Gutsindira Euro 2024 kwa Espagne 'ni ikintu cyiza kuri ruhago'

Umupira w'amaguru akenshi abantu bawugiraho ibitekerezo bitandukanye - ariko buri wese yemeranyaga n'undi ko Espagne yegukanye igikombe cya Euro 2024 ibikwiriye.

Ikipe y'igihugu y'umupira w'amaguru ya Espagne, izwi nka La Roja, yatsinze imikino yose irindwi idacyeneye kujya mu cyiciro cya penaliti. Uwo ni umuhigo iciye muri Euro.

Ibitego 2 -1 yatsinze Ubwongereza ku mukino wa nyuma byatumye yegukana igikombe cya Euro cya kane - iba iya mbere igitwaye inshuro nyinshi.

Ndetse yabigezeho itsinze amakipe akomeye, itsinda buri gihugu cy'i Burayi cyigeze kwegukana igikombe cy'isi - Ubutaliyani, Ubudage, Ubufaransa n'Ubwongereza, kongeraho no gutsinda ikipe ya Croatia yageze ku mukino wa nyuma w'igikombe cy'isi mu 2018, mu rugendo rwerekeza Espagne ku gikombe i Berlin mu Budage.

Umukinnyi wayo Rodri yabaye umukinnyi w'irushanwa. Lamine Yamal yabaye umukinnyi muto cyane mu myaka w'irushanwa. Dani Olmo yasangiye igihembo cy'umukinnyi watsinze ibitego byinshi. Yamal ni we watanze imipira myinshi yavuyemo ibitego.

Biroroshye kwibagirwa ko ikipe ya Espagne itaje mu irushanwa ifatwa nk'imwe mu makipe ahabwa amahirwe menshi bidasubirwaho yo kwegukana igikombe, ahubwo Ubwongereza n'Ubufaransa ni yo makipe abiri yahabwaga amahirwe cyane yo kwegukana igikombe.

Ndetse n'umutoza w'Ubwongereza Gareth Southgate yemeye ko Espagne yegukanye igikombe ibikwiye.

Yabwiye BBC Radio 5 Live ati: "Ni uko ni uko Espagne. Bari bakwiye intsinzi atari gusa iri joro, ahubwo no mu irushanwa ryose."

Intsinzi ya ruhago?

Ntabwo byari mu buryo bumwe bw'imikinire ya Espagne yihariye umupira mu myaka irenga 10 ishize - igatsindira igikombe cya Euro 2008 na Euro 2012, ndetse igatsindira n'igikombe cy'isi cyo mu 2010.

Irya kipe yari ishingiye ku guhererekanya umupira cyane ubundi amakipe bahatanye akamera nk'ayabuze umupira - hagati mu kibuga yari ishingiye ku bakinnyi b'abahanga cyane Xavi na Andres Iniesta - ariko muri iyi kipe ho abakinnyi bo ku mpande ni ingenzi cyane.

Nico Williams yatsinze igitego cya mbere, naho umukinnyi Mikel Oyarzabal winjiye asimbura yatsinze igitego cy'intsinzi mu minota ya nyuma - Yamal ni we watanze umupira wavuyemo igitego cya Williams.

Williams na Yamal, b'inshuti, bagize isabukuru y'amavuko ku wa gatanu no ku wa gatandatu - Williams yujuje imyaka 22 ku wa gatanu, naho Yamal yujuje imyaka 17 ku wa gatandatu.

Umukinnyi Yamal wa Barcelona ni we mukinnyi wa mbere muto mu myaka ukinnye muri Euro, uyitsinzemo igitego, uyitanzemo imipira ivamo ibitego, ndetse akegukana igikombe cya Euro.

Chris Sutton, wahoze ari rutahizamu wa Celtic, wakiniye Ubwongereza umukino umwe, yavugiye kuri BBC Radio 5 Live ati: "Ni ikintu cyiza kuri ruhago kuba Espagne yatsindiye iri rushanwa hamwe n'umukino yakinnye."

Gary Lineker, utangaza ikiganiro BBC Match of the Day, wigeze gukinira Barcelona, yagize ati: "Ni ugutsindwa kugoye Ubwongereza kukwakira ariko mu buryo runaka, ni intsinzi kuri ruhago yo gusatira."

Juan Mata, wahoze ari umukinnyi wo hagati mu ikipe ya Espagne, kuri BBC One yongeyeho ati: "Twakinnye umupira mwiza cyane, buri gihe twagerageje gutsinda imikino ndetse ntekereza ko tubikwiye gutsindira iri rushanwa.

"Dufite abakinnyi bakiri bato n'abakinnyi bakuze. Ntabwo ari ikipe yo muri iki gihe cy'ubu gusa, ahubwo ni n'ikipe y'ejo hazaza.

"Ubu barimo gukina umupira wo ku rwego rwo hejuru.

"Dutewe ishema cyane na bo ndetse twemera ko bashobora gukomeza gukura [mu mikinire] no kwiyizera no gukomeza gutsindira ibikombe."

Umunyamakuru w'Umunya-Espagne ku mupira w'amaguru Guillem Balagué yagize ati: "Espagne yongeye kuntungura.

"Baravuze ngo 'tugiyemo nta bwoba kandi gitwari' - kandi ibyo ni byo byabahesheje gutsindira irushanwa."