તમારા સ્માર્ટફોનનું કૉલ સેટિંગ્સ કેમ અચાનક બદલાઈ ગયું, તેની પાછળનું કારણ શું છે?

જો તમે ઍન્ડ્રોઇડ સ્માર્ટફોનનો ઉપયોગ કરો છો, તો થોડા દિવસો પહેલાં તમે તમારા ફોનમાં એક ફેરફાર જોયો હશે. ઘણા ઍન્ડ્રોઇડ યુઝર્સ તેમનાં કૉલ અને ડાયલર સેટિંગ્સમાં અચાનક આવેલા ફેરફારથી આશ્ચર્યચકિત થઈ ગયા છે.

ઍન્ડ્રોઇડ ફોનથી કોઈને કૉલ કરતી વખતે અથવા કૉલ રિસીવ કરતી વખતે, ફોનનો ઇન્ટરફેસ, એટલે કે ડિસ્પ્લે અને ડિઝાઇન, બદલાઈ ગઈ હોય તેવું લાગે છે.

સોશિયલ મીડિયા પર ઘણા લોકો તેમના ફોનમાં આ અચાનક આવેલા ફેરફાર વિશે પ્રશ્નો પૂછી રહ્યા છે. કેટલાક લોકોએ આ અંગે નારાજગી પણ વ્યક્ત કરી છે.

કેટલાક લોકોને એ મૂંઝવણ છે કે ડિસ્પ્લે સેટિંગ્સ બદલ્યાં વિના અથવા તેમાં ફેરફાર કર્યા વિના કે પછી કોઈ સિસ્ટમ અપડેટ વગર આ સેટિંગ આપમેળે કેવી રીતે બદલાઈ ગયું. કેટલાક લોકોએ તો શંકા પણ વ્યક્ત કરી છે કે તેમનો ફોન હેક થઈ ગયો હશે.

ઘણા ઍન્ડ્રોઇડ યુઝર્સે વિવિધ સોશિયલ મીડિયા પ્લૅટફૉર્મ પર આના વિશે ઍક્સ પર માહિતી શૅર કરી છે.

આ બદલાવ માત્ર ઍન્ડ્રોઇડ ફોનમાં જ કરવામાં આવ્યા છે. આઈઓએસ ફોનમાં આ પ્રકારના કોઈ બદલાવ થયા નથી એટલે તેમણે આ વિશે ચિંતા કરવાની જરૂર નથી.

પરંતુ ઍન્ડ્રોઇડ ફોનમાં આ પ્રકારના બદલાવો કેવી રીતે થયા, સેટિંગ્સ કેવી રીતે બદલાઈ ગયું અને શું તેને ફરીથી પહેલાં જેવું કરી શકાય? આ સવાલોના જવાબો જાણો આ લેખમાં.

લોકોએ 'હૅકિંગ' થયું હોવાનું અનુમાન કર્યું

ઘણાં યુઝર્સે પોતાની રીતે આ સમસ્યાના જવાબો શોધવાનો પ્રયાસ કર્યો. કેટલાકે તેને 'હૅકિંગ' સાથે જોડ્યું, જ્યારે અન્ય લોકોએ શંકા વ્યક્ત કરી હતી કે આ અપડેટ સરકારી એજન્સીઓ દ્વારા દેખરેખનું એક સ્વરૂપ છે.

એક યુઝરે ઍક્સ એકાઉન્ટ પરથી પોસ્ટ કરીને દાવો કર્યો, "અભિનંદન, તમારા ફોનનું સેટિંગ્સ પણ બદલાઈ ગયું છે. એક સૉફ્ટવૅર પણ આપમેળે ઇન્સ્ટોલ થઈ ગયું છે જે હવે પોપટની જેમ તમારી વિરુદ્ધ બોલશે."

બીજા યુઝરે પ્રશ્ન ઉઠાવ્યો હતો કે, "તમારા હાથમાં રહેલા મોબાઇલ ફોનનું સેટિંગ્સ અચાનક બદલાઈ ગયું છે. શું તમને ખરેખર લાગે છે કે તમે સુરક્ષિત છો?"

જોકે, 'એક યુઝરે' કહ્યું હતું કે ફોનનાં ડિસ્પ્લે સેટિંગ્સ બદલવાનો અર્થ 'હૅકિંગ' નથી અને તેનો અર્થ એ પણ નથી કે કંપની તમારા ફોટા કે મૅસેજીસ 'ચોરી' રહી છે.

તેમના મતે, મોબાઇલ કંપનીઓ સમયાંતરે ફોન અપડેટ કરતી રહે છે, જેથી તે પહેલાં કરતાં વધુ સારા અને વધુ સુરક્ષિત બને.

પરંતુ ખરેખર શું થયું છે?

તમામ ઍન્ડ્રોઇડ ફોન માટે સૉફ્ટવૅર ગૂગલ દ્વારા બનાવવામાં અને અપડેટ કરવામાં આવે છે.

કંપનીએ 'મે 2025' માં જાહેરાત કરી હતી કે તે 'મટિરિયલ 3D ઍક્સપ્રેસિવ' નામનું અપડેટ બહાર પાડી રહી છે, જે છેલ્લાં કેટલાંક વર્ષોમાં સૌથી મોટાં અપડેટ્સમાંનું એક હશે.

ગૂગલે કહ્યું છે કે આ અપડેટ ફોનનાં સૉફ્ટવૅર અને ડિસ્પ્લેને ઉપયોગમાં સરળ, ઝડપી અને વધુ સાહજિક બનાવશે.

પહેલાં આપણો ઍન્ડ્રોઇડ ફોન 'મટિરિયલ 3D' ના નામની ડિઝાઇન પર ચાલતો હતો. ગૂગલ પ્રમાણે તેના નિયમિત ઉપયોગની અબજો લોકોને ટેવ પડી ગઈ હતી.

ગૂગલે જણાવ્યું છે કે નવી ડિસપ્લે સેટિંગ્સમાં ઘણી ચીજો બદલવામાં આવી રહી છે. જેમ કે નોટિફિકેશન, કલર થીમ, ફોટો, જીમેઇલ અને વૉચ વગેરે. આ અપડેટ પણ તેનો જ ભાગ છે.

યુઝર્સની પરવાનગી વગર કેવી રીતે બદલાઈ ગયું?

ગૂગલે જણાવ્યું હતું કે 'મટિરિયલ 3D ઍક્સપ્રૅસિવ' અપડેટ હેઠળ ઍન્ડ્રોઇડ ફોનની કૉલ ઍપની ડિઝાઇનમાં ફેરફાર કરવામાં આવ્યો છે.

આ અપડેટ જૂનમાં કેટલાક વપરાશકર્તાઓ માટે શરૂ કરવામાં આવ્યું હતું અને પછી તબક્કાવાર વ્યાપકપણે લાગુ કરવામાં આવ્યું હતું.

ગૂગલના મતે, આ પાછળનો હેતુ કૉલિંગ ઍપનો ઉપયોગ સરળ બનાવવાનો છે.

ગૂગલે 'રિસેન્ટ' (તાજેતરના કૉલ્સ) અને 'ફેવરિટ' વિકલ્પોને દૂર કરીને 'હોમ'માં મર્જ કર્યા છે. તેથી હવે જ્યારે તમે ફોન ઍપ ખોલશો, ત્યારે તમને ફક્ત 'હોમ' અને 'કીપેડ' વિકલ્પો દેખાશે.

કંપનીના મતે, હવે એક જ નંબર પરથી આવતા બધા કૉલ એકસાથે અથવા એક જ જગ્યાએ દેખાશે નહીં, પરંતુ સમય અનુસાર કૉલ હિસ્ટ્રીમાં દેખાશે. આનાથી તમારે વારંવાર સંપર્ક શોધવાની જરૂર રહેશે નહીં.

ગૂગલ કહે છે કે આનાથી યુઝર્સને તેમની કૉલ હિસ્ટ્રીને વધુ સારી રીતે સમજવામાં મદદ મળશે. કંપની એમ પણ કહે છે કે હવે કેટલા મિસ્ડ કૉલ છે અથવા કેટલા રિસીવ થયા છે તે તપાસવા માટે દરેક નંબરને અલગથી ખોલવાની જરૂર રહેશે નહીં.

આ સાથે, યુઝર્સ તરફથી મળેલા પ્રતિસાદ પછી 'ઇનકમિંગ કૉલ' અને 'ઇન-કૉલ' ની ડિઝાઇન પણ બદલવામાં આવી છે. નવી ડિઝાઇન મુજબ, ઇનકમિંગ કૉલની ડિઝાઇન પણ બદલવામાં આવી છે. જેથી યુઝર્સ ખિસ્સામાંથી ફોન કાઢતી વખતે ભૂલથી કૉલ રિસીવ કે ડિસ્કનેક્ટ ન થાય.

શું ફરીથી પહેલાં જેવી ડિસપ્લે કરી શકાય?

ગૂગલનાં મૅસેજ અને સોશિયલ મીડિયા પરની પ્રતિક્રિયાઓ પરથી એવું લાગે છે કે ઘણાં યુઝર્સની ફોન ઍપ્સ ઑટોમૅટિક અપડેટ થઈ ગઈ છે, પરંતુ ઘણા લોકો એવા છે જેમનાં ફોન સેટિંગ્સ હજુ પણ બદલાયાં નથી.

ગૂગલ બ્લૉગ પર એક યુઝરે જણાવ્યું કે કેટલાક યુઝર્સે તેમના ફોન પર ગુગલ પ્લે સ્ટોર (જ્યાં ઍપ્સ ઇન્સ્ટોલ અથવા અપડેટ થાય છે) માં ઑટો-અપડેટ્સ ચાલું કરેલાં હોય છે, તેથી કેટલીક ઍપ્સ ઑટો-અપડેટ્સ ચાલુ થઈ જાય છે.

તેમણે વધુમાં કહ્યું કે યુઝર્સ ફોન સેટિંગ્સમાં જઈને 'અનઇન્સ્ટોલ અપડેટ' વિકલ્પ પર ક્લિક કરીને આ ઑટો-અપડેટ્સ બંધ કરી શકે છે અને ફોન કૉલ ડિસ્પ્લે સેટિંગ્સને તેમની પાછલી સ્થિતિમાં પુનઃસ્થાપિત કરી શકે છે.

પ્રખ્યાત મોબાઇલ કંપની વનપ્લસ દ્વારા પણ આ જ સમજૂતી આપવામાં આવી છે.

જ્યારે ઍક્સ પર એક યુઝરે કંપનીને પૂછ્યું કે તેઓએ આવું કેમ કર્યું, ત્યારે તેમને કહેવામાં આવ્યું, "આ વનપ્લસનું નથી, પરંતુ ગૂગલ ફોનના અપડેટનું છે. જો તમને હજુ પણ તમારા ફોન પરની જૂની સ્ટાઇલ ગમે છે, તો અપડેટને અનઇન્સ્ટોલ કરો."

આથી, જો તમે તમારા ઍન્ડ્રોઇડ ફોન પર પણ આ ફેરફારો જોયા છે, તો ચિંતા કરશો નહીં. જો તમને હજુ પણ જૂની સ્ટાઇલ ગમે છે અને આ નવાં અપડેટ્સ જોઈતા નથી, તો તમે નવાં અપડેટ્સને અનઇન્સ્ટોલ કરીને જૂની સ્ટાઇલ પસંદ કરી શકો છો.

બીબીસી માટે કલેક્ટિવ ન્યૂઝરુમનું પ્રકાશન