Louis van Gaal: Uyu wahoze atoza Man Utd yahishuye ko arwaye kanseri ya 'prostate'

Louis van Gaal wahoze ari umutoza wa Manchester United avuga ko arimo gufata imiti ya kanseri y'udusabo tw'intanga, izwi nka 'prostate'.

Uyu Muholandi, ubu utoza ikipe y'igihugu y'Ubuholandi, yabitangaje ku cyumweru mu kiganiro Humberto cya televiziyo y'icyo gihugu.

Van Gaal, w'imyaka 70, yavuze ko yari yaretse kubwira iyo nkuru abakinnyi be mu gihe cya vuba aha gishize cy'ikiruhuko cy'abakinnyi bakina mu mahanga.

Yongeyeho ati: "Sinashakaga kubibwira abakinnyi banjye kuko byashoboraga kugira ingaruka ku mikinire yabo".

Van Gaal ari mu cyiciro (manda) cya gatatu cye nk'umutoza w'Ubuholandi. Yagejeje iyi kipe ku mwanya wa gatatu mu gikombe cy'isi cyo mu 2014, none kuri iyi nshuro na bwo biteganyijwe ko azaba ari kumwe na yo mu gikombe cy'isi cyo muri Qatar muri uyu mwaka wa 2022.

Ati: "Muri buri cyiciro cy'igihe cyanjye nk'umutoza w'ikipe y'igihugu nagombaga gutaha nijoro nkajya ku bitaro abakinnyi banjye batabizi, kugeza ubu noneho babimenye. Bagatekereza ko mfite ubuzima bwiza, ariko... ntabwo mfite ubuzima bwiza".

Mu gihe cy'imyaka ibiri yamaze atoza Manchester United mu Bwongereza, Van Gaal yayihesheje igikombe cya FA mu mwaka wa 2016, mbere yuko asimburwa na Jose Mourinho.

Yanatsindiye ibikombe bya shampiyona hamwe na Barcelona, Bayern Munich, AZ Alkmaar na Ajax, iyi kipe yo mu Buholandi yayihesheje igikombe cya Champions League mu 1995.

Iyo ntsinzi yayigezeho hashize umwaka Fernanda Obbes, umugore wa mbere wa Van Gaal, apfuye nyuma yuko asanzwemo kanseri y'umwijima n'impindura (cancer du foie et pancréas/liver and pancreatic cancer).

Mu kiganiro cyo kumenyekanisha filime nshya ivuga ku buzima bwe, Van Gaal yakomeje agira ati: "Nanyuze mu burwayi bwinshi, harimo hamwe n'umugore wanjye bwite. Rero ibyo ni bimwe mu bigize ubuzima.

"Nk'ikiremwa muntu, birashoboka ko hari ibyo nungutse kurushaho kubera ibyo byose [nanyuzemo]".

Biteganyijwe ko Van Gaal azaba ari umutoza w'ikipe y'igihugu y'Ubuholandi mu mikino y'igikombe cy'isi izatangira muri Qatar mu kwezi kwa cumi na kumwe, aho ikipe ye iri mu itsinda A ihuriyemo na Sénégal, Ecuador (Equateur) hamwe na Qatar.

Mu kwezi gushize, yavuze ko icyemezo cyo gushyira iryo rushanwa muri Qatar "kitumvikana", avuga ko ishyirahamwe ry'umupira w'amaguru ku isi (FIFA) ryagishingiye gusa ku "mafaranga no ku nyungu z'ubucuruzi".

Ku mbuga nkoranyambaga, hari abamwifurije gukira ubwo burwayi bwa kanseri ya 'prostate', barimo n'ikipe ya Manchester United.

BBC ntibazwa ibivuye ku zindi mbuga.