Paul Pogba ati: 'Iki ni cyo gihe cyiza cyo kugenda'

Umukinnyi wa Manchester United Paul Pogba yavuze ko "iyi mpeshyi cyaba aricyo gihe cyiza cyo kujya ahandi".

Uyu Mufaransa watwaye igikombe cy'isi, arifuzwa ku mafaranga menshi cyane n'ikipe ya Real Madrid cyangwa ikipe yahozemo ya Juventus, yatwaye igikombe cya shampiyona mu Butaliyani.

Uyu musore w'imyaka 26 y'amavuko ariko aracyafite amasezerano yo kugeza mu kwezi kwa karindwi k'umwaka wa 2021 mu ikipe ya Manchester United.

Pogba yagize ati: "Ndi gutekereza ibi: Gushakisha ibishya ahandi. Maze imyaka itatu muri Manchester kandi nakoze neza; ibihe byiza n'ibihe bibi, kimwe na buri wese. Kimwe n'ahandi hose".

Yakomeje ati: "Nyuma y'uyu mwaka w'imikino, umwaka wanambereye mwiza…ndumva kuri njye iki cyaba ari igihe cyiza cyo kureba n'ahandi".

Mu kwezi kwa gatatu uyu mwaka, umutoza wa Real Madrid, Umufaransa Zinedine Zidane, yatangaje ko akunda cyane Paul Pogba kuko ari umukinnyi uzi gukora ikintu cyose mu kibuga.

Nubwo ashaka kugenda ariko, Manchester United yo irashaka kugumana uyu mukinnyi no mu mwaka utaha w'imikino.

Pogba yagarutse muri Manchester mu 2016, nyuma y'imyaka ine muri Juventus, aguzwe miliyoni 89,3 z'amapawundi - wari umuhigo ku isi, nyamara yari yarahereye mu makipe y'ingimbi ya Manchester.

Ayigarutsemo, Pogba ukina hagati, yakiniye Manchester imikino 89 ya shampiyona ayitsindira ibitego 24.

Mu kwezi kwa kane, Ole Gunnar Solskjaer, umutoza wa United, yavuze ko yizeye ko Pogba azaguma mu ikipe ye umwaka utaha w'imikino.