Real Madrid yaguze Eden Hazard ku giciro gishobora kurenga miliyoni 150 z'amapawundi

Real Madrid yemeye amasezerano yo kugura rutahizamu Eden Hazard imukuye muri Chelsea, ku giciro gishobora kurenga miliyoni 150 z'amapawundi.

Hazard, Umubiligi w'imyaka 28 y'amavuko, yemeye kontaro y'imyaka itanu akinira Real Madrid.

Biteganyijwe ko azatangazwa nk'umukinyi w'iyi kipe ku itariki ya 13 y'uku kwezi kwa gatandatu, ariko abanje gusuzumwa n'abaganga.

Yatsindiye Chelsea ibitego 110 mu mikino 352 yayikiniye - ikipe yagezemo avuye muri Lille yo mu Bufaransa mu mwaka wa 2012, birimo n'ibitego bibiri yatsinze ubwo Chelsea yatsindaga Arsenal ibitego 4-1 ikegukana igikombe cya Europa League mu cyumweru gishize.

Hazard yagize ati: "Kuva muri Chelsea ni cyo cyemezo gikomeye cyane kandi kigoye cyane mfashe mu buzima bwanjye nk'umukinnyi kugeza ubu".

Mu butumwa yanditse ku rubuga nkoranyambaga rwa Facebook, Hazard yongeyeho ati: "Nizeye ko munyumva kuko nagombaga gutangira icyiciro kindi cy'ubuzima bwanjye, cyo kimwe nkuko buri muntu wese muri mwe yabigenza abonye amahirwe yo kugera ku nzozi ze".

Real Madrid yabaye yishyuye miliyoni 89 z'amapawundi kuri Hazard, nubwo nihiyongeraho n'uduhimbazamusyi Chelsea ishobora kubona izindi miliyoni 60 z'amapawundi mu kumugurisha.

Marina Granovskaia, umuyobozi w'imikino muri Chelsea, yagize ati: "Amateka adusigiye ntaho azigera ajya".

Mu myaka irindwi y'imikino yari amaze muri Chelsea, Hazard - wari ufite kontaro yagombaga kurangira mu mwaka umwe uri imbere - yafashije Chelsea gutsindira igikombe cya shampiyona ya Premier League na Europa League inshuro ebyiri, FA Cup na League Cup.

Yanatowe inshuro enye nk'umukinnyi wa Chelsea wahize bagenzi be mu mwaka w'imikino.

Chelsea yafatiwe ibihano n'ishyirahamwe ry'umupira w'amaguru ku isi, FIFA, bivuze ko itazashobora kugura umukinnyi wo gusimbura Hazard.

Iyi kipe yafatiwe ibihano byo kutagura abakinnyi mu myaka ibiri y'imikino iri imbere kugeza mu mpera y'ukwezi kwa mbere mu mwaka wa 2020.

Yatsinzwe mu bujurire byayo bwa mbere muri FIFA, none ubu yajuririye urukiko nkemurampaka mu mikino (CAS).