A Tribe Called Judah: Fim ɗin da ya fi kawo kuɗi a tarihin Najeriya

Wani fim ɗin masana'antar Nollywood ta kudancin Najeriya, ya kafa sabon tarihin zama fim ɗin Najeriya na farko da ya kawo kuɗi har naira biliyan ɗaya a sinimun cikin gida.

Fim ɗin mai taken 'A Tribe Called Judah' wanda gwari-gwari za a iya fassara shi da 'Wata Al'umma Da ake Kira Judah', ya cimma wannan abin tarihi ne a cikin mako uku kawai.

Wadda ta shirya fim ɗin - jarumar fina-finai, darakta a Najeriya kuma furodusa, Funke Akindele - ta gode wa magoya bayanta saboda wannan abin tarihi.

"Na gode Allah! Na gode muku 'yan Najeriya! Na gode muku mutanen Ghana!" ta wallafa a shafinta na Instagram, wanda ya janyo taya murna daga dubban mutane.

Bajintar ta sanya Funke Akindele 'yar shekara 46, zama daraktar da ta fi samun kuɗi a masana'antar Nollywood.

Fim ɗin ya kuma fito da taurari har da na arewacin Najeriya kamar Uzee Usman.

'A Tribe Called Judah' ya kama hanyar dakushe fitattun fina-finan Hollywood, ta fuskar yawan kuɗaɗen da suke kawowa a sinimun Najeriya ciki har da fim ɗin zaƙaƙuran gwaraza mai suna Black Panther: Wakanda Forever wanda a baya shi ne ke riƙe da wannan matsayi na fim ɗin da ya fi kawo kuɗi a ƙasar.

"Wannan bajinta ba kawai ta yawan kuɗin da aka samu ba ce; wata shaida ce ga ƙwarewar iya ba da labari da alfahari da al'adu da nagartar Nollywood ta rashin miƙa wuya ga abokan gogayya," wani kamfanin samar da fina-finai, FilmOne Entertainment, ya ce a dandalin Instagram.

Ya yaba wa fim ɗin a matsayin wani "abin al'ada mai daraja".

Kamfanin ya kuma jinjina wa Funke Akindele inda ya ce ƙwazonta na iya ba da labari ya "ƙyanƙyashe wani muhimmin babi a gagarumar masana'antar sinimun Najeriya".

A Tribe Called Judah ya samu bita daga masu sharhi da 'yan kallo kuma yana samun babban matsayi a dandali daban-daban na sharhin fina-finai.

Mahaifiyar Funke Akindele ce - wadda daraktar ta sadaukar da fim ɗin gare ta -ta yi mata ƙaimi wajen shirya fim ɗin - wanda ke nuna makircin wata uwar marayu na yin fashi a wani babban kanti, tare da 'ya'yanta biyar da ke cikin matsin rayuwa.