DR Congo: M23 yashinjwe kwica abasivile 11, yo ivuga ko ari aba 'mai-mai'

Amafoto ateye y’imirambo y’abagabo 11 bishwe barashwe muri teritwari ya Rutshuru mu ntara ya Kivu ya ruguru yahererekanyijwe ku mbuga nkoranyambaga, uburyo bishwemo n'abo ari bo ntibuvugwaho rumwe.

Umwe mu bagize sosiyete sivile yaho yabwiye BBC ko abo bantu ari abasivile bishwe n’inyeshyamba za M23 ahitwa Bukombo muri 'chefferie' ya Bwito.

Gusa umwe mu barwanyi ba M23 w’ipeti rya koroneri utifuje gutangazwa yabwiye BBC ko abishwe ari “aba mai-mai bateye abacu basanga babateze bagwa mu mutego”.

Kuva mu kwezi kwa gatatu hari agahenge nyuma y’uko abarwanyi ba M23 bavuye mu bice bari barafashe ngo bigenzurwe n’ingabo z’umuryango wa Africa y’iburasirazuba.

Ariko mu gihe cya vuba hakomeje kumvikana imirwano ishyamiranya M23 n'abo mu mitwe yiyita “auto-defense” mu bice abarwanyi ba M23 bakambitsemo muri Masisi na Rutshuru.

Iyi mirwano ya vuba aha yagiye ituma abantu amagana bongera bahunga ingo zabo.

Ku yicwa rya bariya bagabo 11, umwe mu bakuriye sosiyete sivile yavuze ko habanje kumvikana imirwano ya M23 n’izindi nyeshyamba. Nyuma y’amasaha bakabona iyo mirambo.

Avuga ko abapfuye ari abasivile bari bategetswe gutwaza M23 imizigo mbere y’uko babica.

M23 imaze igihe ivuga ko ingabo za leta zahinduye uburyo bwo kurwana ubu zibatera ziciye mu mitwe itandukanye ikorera muri Kivu ya ruguru. Ibyo ingabo za leta zihakana.

Uburyo aba bantu bishwe n’abo ari bo kugeza ubu ntibuvugwaho rumwe.

Inzobere za ONU, leta ya Kinshasa, n’ibihugu byo mu burengerazuba bishinja u Rwanda gufasha inyeshyamba za M23 mu buryo butaziguye.

Hari ibimenyetso by'ibyo byerekanywe n’inzobere za ONU muri raporo yazo nshya, leta y’u Rwanda yavuze ko iyo raporo "ishingiye ahanini ku bimenyetso bidafatika n'amakuru atizewe agamije gusakaza ikinyoma cy'uko u Rwanda ari rwo nyirabayazana w'umutekano muke n'ibindi bibazo by'imbere muri DRC".

Mu gihe abategetsi b’akarere bafashe ingingo y’uko M23 igomba gushyirwa hamwe kandi ikamburwa intwaro, abarwanyi ba M23 bavuga ko ibyo bitazashoboka niba leta itemeye kuganira nabo.