ગુજરાતમાં ચોમાસું વધારે સક્રિય, કયા જિલ્લામાં ભારેથી અતિભારે વરસાદ પડશે?

અમદાવાદસ્થિત હવામાન વિભાગના આંકડા પ્રમાણે હાલમાં સૌરાષ્ટ્ર અને કચ્છ પર ચોમાસું વધારે સક્રિય છે. છેલ્લા ચોવીસ કલાકમાં રાજકોટ સહિત સૌરાષ્ટ્રના અમુક જિલ્લામાં ભારે વરસાદ નોંધાયો છે.

ઉત્તર પૂર્વ અરબી સમુદ્ર અને ગુજરાતથી 3.1 કિમીની ઊંચાઈએ એક અપર ઍર સાઇક્લોનિક સર્ક્યુલેશન રચાયું હતું તે હજુ યથાવત્ છે. હવામાન વિભાગનું બુલેટિન જણાવે છે કે હાલમાં નલિયા, જલગાંવ, બ્રહ્માપુરી પરથી એક મોન્સુન ટ્રોફ પસાર થાય છે જે બંગાળની ખાડી અને ઉત્તર આંધ્ર પ્રદેશ સુધી પહોંચે છે. જેના કારણે વરસાદ પડવાની આગાહી છે.

અત્યારે બંગાળની ખાડીથી લઇને ઉત્તર આંધ્ર પ્રદેશ અને દક્ષિણ ઓડિશાના કિનારા સુધી એક લો-પ્રેશર એરિયાની રચના થઈ છે. તેની સાથે એક સાઇક્લોનિક સર્ક્યુલેશન રચાયું છે સમુદ્રની સપાટીથી 9.6 કિમીની ઊંચાઈએ છે અને દક્ષિણ પશ્ચિમ તરફ આગળ વધી રહ્યું છે. આગામી 12 કલાકમાં તે ઓડિશા અને ઉત્તર આંધ્ર પ્રદેશના દરિયાકિનારે ભારે વરસાદ લાવે તેવી શક્યતા છે.

ગુજરાતમાં અત્યાર સુધીમાં સરેરાશ 69 ટકા વરસાદ પડી ગયો છે. તેમાં કચ્છ અને ઉત્તર ગુજરાતમાં 70 ટકા કરતાં વધારે વરસાદ નોંધાયો છે જ્યારે સાઉથ ગુજરાતમાં સરેરાશના 72 ટકા વરસાદ પડી ગયો છે. સૌરાષ્ટ્રમાં હજુ માત્ર 63 ટકા વરસાદ પડ્યો છે જ્યારે પૂર્વ ગુજરાતમાં 69 ટકાથી વધારે વરસાદ પડ્યો છે એવું સરકારના ડેટા દર્શાવે છે.

19 ઑગસ્ટ, મંગળવારે રાજ્યમાં ઘણી જગ્યાએ ભારેથી અતિભારે વરસાદ પડવાની આગાહી છે. તેમાં નવસારી, વલસાડ, દમણ, દાદરા નગર હવેલી, જૂનાગઢ, અમરેલી, ગીર સોમનાથ અને દીવમાં છૂટાછવાયાં સ્થળે ભારેથી અતિભારે વરસાદ પડી શકે છે અને આ તમામ જિલ્લા અને કેન્દ્રશાસિત પ્રદેશો માટે રેડ ઍલર્ટની જાહેરાત કરવામાં આવી છે.

આ ઉપરાંત મંગળવારે સુરત, ડાંગ અને તાપી જિલ્લામાં પણ છૂટાછવાયાં સ્થળે ભારે વરસાદ પડશે. સૌરાષ્ટ્ર અને કચ્છની વાત કરવામાં આવે તો રાજકોટ, પોરબંદર, ભાવનગર અને દ્વારકામાં ભારેથી અતિભારે વરસાદ પડવાની આગાહી છે.

તેવી જ રીતે બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, ખેડા, અમદાવાદ, આણંદ, પંચમહાલ, દાહોદ, મહીસાગર, વડોદરા, છોટા ઉદેપુર, નર્મદા, ભરુચમાં ભારે વરસાદ પડી શકે છે.

સૌરાષ્ટ્રમાં સુરેન્દ્રનગર, જામનગર, મોરબી, બોટાદ અને કચ્છ જિલ્લામાં પણ આજે ભારે વરસાદ પડવાની આગાહી છે. આ સિવાયના જિલ્લાઓમાં મંગળવારે હળવાથી મધ્યમ વરસાદ પડવાની આગાહી કરવામાં આવે છે, જે દરમિયાન ગાજવીજ જોવા મળી શકે છે અને પવનની ઝડપ 30થી 40 કિમી પ્રતિ કલાક રહેશે.

બીબીસી માટે કલેક્ટિવ ન્યૂઝરુમનું પ્રકાશન