ગુજરાતમાં આજથી વરસાદનું જોર ઘટશે, ક્યારે શરૂ થશે બીજો રાઉન્ડ?
ઇમેજ સ્રોત, Getty Images
ગુજરાતમાં છેલ્લા થોડા દિવસથી જામેલા વરસાદી માહોલ વચ્ચે હવે રાજ્યમાં ચોમાસાનું જોર ઘટે એવા સમાચાર છે. આગામી દિવસોમાં કેટલાક વિસ્તારોમાં વરસાદી ગતિવિધિ ધીમી પડી જશે, તો કેટલાક વિસ્તારોમાં વરસાદ પડવાની શક્યતા નથી.
રાજસ્થાન પર સર્જાયેલી લૉ-પ્રેશરની સિસ્ટમ હવે નબળી પડી છે. આ સિસ્ટમ હવે ઉત્તર-પૂર્વ રાજસ્થાન અને મધ્ય પ્રદેશની આસપાસ પહોંચી છે એટલે કે ગુજરાતથી દૂર ગઈ છે. એના કારણે મૉનસુન ટ્રફ પણ ઉત્તર ભારત તરફ ખસી છે અને રાજસ્થાનના બિકાનેરથી મધ્ય પ્રદેશ ઉપર થઈને બંગાળ સુધી પહોંચી છે. જેને પગલે ગુજરાતમાં બુધવારે (12 જુલાઈએ) વરસાદમાં ઘટાડો થવાની સંભાવના છે. જોકે, રાજ્યમાં વરસાદ સાવ બંધ નહીં થાય અને કેટલાક વિસ્તારોમાં ભારે વરસાદની પણ શક્યતા પણ સેવાઈ રહી છે.
હવામાન વિભાગે કરેલી આગાહી પ્રમાણે ગુજરાતમાં હજુ પાંચ દિવસ સુધી વરસાદ વરસી શકે છે, પરંતુ ભારેથી અતિભારે વરસાદમાં ઘટાડો થવાની શક્યતા છે. હવામાન વિભાગ મુજબ આગામી પાંચ દિવસમાં ક્યાં ધોધમાર વરસાદ પડશે અને કઈ જગ્યાએ ભારેથી અતિભારે વરસાદની શક્યતા છે એ અંગેનું અનુમાન જાહેર કરવામાં આવ્યું છે.
હવામાન વિભાગનું શું કહેવું છે?
ઇમેજ સ્રોત, Getty Images
હવામાન વિભાગે કરેલી આગાહી અનુસાર, ગુજરાતમાં હજુ કેટલાક વિસ્તારોમાં ધોધમાર વરસાદ પડે તેવી શક્યતા દેખાઈ રહી છે. ખાસ કરીને ઉત્તર ગુજરાત અને પૂર્વ ગુજરાતના વિસ્તારોમાં ભારે વરસાદની શક્યતા દેખાઈ રહી છે.
12 જુલાઈ, બુધવારે સવારે ગુજરાતના મોટા ભાગના જિલ્લામાં વાદળછાયું હવામાન રહેવાની શક્યતા છે. જોકે આ દરમિયાન વરસાદની શક્યતા પણ કેટલાક જિલ્લાઓમાં વ્યક્ત કરવામાં આવી જ છે. દક્ષિણ ગુજરાતના મોટા ભાગના જિલ્લામાં છૂટોછવાયો વરસાદ પડવાની શક્યતા છે. જ્યારે સૌરાષ્ટ્ર અને કચ્છના કેટલાક જ જિલ્લામાં વરસાદ પડશે.
ઉત્તર ગુજરાતના પાટણ અને અરવલ્લી જિલ્લામાં છુટોછવાયો હળવોથી મધ્યમ વરસાદ ગાજવીજ સાથે થઈ શકે છે. તો અમદાવાદ, વડોદરા, પંચમહાલ, દાહોદ, મહીસાગર, છોટા ઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી જિલ્લામાં તથા દમણ અને દાદરાનગર હવેલીમાં ગાજવીજ સાથે છુટોછવાયો વરસાદ થાય એવી શક્યતા છે.
સૌરાષ્ટ્રમાં રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ અને બોટાદ જિલ્લામાં ક્યાંક-ક્યાંક છુટોછવાયો વરસાજ પડે એવી શક્યતા છે.
આ સિવાયના ઉત્તર ગુજરાત અને સૌરાષ્ટ્ર-કચ્છના બાકી જિલ્લાઓમાં વરસાદ પડવાની શક્યતા નહિવત્ છે, જોકે આ જિલ્લામાં ક્યાંક-ક્યાંક થોડો વરસાદ પડી શકે છે. એકંદરે આ જિલ્લામાં હવામાન શુષ્ક રહે એવી શક્યતા છે.
End of સૌથી વધારે વંચાયેલા સમાચાર
આવતી કાલે ક્યાં વરસાદ?
ઇમેજ સ્રોત, FAROUK KADRI
હવામાન વિભાગે એવી પણ આગાહી કરી છે કે, 12 જુલાઈના રોજ બનાસકાંઠા, મહેસાણા, સાબરકાંઠા, ગાંધીનગર, ખેડા, આણંદ અને સુરેન્દ્રનગર, જામનગર, મોરબી, દેવભૂમિ દ્વારકા, કચ્છમાં વરસાદ પડવાની શક્યતા ઓછી છે.
આ સિવાય પાટણ, અરવલ્લી, અમદાવાદ, વડોદરા, પંચમહાલ, દાહોદ, મહીસાગર, છોટાઉદેપુર, નર્મદા, ભરૂચ, સુરત, ડાંગ, નવસારી, વલસાડ, તાપી, દાદરા નગરહવેલી, દમણ, રાજકોટ, પોરબંદર, જૂનાગઢ, અમરેલી, ભાવનગર, ગીર-સોમનાથ, બોટાદમાં છુટાછવાયાં સ્થળોએ હળવોથી મધ્યમ વરસાદ પડવાની શક્યતા છે.
13 જુલાઈના રોજ બનાસકાંઠા, મહેસાણા, સાબરકાંઠા, જામનગર અને મોરબી, દેવભૂમિ દ્વારકા અને કચ્છમાં વરસાદ પડવાની શક્યતા ઓછી છે.
તે ઉપરાંત પાટણ, ગાંધીનગર, અરવલ્લી, ખેડા, અમદાવાદ, આણંદ, વડોદરા, પંચમહાલ, દાહોદ, મહીસાગર, છોટાઉદેપુર, નર્મદા, ભરૂચ, સુરત, ડાંગ, તેમજ નવસારી, વલસાડ, તાપી, દાદરા નગરહવેલી, દમણ, સુરેન્દ્રનગર, રાજકોટ, પોરબંદર, જૂનાગઢ, અમરેલી, ભાવનગર અને ગીર-સોમનાથ, બોટાદમાં છુટાછવાયાં સ્થળોએ હળવોથી મધ્યમ વરસાદ પડવાની શક્યતા છે.
ગુજરાતમાં ફરી ક્યારે વરસાદ વધશે?
ઇમેજ સ્રોત, Getty Images
ગુજરાતમાં આ વર્ષે ચોમાસું 10 દિવસ મોડું શરૂ થયું હતું, પરંતુ તે બાદ રાજ્યના મોટા ભાગના વિસ્તારોમાં ખૂબ સારો વરસાદ થયો છે.
સામાન્ય રીતે ગુજરાતમાં 15 જૂનની આસપાસ ચોમાસાની શરૂઆત થતી હોય છે. આ વર્ષે રાજ્યમાં 25 જૂનના રોજ ચોમાસાની શરૂઆત થઈ હતી. જે બાદ રાજ્યમાં સતત સારો વરસાદ થઈ રહ્યો છે.
આ પહેલાં ગુજરાતમાં આવેલા બિપરજોય વાવાઝોડાના કારણે કચ્છ, સૌરાષ્ટ્ર અને ઉત્તર ગુજરાતના અનેક વિસ્તારોમાં ભારે વરસાદ પડ્યો હતો અને ચોમાસા પહેલાં જ અનેક વિસ્તારોમાં વાવણીલાયક વરસાદ થઈ ગયો હતો.
હવે આવનારા ચારથી પાંચ દિવસ સુધી રાજ્યમાં વરસાદનું જોર ઘટવાની શક્યતા છે. જોકે હવામાન વિભાગની માહિતી પ્રમાણે પાંચ કે છ દિવસ બાદ ફરીથી ગુજરાતના કેટલાક વિસ્તારોમાં વરસાદનું જોર વધે તેવી સંભાવના દેખાઈ રહી છે.
