અમેરિકી સંસદમાં હિંસા બાદ ડોનાલ્ડ ટ્રમ્પે કહ્યું – ‘હું સત્તા સોંપવા કટિબદ્ધ’

વૉશિંગ્ટન ડીસીમાં કૅપિટલમાં અમેરિકી સંસદમાં હિંસાની ઘટનાના એક દિવસ બાદ રાષ્ટ્રપતિ ડોનાલ્ડ ટ્રમ્પે કહ્યું કે તેઓ વ્યવસ્થિત સત્તા હસ્તાંતરણ માટે તૈયાર છે અને હિંસા કરનારાઓ સામે કાર્યવાહી કરવામાં આવશે.

ટ્વિટરે તેમનું એકાઉન્ટ ફરી શરૂ કરતા તેમણે એક વીડિયો સંદેશ પોસ્ટ કર્યો છે. જેમાં તેમણે ઘટનાના પર અફસોસ વ્યક્ત કરી તેની ટીકા કરી છે. વળી તેઓ શાંતિમય રીતે સત્તા સોંપવા માટે પણ કટિબદ્ધ હોવાનું તેમણે કહ્યું.

ટ્રમ્પના આ સંદેશ અને વલણને એ રીતે જોવામાં આવી રહ્યો છે કે તેમણે પહેલી વખત ચૂંટણી પરિણામોમાં જાહેરમાં હાર સ્વીકારી છે.

ડોનાલ્ડ ટ્રમ્પે વીડિયો સંદેશમાં કહ્યું, "હું અન્ય અમેરિકી લોકોની જેમ જ કૅપિટલની હિંસાથી ગુસ્સે છું. મેં તરત જ તેની રજા માટે સુરક્ષાગાર્ડને મોકલી દીધા હતા. "

જોકે ઘણી ન્યૂઝ એજન્સીઓનું માનવું છે કે સુરક્ષાગાર્ડને તહેનાત કરવાની કામગીરી માઇક પેન્સે કરી હતી.

ટ્રમ્પે વધુમાં કહ્યું,"અમેરિકા હંમેશાં કાનૂન અને વ્યવસ્થામાં માનતો દેશ બની રહેવો જોઈએ. કૅપિટલમાં ઘૂંસનારા લોકોએ અમેરિકાના લોકતંત્રને અપવિત્ર કર્યું છે."

"આ લોકો દેશનું પ્રતિનિધિત્વ નહોતા કરતા અને તેમણે કાયદાના ઉલ્લંઘન કરવાની કિંમત ચૂકવવી પડશે."

દુનિયાને સ્તબ્ધ કરી દેનાર બુધવારના દિવસે અમેરિકાના ઇતિહાસમાં એ થયું જે કદી નહોતું થયું. સંસદ ભવન પર હુમલો અને ચાર લોકોનાં મોતનો આ મામલો આખી દુનિયાનું ધ્યાન ખેંચી રહ્યો છે.

છેલ્લા સમાચાર મુજબ ઝુકરબર્ગે ડોનાલ્ડ ટ્રમ્પને ફેસબુક અને તેના સંલગ્ન ઇન્સ્ટાગ્રામ પર અનિશ્ચિતકાળ માટે પ્રતિબંધિત જાહેર કર્યા છે. વળી સમગ્ર ઘટનાને પગલે વિશ્વમાં આ મામલે ઘેરા પ્રત્યાઘાત પડ્યા છે. વૈશ્વિક નેતાઓએ આ ઘટનાની કડક શબ્દોમાં ટીકા કરી છે. અને ટ્રમ્પના વલણ પર પણ સવાલ ઉઠાવ્યા છે.

ટ્વિટરે પણ 12 કલાક માટે રાષ્ટ્રપતિ ડોનાલ્ડ ટ્રમ્પનું એકાઉન્ટ લૉક કરેલ છે. તો બીજી તરફ ડેમૉક્રેટિક પાર્ટીના નેતાઓ ટ્રમ્પને સત્તામાંથી હઠાવવા માટેની માગ કરી રહ્યા છે.

ચક શૂમેર સહિતના સેનેટર્સ ટ્રમ્પને તત્કાલીક ધોરણે સત્તામાંથી દૂર કરવાનું કહ્યું છે. જો તેઓ સત્તામાંથી દૂર ન થાય તો ગૃહના સ્પીકર નેન્સી પેલોસીએ તેમની સામે મહાભિયોગ ચલાવવો જોઈએ એવું કહ્યું છે. અત્રે નોંધવું કે ટ્રમ્પ જો બાઇડન 20મી તારીખે રાષ્ટ્રપતિ તરીકે શપથ લે ત્યાં સુધી જ રાષ્ટ્રપતિપદ પર રહેશે. જેને હવે ગણતરીના દિવસો બાકી છે.

તેમ છતાં અમેરિકામાં કૉંગ્રેસની ઇમારત કૅપિટલમાં જે રીતે ટ્રમ્પના સમર્થકોએ હંગામો તેને પગલે રાજકીય આલમમાં સોંપો પડી ગયો છે અને રાજકારણ પણ ગરમાઈ ગયું છે.

રાષ્ટ્રપતિ ડોનાલ્ડ ટ્રમ્પના સમર્થકોની ભીડ બુધવાર બપોરે અચાનક જ કૅપિટલ્સ હિલ્સમાં ઘૂસી ગઈ અને આ ભીડ ત્યાં હાજર પોલીસ સાથે ઘર્ષણમાં ઊતરી.

સ્વાભાવિક છે કે આ ભીડ એ સંભાવનાથી પ્રેરિત હતી કે, તેઓ અમેરિકન કૉંગ્રેસની કાર્યવાહીને અટકાવી નાંખશે, જેથી નવા ચૂંટાયેલા રાષ્ટ્રપતિ જો બાઇડનને 2020ની ચૂંટણીમાં વિજેતાનું સર્ટિફિકેટ ન મળી શકે.

ચાલો એક નજર કરીએ કે શરૂઆતથી અત્યાર સુધી શું થયું.

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો