Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Umufana wa Manchester City 'mu kaga gakomeye' nyuma yo gukubitirwa mu mukino wa Champions League
Umugabo ufana ikipe ya Manchester City arembeye bikomeye mu bitaro kubera gukubitwa nyuma y'umukino ubanza wabereye mu Budage Manchester City yatsinzemo Schalke ibitego 3-2 mu irushanwa rya Champions League.
Polisi y'Ubudage itangaza ko uyu mugabo w'imyaka 32 y'amavuko, yakomeretse bikomeye ku mutwe mu kugundagurana kurimo urugomo kwabaye hagati ye n'abafana babiri ba Schalke ku kibuga Veltins Arena cyabereyeho uwo mukino.
Polisi y'Ubudage yagize iti: "Muri uko kugundagurana, yakubiswe ingumi ahita yikubita hasi. Muri uko kwikubita hasi, umutwe n'ubwonko bye byarangiritse cyane".
Itangazo rya polisi y'Ubudage rivuga ko uwo mugabo yabanje kuvurirwa ku kibuga mbere yuko ajyanwa ku bitaro biri hafi aho.
Iryo tangazo ryongeraho riti: "Kuri ubu, ubuzima bwe buracyari mu kaga gakomeye".
Umuryango w'uyu mugabo uri gufashwa n'ishami rya polisi y'Ubwongereza rikorera mu mujyi wa Manchester ndetse na bamwe mu bayobozi b'ikipe ya Manchester City babaye bagumye mu Budage.
Polisi ikorera mu mujyi wa Manchester yagize iti: "Tuzi iby'ikubitwa ryabaye nyuma y'umukino wahuzaga Schalke na Manchester City".
"Turi gukorana n'aya makipe yombi n'abategetsi bo mu Budage mu gufasha mu iperereza ndetse no mu gufasha umuryango w'uwo mugabo".
Polisi y'i Manchester yongeyeho iti: "Twifuzaga gushishikariza uwo ari we wese ufite amakuru, kuduhamagara kuri nimero 101 cyangwa akaganira natwe imbona nkubone ku rubuga rwa interineti kugira ngo dushobore gusangiza amakuru y'ubutasi bagenzi bacu bo mu Budage".
Muri uwo mukino, Manchester City ifite igikombe giheruka cya shampiyona yo mu Bwongereza ya Premier League, ni yo yafunguye amazamu ku gitego cy'umukinnyi Sergio Aguero, mbere yuko Schalke iba iyigaranzuye gato bikaba ibitego 2-1 kuri penaliti ebyiri zinjijwe n'umukinnyi Nabil Bentaleb.
Nicolas Otamendi wa Manchester City yaje gusohorwa mu kibuga nyuma yo kwerekwa ikarita itukura, ariko ibitego bya Leroy Sane na Raheem Sterling biyihesha intsinzi.
