Bellingham avuga ko atari gukabya inzozi kurenza uku

Jude Bellingham avuga ko atari gukabya inzozi kurushaho, nyuma yo gusoza umwaka we wa mbere w'imikino muri Real Madrid begukanye igikombe cya Champions League.

Uyu Mwongereza w'imyaka 20 yahereje umupira Vinicius Jr watsinze igitego cya kabiri, ubwo iyi kipe y'igihangange yo muri Espagne yatsindaga ibitego 2-0 ikipe yahoze akinamo ya Borussia Dortmund yo mu Budage, mu mukino wa nyuma wa Champions League wabereye ku kibuga cya Wembley mu Bwongereza mu ijoro ryo ku wa gatandatu.

Real ni yo kipe ya mbere yegukanye ibikombe byinshi bya Champions League, ubu bibaye 15.

Bellingham yagiriye ibihe byiza muri Real muri uyu mwaka we wa mbere w'imikino, atsinda ibitego 23 mu marushanwa yose iyi kipe yakinnye, ayifasha gutsindira igikombe cya shampiyona ndetse atorwa nk'umukinnyi w'umwaka muri shampiyona ya La Liga y'icyiciro cya mbere muri Espagne.

Yabwiye igitangazamakuru TNT Sports ati: "Buri gihe narotaga kuzakina imikino nk'iyi.

"Iyo rimwe na rimwe ibintu bigeze ahakomeye utangira kwibaza niba koko ibyo byose byari ngombwa – ariko amajoro nk'iri joro akwereka ko byari ngombwa.

"Uyu mwaka w'imikino ugomba kuba uri aho ngaho [hejuru] mu bijyanye n'umwaka w'imikino ntamakemwa [nagize]. Sinshobora kubona uko mbivuga, ni ryo joro rya mbere ryiza ry'ubuzima bwanjye."

Uyu mukinnyi wo hagati w'ikipe y'igihugu y'Ubwongereza byabonekaga ko yasabwe n'imbamutima ubwo umukino wari urangiye. Mbere, byari byamugoye kubona amagambo yavuga mu kiganiro cyo kuri televiziyo nyuma y'uwo mukino, nyuma avuga ko ameze "neza maze kubona mu maso ha mama wanjye na papa wanjye".

Bellingham ubu yitezwe gusanga ikipe y'igihugu y'Ubwongereza, izwi nka 'Three Lions', ku itariki ya 8 y'uku kwezi kwa Kamena (6) mu kwitegura imikino ya Euro 2024.

'Nzahora nubaha Dortmund'

Real Madrid na Bellingham bamaze igihe kirekire bagowe n'uwo mukino wa nyuma, Dortmund itahabwaga amahirwe ipfusha ubusa uburyo yagiye ibona bw'ibitego bwo mu gice cya mbere, harimo no gutera ku cyuma cy'izamu.

Ariko mu gice cya kabiri Real yagiye irushaho gushikama muri uwo mukino, biza kuyihesha ibitego bibiri, icya Dani Carvajal n'icya Vinicius Jr.

Bellingham yamaze imyaka itatu y'imikino muri Dortmund, ayikinira imikino irenga 100, nyuma ajya muri Real ku mpeshyi y'umwaka ushize.

Yabwiye igitangazamakuru DAZN ati: "Ngomba kuvugisha ukuri, [Dortmund] ni yo yari ikipe ikomeye cyane mu gice cya mbere.

"Bashoboraga kuba batsinze ibitego bibiri cyangwa bitatu.

"Ariko ni iyo kamere... yuko [dushobora] kukugarukana [kukwigaranzura] tukakubabaza.

"Ikipe ndimo ubu irihariye cyane kuri jyewe ndetse ni ko bimeze no ku ikipe yanjye ya kera. Ntibyari gushoboka [kuri jye] iyo itabigiramo uruhare. Nzahora nyishimira kandi nzahora nubaha ibyo iriya kipe yankoreye."

Nyuma y'umukino, umutoza Edin Terzic wa Borussia Dortmund yashimiye Bellingham wahoze ari umukinnyi we.

Yagize ati: "Ubwo yagendaga avuye mu ikipe yacu, namubwiye nkuko nabwiye Erling Haaland – ko ntewe ishema no kuba umutoza wabo.

"Ni yo Champions League ya mbere atsindiye kandi ni akanya gateye ishema kuri we.

"Ndazi uko Mark, Denise na Jobe [se, nyina na murumuna wa Bellingham] barimo gukora kugira ngo iyi ntsinzi igere mu muryango. Ni uko ni uko Jude."

Bellingham, uzuzuza imyaka 21 mu mpera y'uku kwezi, yagiye mu mbaga y'abafana nyuma y'umukino, yambika nyina mu ijosi umudari we w'intsinzi wa Champions League.

Nuko na we asubiza asoma umuhungu we.

Bellingham nyuma yajyanye nyina mu kibuga kugira ngo yifotozanye na Jose Mourinho wahoze ari umutoza wa Real Madrid, wari urimo gukorera igitangazamakuru TNT Sports.

'Tweretse isi ko tutari turi hano gukina umukino wa nyuma gusa' – Terzic

Umutoza Terzic wa Borussia Dortmund yabwiye igitangazamakuru ZDF ati: "Twakinnye neza kandi ntekereza ko twari dukwiye [ibyiza] ibirenze gutsindwa ibitego 2-0.

"Kuva ku isegonda rya mbere, tweretse isi yose ko tutari turi hano gukina umukino wa nyuma gusa – ahubwo kuwutsinda.

"Twakoze ibintu byinshi neza, ariko bakinnye nta marangamutima mu gihe cya nyacyo, ari na byo twe twabuze uyu munsi [ku wa gatandatu]."

Dortmund yari yaje kuri uyu mukino wa nyuma idahabwa amahirwe. Yegukanye iki gikombe inshuro imwe gusa – mu 1997 – kandi ni bwo bwa mbere yari yongeye kugera ku mukino wa nyuma mu myaka 11 ishize.

Muri uyu mwaka w'imikino yarangije iri ku mwanya wa gatanu muri shampiyona ya Bundesliga y'icyiciro cya mbere mu Budage, irushwa amanota 27 na Bayer Leverkusen yegukanye igikombe cya Bundesliga cy'uyu mwaka.

Umukino wari 'ugoye cyane kurusha uko twatekerezaga ko uba umeze' – Ancelotti

Umutoza Carlo Ancelotti wa Real Madrid, ubu umaze kwegukana ibikombe bitanu bya Champions League nk'umutoza – bitatu na Real na bibiri na AC Milan – yanemeye ko umukino wari "ugoye cyane, ugoye cyane kurusha uko twatekerezaga ko uba umeze".

Mu gice cya mbere ikipe ye yananiwe gutera ishoti mu izamu.

Ancelotti yabwiye igitangazamakuru Movistar ati: "Sinakunze urwego twari turimo gukinaho.

"Twatakaje umupira kenshi cyane kandi mu mwanya utari wo. Twaretse Dortmund ikina uko yabishakaga...

"... Mu gice cya mbere twahababariye. Ariko mu gice cya kabiri, twatakaje umupira gacye kandi twakinnye neza kurushaho."

Aganira na TNT Sports, Ancelotti yongeyeho ati: "Birasa nk'inzozi ariko ni impamo."