Depite wa Minnesota Ilhan Omar yamenweho ''ibisukika bitazwi' arimo kuvugira mu nama
- Umwanditsi, Helen Sullivan na Ana Faguy, i Minneapolis
Depite Ilhan Omar uhagarariye leta ya Minnesota mu nteko ishingamategeko y'Amerika yagabweho igitero ubwo yari ari mu nyubako y'umujyi yari ayoboreyemo igikorwa cy'ubutegetsi, umwe mu bari bahari akoresha urushinge amutera (amumishaho) igisukika, nkuko polisi y'i Minneapolis yabivuze.
Omar ntiyakomeretse ndetse nyuma yakomeje kuvuga. Nyuma yanditse ku rubuga nkoranyambaga X ati: "Meze neza. Nararokotse rero uyu uteza akaduruvayo muto si we ugiye kuntera ubwoba ngo ambuze gukora akazi kanjye. Sinjya ndeka abibasira umuntu ngo batsinde."
Igisukika yateye Omar cyari gifite umwuka ukarishye (usharira) umeze nk'uw'ikinyabutabire, nkuko umunyamakuru wa BBC wari uri muri icyo cyumba abivuga.
Anthony James Kazmierczak, w'imyaka 55, yarezwe gukubita (kwibasira) kwo mu cyiciro cya gatatu ndetse ubu arafunze, nkuko byatangajwe n'ibiro by'umupolisi mukuru waho.
Ahavuye isanamu, AFP via Getty Images
Nyuma y'ibyabaye, Omar, wo mu ishyaka ry'abademokarate, yabwiye abari bari muri icyo cyumba ko "tuzakomeza... turi Minnesota ikomeye".
Alfred Flowers Jr, undi muntu wari uri muri icyo cyumba, yabwiye BBC ko yubaha "ubutwari n'imbaraga bye byatumye akomeza kuhaguma no kurangiza inama abantu bari barimo".
Videwo yafatiwe aho byabereye igaragaza itsinda ritera hejuru ngo "mupfumure" ubwo bagundaguranaga n'uwo mugabo bamusohora mu cyumba.
Ubwo yasunikwaga akurwa mu cyumba, yavuze ko Omar arimo "kuduteranya". Ntibyahise bisobanuka icyo uwo mugabo yari arimo gukomozaho.
Polisi yavuze ko Kazmierczak yahise atabwa muri yombi ndetse ko hari harimo gusuzumwa imiterere y'icyaha aho byabereye.
Mu butumwa yatangaje ku mbuga nkoranyambaga, umukuru w'umujyi (Mayor) wa Minneapolis, Jacob Frey, yagize ati: "Urugomo no gutera ubwoba nta mwanya bifite i Minneapolis. Dushobora kutemeranya tutarinze gushyira abantu mu kaga... Imyitwarire nk'iyi ntizihanganirwa mu mujyi wacu."
Mu mwaka wa 2019, Omar yabaye Umunyamerika wa mbere wavukiye muri Somalia, Umunyamerika wa mbere wavukiye muri Afurika, ndetse n'umwe mu bagore babiri ba mbere b'abayisilamu b'Abanyamerika ubaye Depite mu nteko ishingamategeko y'Amerika.
Icyo gikorwa yagabiwemo igitero ni kimwe mu nama Omar asanzwe akoresha, ndetse abantu hafi 100 bari bacyitabiriye bari mu gice cyo munsi cy'iyo nyubako iri mu majyaruguru ya Minneapolis.
Bari biteze kumva ibijyanye no kuba muri uwo mujyi wabo hari abategetsi bashinzwe abinjira mu gihugu bo ku rwego rw'igihugu no kumubaza ibibazo nyuma y'iraswa rya kabiri ryavuyemo urupfu rw'Umunyamerika ryabaye muri uku kwezi, bikozwe n'abashinzwe abinjira mu gihugu.
Ahavuye isanamu, Minneapolis PD/Hennepin County Sheriff
Muri uku kwezi kwa Mutarama, ushinzwe abinjira mu gihugu yarashe Umunyamerika Renee Good bimuviramo urupfu.
Mu cyumweru gishize, Umunyamerika Alex Pretti na we yararashwe bimuviramo urupfu nyuma yo guhagarikwa n'abashinzwe umutekano wo ku mupaka, byongera kubyutsa imyigaragambyo muri uwo mujyi n'uburakari mu baturage.
Muri iyo nama, Omar yasabye ko abashinzwe umutekano bashinzwe kugenzura abinjira mu gihugu na gasutamo (ICE) "bakurwaho", ndetse ko Minisitiri w'umutekano mu gihugu Kristi Noem akwiye "kwegura cyangwa akeguzwa". Nyuma y'ayo magambo ni bwo uwo mugabo yagabye igitero.
Abategetsi binginze Depite Omar ngo ahagarike iyo nama ariko atsimbarara ku kuyirangiza.
Ubwo yongeraga kuvugira imbere ahavugirwa ijambo, Omar yagize ati: "Tugiye gukomeza kuvuga. Mumpe gusa iminota icumi. Nyabuneka ntimutume baba ari bo bigarurira ijambo. [Asubiramo] Nyabuneka ntimutume baba ari bo bigarurira ijambo."
Benshi mu baba muri ako gace babona iyongerwa ry'igikorwa cyo kugenzura iyubahirizwa ry'ibijyanye n'abinjira mu gihugu nk'igikorwa cyo kuba Perezida w'Amerika Donald Trump yanga Omar, yise "umusazi w'umuhezanguni ushaka impinduka", kandi "uteye iseseme".
Ku itariki ya 18 y'uku kwezi, Trump yanditse ku rubuga Truth Social ko Omar "akwiye kuba ari muri kasho, cyangwa igihano kibi kurusho, agasubizwa muri Somalia, ifatwa nka kimwe mu bihugu bibi cyane ku Isi. Ashobora gufasha KONGERA KUGIRA SOMALIA IGIHANGANGE!"
Leta ya Minnesota ni yo leta ya mbere muri Amerika ituyemo abimukira benshi cyane bakomoka muri Somalia.
Ku wa kabiri, mu gusubiza ku iraswa rya kabiri ryavuyemo urupfu, Trump yavuze ko ubutegetsi bwe "bugiye gucubya gacye cyane" uko ibintu bimeze muri leta ya Minnesota.
Amakuru y'inyongera yatawe na Kristina Volk.
