Ronald Koeman arakomeza gutoza Barcelona – Laporta

Ronald Koeman azakomeza kuba umutoza wa Barcelona kandi "akwiye kugirirwa ingano runaka y'icyizere", nkuko byavuzwe na Perezida w'iyi kipe Joan Laporta.

Amakuru yari yavuze ko uyu Muholandi w'imyaka 58 ari hafi kwirukanwa nyuma yuko Barça itsinzwe imikino ibiri ya mbere ya Champions League ndetse ikaba irimo kugorwa na shampiyona ya La Liga.

Bwana Laporta yabivuze ku wa gatandatu mbere yuko iyi kipe itsindirwa kwa Atletico Madrid ibitego 2-0. Byinjijwe na Thomas Lemar ku munota wa 23 na Luis Suárez - wahoze akinira Barça - ku munota wa 44.

Laporta yagize ati: "Koeman azakomeza nk'umutoza wa Barça. Aracyafitiwe icyizere hatitawe ku biva mu mukino w'uyu munsi [ejo ku wa gatandatu]".

Ubu Barcelona ni iya cyenda ku rutonde rw'agateganyo rwa shampiyona, irarushwa amanota atanu na Real Madrid iri ku mwanya wa mbere, ikurikiwe ku mwanya wa kabiri na Atletico Madrid banganya amanota.

Avuga ku wa gatandatu mbere yuko itsindwa na Atletico Madrid, Laporta yongeyeho ati: "Turumva ko akwiye ikigero gito cyo kugirirwa icyizere kubera impamvu nyinshi: Ni umufana wa Barça kandi ni umunyabigwi ku bafana ku isi hose. Azaguma ku kazi kandi akwiye kugirirwa ingano runaka y'icyizere.

"Akunda Barça kandi yafashe icyemezo cyo kuza hano mu gihe kigoye cyane haba ku rwego rw'ubuyobozi bw'ikipe no mu bijyanye no gukina.

"Nyuma yo kuganira na we, ndabona ko afitiye icyizere ikipe ... Twavuganye kandi si ukuri ko dufitanye umubano mubi - ni [umubano] mwiza kandi urangwa no kubwizanya ukuri. Ntekereza ko twembi dutekereza kimwe, ku guhindura ibintu bikaba byiza".

'Ndambiwe gusabwa kwisobanura'

Ku wa gatanu, Koeman yavuze ko "arambiwe" kwisobanura.

Avuga kuri ejo hazaza he, yagize ati: "Nta muntu n'umwe uragira ikintu na kimwe ambwira".

"Perezida [Joan Laporta] yari hano ariko sinamubonye kuko twari turimo kwitegura umukino....

"Ndacyari hano, ariko mfite amaso n'amatwi kandi ibintu byinshi biyanyuramo.

"Ndambiwe gusabwa kwisobanura. Ntibyumvikana. Uyu munsi si cyo gihe [gikwiye], ariko umunsi umwe nifuza kuvuga ku bintu byose ntekereza kuri ibi byose".

Ariko, uyu wahoze atoza Everton n'ikipe y'igihugu y'Ubuholandi yanze gusubiza ikibazo ku mubano we na Laporta, aravuga gusa ati: "Ndacyari hano".

Umubano hagati ya bo umaze igihe urimo agatotsi - uri hafi no kuba mubi - kuva Laporta yatorerwa kuba Perezida w'iyi kipe mu kwezi kwa gatatu uyu mwaka.

Iyi kipe imaze igihe igorwa n'ubuzima nyuma yuko umukinnyi wayo ukomeye Lionel Messi ayivuyemo.

Yanatsinzwe na Benfica ibitego 3-0 muri iki cyumweru muri Champions League.

Ku wa kane, Guillem Balagué, inzobere ku mupira w'amaguru wa Espagne, yabwiye BBC Sport ko ari "ikibazo cy'igihe gusa" mbere yuko Koeman yirukanwa.

Balagué yagize ati: "Igihe ni cyo cy'ingenzi, atari ukwikuraho gusa Koeman ahubwo no kugira ngo hashyirweho gahunda".

Koeman yatsinze igitego ubwo yari umukinnyi cyahesheje intsinzi Barcelona ku mukino wa nyuma w'igikombe cy'Uburayi cyo mu 1992.

Yagize ati: "Ntabwo ari jye [muntu] w'ingenzi cyane. Intsinzi ni ingenzi kurusha umuntu umwe. Buri muntu wese azi ko ndi hano kubera urukundo mfitiye ikipe. Naje ari mu bihe bibi cyane".

Abajijwe n'umunyamakuru umwe icyabaye igihe cyiza cyane n'icyabaye igihe kibi cyane kuva yagera muri iyi kipe mu mwaka umwe ayimazemo, Koeman yasubije ati: "Igihe cyiza cyane? Igihe nasinyaga ngo mbe umutoza wa Barça. Igihe kibi cyane? Igihe Messi yagendaga".