Igitutu cyatumye Macky Sall atongera kwiyamamaza – abatavuga rumwe n'ubutegetsi

Abanyapolitiki batavuga rumwe n'ubutegetsi muri Sénégal bagize icyo bavuga ku kuba Perezida Macky Sall yatangaje ko ataziyamamaza mu matora yo mu 2024, bavuga ko byatewe n'igitutu yokejwe n'abaturage.

Abass Fall, depite akaba n'umuhuzabikorwa mu ishyaka PASTEF – ry'ukomeye mu batavuga rumwe n'ubutegetsi Ousmane Sonko – yavuze ko bitatunguranye.

Yagize ati: "Icyari kudutungura ni iyo Macky Sall aza kuba yatangaje ko aziyamamaza mu 2024.

"Twese turabizi ko yabishakaga... [ariko] ibyago kuri we, igitutu cyari cyinshi cyane kuburyo nta yandi mahitamo yari afite atari ukubaha itegekonshinga, yagiye we ubwe asubiramo [yifashisha] inshuro nyinshi, yari yaratoye mu 2016".

Aminata Touré, wahoze ari Minisitiri w'intebe ubu akaba ari mu batavuga rumwe n'ubutegetsi, yavuze ko icyemezo cya Sall cyo kubaha itegekonshinga cyatewe no "gushyira hamwe kw'Abanya-Sénégal bagendera kuri demokarasi" b'imbere mu gihugu no mu mahanga.

Ati: "Nta n'umwe wari witeguye kwemera isubira inyuma muri demokarasi yateganyaga [gukora]. Rero, mu kumanjirwa [kubura uko abigenza], yubashye itegekonshinga. Iyo aza kuba yarabikoze kare kose, ntitwari kuba turi aho turi uyu munsi".

Aminata yavuze ko abantu 16 biciwe mu myigaragambyo "kandi akanama k'iperereza kazagomba kutubwira abacuze uwo mugambi n'abandi abo ari bo".

Ariko Aminata Assome Diatta, wahoze ari minisitiri w'ubucuruzi, akaba ari umukuru w'ishyaka riri ku butegetsi rya Alliance pour la République, yavuze ko ibyabaye "byanditse amateka".

Ati: "Uyu munsi ni itariki y'amateka kandi, birenze uko byagenze mu gihe cyashize, Perezida wa Repubulika yeretse isi ko politiki ishobora kubamo n'imyitwarire iboneye".