'Umwaka w'imikino urarangiye' kuri Real ariko Solari avuga ko atazegura nyuma yo gusezererwa na Ajax

Umutoza Santiago Solari wa Real Madrid avuga ko atazegura ku kazi ke nyuma yaho iyi kipe isezerewe na Ajax yo mu Buholandi mu mikino ya Champions League y'uyu mwaka.

Ajax yari yatsinzwe ibitego 2-1 mu mukino ubanza, yatunguye Real ifite igikombe giheruka cya Champions League iyinyagira ibitego 4-1 ku kibuga Santiago Bernabéu cya Real, iyisezerera ityo ku giteranyo cy'ibitego 5-3 mu mikino yombi.

Gutsindwa kandi kwa Real yikurikiranya mu mikino yayihuje na Barcelona, kwatumye isezererwa mu mikino yo guhatanira igikombe cy'umwami cyo muri Espanye cya Copa del Rey, ndetse kuri ubu irushwa amanota 12 na Barcelona iyoboye urutonde rw'agateganyo rwa shampiyona ya La Liga yo muri iki gihugu.

Umutoza Solari yagize ati: "Ntabwo naje muri iyi kipe mu gihe nk'iki gikomeye nzanywe no kwegura".

"Icyo tugomba gukora ni ugutuza mu buryo bushoboka bwose kandi tukabyakira dukomeza umutsi mu buryo bwiza bushoboka bwose".

"Madrid iruta buri muntu wese muri twe - kandi iteka igaruka yisuganyije, kandi ifite imbaraga nyinshi kurushaho".

'Uyu mwaka w'imikino urangiriye aha'

Solari wahoze ari umukinnyi ukina hagati mu kibuga muri iyi kipe ya Real, yasimbuye ku butoza Julen Lopetegui mu kwezi kwa cumi na kumwe k'umwaka ushize wa 2018, ashyira umukono ku masezerano yo kuyitoza kugera mu mwaka wa 2021.

Uku gusezererwa kwa Real mu mikino ya kimwe cy'umunani, kwanditse amateka yo kuba inshuro ya mbere iyi kipe yatsindiye igikombe cya Champions League inshuro 13 inaniwe kugera mu mikino ya kimwe cya kane guhera mu mwaka wa 2010.

Ndetse myugariro wayo Dani Carvajal afite ubwoba ko "uyu mwaka w'imikino urangiriye aha" kuri iyi kipe yatwaye ibikombe bitatu biheruka bya Champions League.

Carvajal yagize ati: "Ntabwo nari narigeze numva meze nabi muri jye nkuko numva meze kuri ubu, sinzi uko nabisobanura. Mu cyumweru kimwe, buri kintu cyose [buri rushanwa ryose] kiraducitse, kandi byose byabaye nyuma y'imikino twakiniye ku kibuga cyacu".

"Biragaragara ko uyu mwaka w'imikino kuri twe urangiriye aha, ariko tuzakomeza gukora mu mikino ya shampiyona kuko nibyo tugomba gukora kandi tugomba kuba abanyamwuga".