Hector Bellerin, myugariro wa Arsenal wavunikiye mu mukino na Chelsea, ntazongera gukina uyu mwaka

Ubuyobozi bw'ikipe ya Arsenal bwatangaje ko myugariro wayo Hector Bellerin nta wundi mukino azongera gukina muri uyu mwaka w'imikino nyuma yaho anyurijwe mu cyuma ibizamini byo kwa muganga bikemeza ko yavunitse mu ivi.

Bellerin w'imyaka 23 y'amavuko usanzwe akinira n'ikipe y'igihugu ya Espanye, yasohowe mu kibuga Emirates cya Arsenal ku munota wa 72 w'umukino wo ku wa gatandatu wayihuje n'ikipe ya Chelsea, warangiye Arsenal itsinze ibitego 2-0.

Byitezwe ko Bellerin atongera gukina mu gihe kiri hagati y'amezi atandatu n'amezi icyenda.

Ni wo mukino wa mbere yari abanjemo mu kibuga nyuma y'ibyumweru bitanu byari bishize avunitse ku mpfundiko, mu mukino wahuzaga Arsenal na Southampton mu kwezi gushize kwa cumi na kabiri.