi gargadi cewa yawan kona ofisoshinta da ake yi a baya-bayan nan na barazana ga shirin zabukan shekarar 2023.

Shugaban hukumar Mahmood Yakubu ne ya bayyana hakan a ranar Laraba, yana mai cewa ya yi amannar yanzu kam saka wutar ake yi ba tsautsayi ne ba.

Ana ci gaba da samun tashin gobara a ofisoshin INEC a fadin kasar, musamman a kudanci, inda zuwa yanzu aka kona 22 tun daga shekarar 2019.

Lamari na baya-bayan nan da ya faru shi ne na konewar ofisoshin INEC biyu a jihar Ebonyi ranar Talata da daddare.

An yi asarar kayayyakin aiki da dukiyoyi kamar motoci da sauransu a kusan dukkan hare-haren. Kazalika ya jawo tsaiko ga ci gaba da bayar da rijistar zabe da ake yi a wasu wuraren

Ga dai jerin ofisoshin da aka kona da jihohinsu:

Ko a ranar 18 ga watan Mayun 2021 ma sai da matsalar tsaro ta sa hukumar INEC din kiran wani taron gaggawa na jami'anta da ke jihohi, da na wani kwamitin musamman kan harkokin tsaro, bayan hare-haren da aka kai wa wasu ofisoshinta a yankin kudu maso gabas.

Daraktan wayar da kan jama'a na hukumar ta INEC Mista Nick Dazeng, ya shaida wa BBC cewa irin wannan hari shi ne na uku da aka kai wa hukumar, abin da ke janyo barazana ga zabukan 2023.

"Mun shaida wa jami'an tsaro dukkanin abubuwan da ke faruwa game da hare-haren da ake kai wa ofisoshinmu domin su gudanar da bincike don gano ko su wane ne suke yin wannan ta'asa, sannan ranar Larabar nan za mu gana da shugabannin hukumar zabe don tattauna batun" in ji Dazeng.

Ya kara da cewa kafin karshen mako hukumar za ta kara zaunawa da kwamitin tsaro na Najeriya domin lalubo mafita game da al'amarin.