Muhimman abubuwan da za su faru a shekarar 2020
Asalin hoton, INTI OCON
- Marubuci, Daga Nabeela Mukhtar Uba
- Sanya sunan wanda ya rubuta labari, Broadcast Journalist
Yayin da aka yi bankwana da shekarar 2019, BBC ta yi nazari kan wasu muhimman abubuwan da za su faru a cikin shekarar 2020.
Daga cikin abubuwan akwai:
1. Kaddamar da kudin bai daya na kasashen yammacin Afirka
Asalin hoton, AFP Contributor
Kasashen da suka amince su fara amfani da sabon kudin a 2020 sun hada da Benin da Burkina Faso da Guinea-Bissau da Code d'Ivoire da Senegal da Togo da Mali da kuma Nijar.
Ghana ma ta bayyana kudirinta na shiga wannan tsari.
Yawanci kasashen sun yi amannar cewar rungumar tsarin na amfani da kudin bai-daya zai taimaka wajen saukaka harkokin cinikayya da samar da tsayayyen tsarin kasuwanci a tsakaninsu.
2. Najeriya za ta cika shekara 60 da samun 'yancin kai
Asalin hoton, KOLA SULAIMON
Ranar 1 ga watan Oktobar 2020 Najeriya ke cika shekara 60 da samun 'yancin kai daga Turawan mulkin mallakar Burtaniya.
A shekarun baya, an sha soke bikin murnar samun 'yancin kai a Najeriyar tare da shirya kwarya-kwaryan taro don murnar ranar saboda matsalolin tsaro. Yayin bikin, shugaban kasa na yi wa 'yan kasar jawabi kan nasarorin da kasar ta samu da kuma irin abubuwan ci gaban da gwamnati za ta samar.
3. Zaben shugaban kasa ajamhuriyar Nijar
Asalin hoton, ISSOUF SANOGO
A watan Disamba za a gudanar da zaben shugaban kasa a Jamhuriyar Nijar.
Za a gudanar da zaben ne bayan Shugaba mai ci, Mouhammadou Issofou ya kammala wa'adin mulkinsa.
A yanzu, jam'iyya mai mulki a kasar, PNDS Tarayya ta tsayar da Bazoum Muhammad a matsayin wanda zai yi ma ta takara.
4. Zaben shugaban kasa a Ghana
Asalin hoton, Anadolu Agency
Za a gudanar da zaben shugaban kasar Ghana a karshen shekarar 2020.
A watan Fabrairun 2019, jam'iyyar hamayya ta NDC ta sanar da tsohon shugaban kasar John Mahama a matsayin wanda zai yi mata takara.
A watan Disambar 2019 kuma shugaba mai ci Nana Akufo-Addo ya sanar cewa zai sake tsayawa takara.
Mutanen biyu dai sun taba fafatawa a 2012 inda Mahama ya yi nasara sannan kuma a 2016, Akufo-Addo ya lashe zabe.
5. Zaben shugaban kasa a Amurka
Asalin hoton, Scott Olson
Za a gudanar da zaben shugaban kasa a Amurka ranar Talata 3 ga watan Nuwambar 2020.
Zaben na Amurka zai ja hankali musamman yadda ake ganin batun tsige Shugaba Donald Trump zai yi tasiri a zaben. Majalisar wakilan Amurka ta tsige Trump bayan da ta same shi da laifin yi wa majalisar karen tsaye da wuce hurumin ofishinsa.
Wasu daga cikin manyan 'yan takarar da za su fafata a zaben karkashin jam'iyyar Republican akwai Trump da Joe Walsh yayin da Joe Biden da Michael Bloomberg da Bernie Sanders za su tsaya takara karkashin inuwar jam'iyyar Democrat.
6. Zaben 'yan majalisar dokoki a Masar
Asalin hoton, ODD ANDERSEN
An tsara gudanar da zaben a watan Nuwambar 2020 domin tsayar da wakilai da sanatoci.
A baya an tsara gudanar da zaben a watan Afrilu ko Mayun 2020.
Sai dai Shugaba Abdel Fattah el Sisis ya umarci majalisar dokokin kasar ta dakatar da ayyukanta a ranar 1 ga watan Oktobar 2019 tare da bai wa hukumar kula da tsaron kasar ragamar fitar da jadawalin 'yan takara.
Ya yi haka ne saboda rashin gamsuwa da tsarin da ofishin da ke kula da bayanan sirri ya bi wajen zabar 'yan takara a zaben 'yan majalisar da ya gabata.
7. Bikin kama kifi na Argungu
Asalin hoton, PIUS UTOMI EKPEI
Ana gudanar da bikin duk bayan shekara hudu a jihar Kebbi da ke arewa maso yammacin Najeriya.
An fara bikin a shekarar 1934. Ana gudanar da bikin a matsayin wata alama ta kawo karshen rashin jituwa tsakanin masarautar Kebbi da Daular Usmaniyya.
An dakatar da bikin a baya sakamakon matsalolin tsaro da aka yi ta fama da su.
8. Janye sojoji daga wasu sassan Najeriya
Asalin hoton, AUDU MARTE
Gwamnatin Najeriya za ta dauki matakin janye sojojin ne domin bai wa 'yan sanda da sauran jami'an tsaron da ba sojoji ba damar tsare wasu yankunan kasar.
Mai magana da yawun Shugaba Buhari, Malam Garba Shehu ya ce "matakin wata manuniya ce kan yadda ake samun ci gaba a fannin tsaro a wasu sassan kasar."
Sai dai bai bayyana yankunan da janye sojojin zai shafa ba tukuna, amma ya ce hakan ba zai shafi yankin arewa maso gabashin kasar ba.
9. Ficewar Burtaniya daga Tarayyar Turai
Asalin hoton, Getty Images
A ranar Juma'a 31 ga watan Janairu ne ake sa ran Burtaniya za ta fice daga Tarayyar Turai bayan 'yan Majalisar Dokokin kasar sun amince da daftarin Firai Minista Boris Johnson na ficewar kasar.
10. Gasar cin kofin nahiyar Turai EURO 2020
Asalin hoton, Getty Images
Za a gudanar da gasar a birane 12 a kasashen Turai daga 12 ga watan Yuni zuwa 12 ga watan Yulin 2020.
Portugal ce mai rike da kambun gasar bayan da kasar ta lashe gasar a shekarar 2016.
Za kuma a yi amfani da na'urar VAR a karon farko a gasar.
11. Gasar motsa jiki ta Olympics da za a gudanar a Tokyo
Asalin hoton, BEHROUZ MEHRI
Gasar ta Olympics za ta soma daga 24 ga watan Yuli zuwa 9 ga watan Agustan 2020 a Tokyo da ke Japan.
Kwamitin tsara gasar Olympics ne ya zabi Tokyo a matsayin mai masaukin baki a wani taronsa karo na 125 da aka gudanar a Buenos Aires da ke Argentina.
Wannan shi ne karo na uku da za a gudanar da irin gasar a yankin gabashin Asiya.
