'દસ વર્ષ સુધી મારો પતિ મને બેહોશીની દવા આપી અજાણ્યા લોકો પાસે બળાત્કાર કરાવતો' - એ કહાણી જેણે આખા દેશને હચમચાવી નાખ્યો
ઇમેજ સ્રોત, Getty Images
- લેેખક, હ્યુ સ્કોફિલ્ડ
- પદ, બીબીસી સંવાદદાતા
(ચેતવણીઃ આ કહાણીમાં શરૂઆતથી જ વિચલિત કરી શકે તેવી વિગતો છે.)
ફ્રાન્સનાં એક મહિલા 10 વર્ષ કરતા વધુ સમયથી અજાણ્યા પુરુષો દ્વારા બળાત્કારનો ભોગ બનતાં રહ્યાં અને તેમના પતિએ જ તેમને બેહોશીની દવાઓ આપીને તેમના પર રેપ કરાવ્યો હતો. તેમણે કોર્ટમાં આ ભયાનક ઘટના વિશે જણાવ્યું છે.
72 વર્ષનાં જિઝેલ પેલિકોટે દક્ષિણ-પૂર્વ ફ્રાન્સના એવિગન ખાતે ટ્રાયલના ત્રીજા દિવસે 51 પુરુષો સામે પુરાવા આપ્યા હતા. આરોપીઓમાં તેમના પતિ પણ સામેલ છે જેની સાથે તેમણે 50 વર્ષથી લગ્ન કરેલાં છે. આ તમામ પર બળાત્કારનો આરોપ છે.
કોર્ટ સમક્ષ રજૂ થયેલા દસ્તાવેજો પ્રમાણે મહિલાના 71 વર્ષીય પતિ ડૉમિનિક પેલિકોટે પોલીસ સમક્ષ કબૂલ્યું હતું કે તેને અન્ય પુરુષોને તેમની બેહોશ પત્ની સાથે સેક્સ કરતા જોઈને સંતોષ થતો હતો.
આ કેસમાં ઘણા આરોપીઓએ પોતાની સામેના રેપના આરોપોને નકાર્યા છે. તેમનો દાવો છે કે તેઓ એવું માનતા હતા કે તેઓ મહિલાની સહમતિથી સેક્સ ગેમમાં ભાગ લઈ રહ્યા છે.
પરંતુ જિઝેલ પેલિકોટે કોર્ટને કહ્યું કે તેઓ જાતીય સંબંધમાં "ક્યારેય મરજીથી સામેલ ન હતાં". તેણે ક્યારેય ઊંઘવાનો ડોળ કર્યો ન હતો. તેને બેહોશ કરીને તેના પર અત્યાચાર કરાયો હતો.
આ એક એવો કેસ છે જેણે સમગ્ર ફ્રાન્સને હચમચાવી નાખ્યું છે કારણ કે આ એક પબ્લિક ટ્રાયલ છે અને તેની વિગતો જાહેરમાં આવી રહી છે.
'હું નિષ્ક્રિય હતી, મને ખ્યાલ ન હતો, અને મારા પર બળાત્કાર થઈ રહ્યા હતા'
તેમની લીગલ ટીમે અગાઉ કહ્યું હતું કે જિઝેલ પોતાની ઓળખ છુપાવવાના અધિકારને જતો કર્યો હતો જેથી કરીને આરોપીઓ 'શરમ'માં મુકાય.
End of સૌથી વધારે વંચાયેલા સમાચાર
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
તેમણે ગુરુવારે જણાવ્યું હતું કે તેઓ "એવી દરેક મહિલા વતી બોલી રહ્યાં છે જેમને તેમની જાણ વગર ડ્રગ અપાયું છે... જેથી અન્ય કોઈ મહિલાને આવી પીડા ભોગવવી ન પડે."
તેમણે નવેમ્બર 2020ની એ ઘટના યાદ કરી હતી જ્યારે પોલીસે તેમને તેમના પતિ સાથે એક પૂછપરછમાં હાજરી આપવા કહ્યું હતું.
થોડા સમય અગાઉ તેમનો પતિ એક સુપરમાર્કેટમાં મહિલાઓના અંડર-સ્કર્ટના ફોટો પાડતો પકડાયો હતો. જિઝેલ કોર્ટને જણાવ્યું કે તેમને લાગ્યું કે પોલીસ સાથેની મુલાકાત તે ઘટના સાથે સંબંધિત ઔપચારિકતા હતી.
મહિલાએ કોર્ટમાં કહ્યું, "પોલીસ અધિકારીએ મને મારી સેક્સ લાઇફ વિશે પૂછ્યું. મેં પોલીસને કહ્યું કે મેં ક્યારેય પાર્ટનર બદલવાનું કૃત્ય અથવા પરપુરુષ સાથે શયન નથી કર્યું. હું માત્ર મારા પતિ સાથે સંબંધ ધરાવું છું. મારા પતિ સિવાય કોઈ બીજો પુરુષ મારા પર હાથ મુકે તે હું સહન નથી કરતી."
"પરંતુ એક કલાક પછી પોલીસ અધિકારીએ કહ્યું, 'હું તમને એવી કેટલીક ચીજો બતાવવા જઈ રહ્યો છું જે તમને નહીં ગમે'. એમ કહીને તેમણે એક ફોલ્ડર ખોલ્યું અને મને એક ફોટોગ્રાફ બતાવ્યો."
"તેમાં પથારી પર સૂતેલાં પુરુષ કે સ્ત્રીને હું ઓળખી શકી નહીં. અધિકારીએ પૂછ્યું: ‘મેડમ, શું આ તમારો પલંગ અને બેડસાઇડ ટેબલ છે?’"
"હું મારી જાતને તે અજાણ્યા પોશાકમાં ઓળખી શકું તેમ ન હતી. ત્યાર પછી તેણે મને બીજો અને ત્રીજો ફોટો બતાવ્યો."
"મેં તેમને થોભી જવા કહ્યું. તે અસહ્ય હતું. હું મારી પથારીમાં નિષ્ક્રિય પડી હતી અને એક માણસ મારા પર બળાત્કાર કરી રહ્યો હતો. મારી દુનિયા વેરવિખેર થઈ ગઈ."
જિઝેલે કહ્યું કે ત્યાં સુધી તેમનું લગ્નજીવન સામાન્ય રીતે સુખી હતું. તેઓ અને તેમના પતિ અનેક નાણાકીય અને આરોગ્ય સંબંધિત તકલીફોમાંથી બહાર આવ્યા હતા. તેમના પતિએ અપસ્કર્ટિંગની ઘટના બીજી વખત નહીં બને તેવું વચન આપ્યું ત્યાર પછી તેમણે પતિને માફ કરી દીધા હતા."
"અમે સાથે મળીને જે બનાવ્યું હતું તે બધું જતું રહ્યું. અમારાં ત્રણ સંતાનો, સાત પૌત્ર-પૌત્રીઓ. અમે એક આદર્શ યુગલ હતા."
"હું ખોવાઈ જવા માગતી હતી. પરંતુ મારે મારાં બાળકોને કહેવું હતું કે તેમના પિતાની ધરપકડ કરવામાં આવી છે. મેં મારા જમાઈને મારી દીકરીની બાજુમાં બેસવા કહ્યું અને દીકરીને કહ્યું કે તારા પિતાએ મારા પર રેપ કર્યો છે અને અન્ય લોકો પાસે મારા પર રેપ કરાવ્યો છે."
"તેણે ચીસ પાડી જેનો અવાજ હજુ પણ મારા મનમાં કોતરાયેલો છે."
પતિએ કથિતપણે સેક્સસાઇટથી લોકોને ઘરે નોતર્યા
ઇમેજ સ્રોત, Getty Images
આવનારા દિવસોમાં કોર્ટ આ કેસની તપાસમાં વધુ પુરાવા જોશે. ડૉમિનિકે કેવી રીતે કથિત રીતે સેક્સ-ચેટ વેબસાઇટ્સ દ્વારા પુરુષોનો સંપર્ક કર્યો અને તેમને એવિગનના ઉત્તર-પૂર્વમાં આવેલા શહેર માઝાનમાં તેમના ઘરે આમંત્રણ આપ્યું હતું તેની વિગત જાણશે.
પોલીસનો દાવો છે કે પુરુષોને કડક સૂચના આપવામાં આવી હતી. કોઈનું ધ્યાન ન જાય તે માટે તેમણે ઘરથી થોડે દૂર વાહન પાર્ક કરવાનું હતું. જિઝેલને અપાયેલી ઊંઘની ગોળીઓની અસર થાય તે માટે તેમણે એક કલાક સુધી રાહ જોવાની રહેતી.
આ ઉપરાંત તેમણે દાવો કર્યો કે એકવાર પુરુષો ઘરમાં આવી જાય પછી તેમણે કિચનમાં જઈને કપડાં કાઢી નાખવા અને પછી ગરમ પાણીથી અથવા રેડિએટર પર હાથ ગરમ કરવા માટે જણાવાતું હતું. સિગરેટ પીવાની કે પરફ્યુમ લગાવવાની મનાઈ હતી કારણ કે તેની ગંધથી જિઝેલ ઊંઘમાંથી જાગી જાય તેમ હતાં. કૉન્ડોમ પહેરવાની જરૂર ન હતી.
આ કૃત્યમાં કોઈ નાણાંની આપ-લે પણ થઈ ન હતી.
પતિએ હજારો ફોટા અને વીડિયો ઉતાર્યા
તપાસમાં જાણવા મળ્યા મુજબ ડૉમિનિકે જાતીય સંબંધો બાંધતી વખતે પત્નીનો જોયાં અને તેમનો વીડિયો ઉતાર્યો. તેમણે એક હાર્ડ ડ્રાઇવ પર લગભગ 4000 ફોટો અને વીડિયો સ્ટોર કર્યા. એક સ્ટોરમાં એક મહિલાના સ્કર્ટ નીચે ફોટા પાડવાના પ્રયાસમાં ડૉમિનિક પકડાઈ ગયો ત્યાર પછી તેના કૉમ્પ્યુટરને ચેક કરતા આ આખી ઘટના બહાર આવી હતી.
પોલીસનું કહેવું છે કે તેમની પાસે 2011 અને 2020ની વચ્ચે લગભગ 200 રેપ થયાના પુરાવા છે.
શરૂઆતમાં પેરિસની બહાર તેમના ઘરે આ કૃત્ય થયાં. પરંતુ મુખ્યત્વે માઝાનમાં થયા જ્યાં તેઓ 2013 માં રહેવાં ગયાં હતાં.
તપાસકર્તાઓનો આરોપ છે કે અડધાથી વધુ રેપ તેમના પતિ દ્વારા કરવામાં આવ્યા હતા. રેપ કરનારા મોટા ભાગના બીજા પુરુષો ઘરથી માત્ર થોડા કિલોમીટર દૂર રહેતા હતા.
ગુરુવારે જજે પૂછ્યું કે શું તેઓ કોઈ આરોપીને ઓળખે છે? તો ગિસેલે કહ્યું કે તેઓ માત્ર એકને ઓળખે છે.
"તે અમારો પાડોશી હતો. તે અમારી બાઇક તપાસવા આવ્યો હતો. મેં તેને ઘણી વાર બેકરીમાં જોયો હતો. તે હંમેશાં નમ્ર હતો. મને ખ્યાલ ન હતો કે તે મારા પર રેપ કરવા આવતો હતો."
ત્યાર પછી જજે જિઝેલને યાદ અપાવ્યું કે ગુનો સાબિત ન થાય ત્યાં સુધી નિર્દોષતાની ધારણાના કારણે આ ઘટના માટે રેપ નહીં પરંતુ "સેક્સ સીન" શબ્દનો ઉપયોગ કરવા કોર્ટમાં સંમતિ થઈ હતી.
મહિલાએ જવાબ આપ્યો, "મને લાગે છે કે તેમણે હકીકતો ઓળખવી જોઈએ. હું જ્યારે વિચારું છું કે તેમણે શું કર્યું છે ત્યારે મને તિરસ્કાર થાય છે. તેમણે જે કર્યું તેને ઓળખવાની જવાબદારી કમસે કમ તેમની પાસે હોવી જોઈએ."
આ હકીકત બહાર આવ્યા પછી ગિસેલના જાણવા મળ્યું કે તેને ચાર જાતીય ચેપી રોગ થયા છે.
તેમણે કહ્યું, "મને કોઈ પણ આરોપી તરફ કોઈ સહાનુભૂતિ નથી. તેમાંથી એક એચઆઈવી પોઝિટિવ હતો તે છ વખત આવ્યો હતો. મારા પતિએ એક પણ વખત મારા સ્વાસ્થ્યની ચિંતા કરી નથી."
હવે તે છૂટાછેડા લેવાની પ્રક્રિયામાં છે.
ડૉમિનિક અને અન્ય આરોપીઓની હાજરીમાં બે કલાક બોલ્યા પછી તેમણે કહ્યું: "મારી અંદર બધું ખતમ થઈ ગયું છે. બહારથી કદાચ મજબૂત દેખાય પણ અંદરથી..."
બીબીસી માટે કલેક્ટિવ ન્યૂઝરૂમનું પ્રકાશન
