EU yasabye 'kubahwa' nyuma yuko Trump akangishije imisoro ya 50% ku bicuruzwa byayo byinjira muri Amerika

Umutegetsi mukuru ushinzwe ubucuruzi mu muryango w'Ubumwe bw'Uburayi (EU) yavuze ko uyu muryango, ugizwe n'ibihugu 27, ushishikajwe no kugera ku masezerano y'ubucuruzi n'Amerika ashingiye ku "kubahana" aho kuba ku "bikangisho".

Ni nyuma yuko Perezida w'Amerika Donald Trump akangishije gushyiraho umusoro wa 50% ku bicuruzwa byose byinjira muri Amerika bivuye muri EU.

Nyuma y'ikiganiro kuri telefone yagiranye n'uhagarariye Amerika ku bucuruzi, Jamieson Greer, hamwe na Minisitiri w'ubucuruzi w'Amerika Howard Lutnick, komiseri w'ubucuruzi muri EU Maros Sefcovic yagize ati:

"EU yiyemeje byuzuye, ishishikajwe byuzuye no kugera ku masezerano abereye impande zombi."

"Ubucuruzi hagati ya EU n'Amerika ni ntagereranywa ndetse bugomba kuyoborwa no kubahana, si ibikangisho. Twiteguye kurengera inyungu zacu."

Mbere yaho ku wa gatanu, Trump yagaragaje ko arimo gutakaza kwihangana kubera intambwe y'ibiganiro by'ubucuruzi hagati y'Amerika na EU, avuga ko gahunda ye ari ukongera imisoro ku bicuruzwa biva muri EU byinjira muri Amerika guhera ku itariki ya mbere Kamena (6).

Trump yanditse ku mbuga nkoranyambaga ati: "Ibiganiro byacu na [EU] nta hantu birimo kwerekeza." Yongeyeho ko nta misoro izabaho ku bicuruzwa byubakirwa cyangwa bikorerwa muri Amerika.

Nyuma yaho, yabwiye abanyamakuru ati: "Ntabwo ndimo gushaka amasezerano - twashyizeho amasezerano." Yahise yongeraho ko ishoramari ryinshi muri Amerika rya kompanyi yo muri EU rishobora gutuma ategereza.

EU ni umwe mu bafatanyabikorwa mu bucuruzi bakomeye cyane b'Amerika.

Mu mwaka ushize, EU yohereje muri Amerika ibicuruzwa bifite agaciro ka miliyari zirenga 600 z'amadolari y'Amerika, ndetse yaguze muri Amerika ibicuruzwa bifite agaciro ka miliyari zirenga 370 z'amadolari y'Amerika muri uwo mwaka, nkuko imibare ya leta y'Amerika ibigaragaza.

Zivuga ku bikangisho bya Trump, leta z'i Burayi zaburiye ko imisoro iri hejuru cyane yagira ingaruka ku mpande zombi.

Minisitiri w'intebe wa Ireland (uhabwa inyito ya 'Taoiseach'), Micheál Martin, yagize ati: "Ntiducyeneye kwerekeza muri iyi nzira [y'imisoro].

"Ibiganiro ni yo nzira nziza cyane kandi yonyine irambye yo gukurikiza."

Minisitiri w'ubucuruzi mpuzamahanga w'Ubufaransa Laurent Saint-Martin yagize ati: "Dukomeje umurongo umwe: guhosha, ariko twiteguye gusubiza."

Minisitiri w'ubukungu w'Ubudage Katherina Reiche yavuze ko EU "igomba gukora buri kintu cyose" kugira ngo igere ku gisubizo n'Amerika.

Minisitiri w'intebe w'Ubuholandi Dick Schoof yabwiye abanyamakuru ko ashyigikiye umuvuno wa EU mu biganiro by'ubucuruzi ndetse "twabonye mbere ko imisoro [ku bicuruzwa byinjira muri Amerika] ishobora kwiyongera ndetse ikagabanuka mu biganiro n'Amerika".

EU iri mu biganiro n'Amerika nk'umuryango, nubwo Stephen Moore, wahoze ari umujyanama wa Trump mu bukungu, ubu ukora mu kigo cy'ubushakashatsi cyitwa 'Heritage Foundation' cyo mu murongo w'ibitekerezo wo gukomera ku bya kera, yabwiye BBC ati: "Igishobora kuba i Burayi... ni uko dushobora kugerageza kuganira na buri gihugu ukwacyo n'ibihugu by'i Burayi."

Yongeyeho ko uko we abibona, "intego ya nyuma" ya Trump "rwose ni ugutandukanya atari gusa Amerika [no kugira ijambo kw'Ubushinwa] ahubwo isi yose no kugira ijambo kw'Ubushinwa, byaba ari ikintu cyiza cyane aramutse ashoboye kubigeraho".

Mu ntangiriro ya Mata (4) uyu mwaka, Trump yatangaje imisoro ku bicuruzwa byinjira muri Amerika bivuye mu bihugu byinshi ku isi, harimo n'umusoro wa 20% kuri byinshi mu bicuruzwa EU igurisha muri Amerika.

Nyuma yaho gato, Trump yabaye ahagaritse mu gihe cy'amezi atatu imisoro iri hejuru cyane, kugeza ku itariki ya 8 Nyakanga (7), kugira ngo habeho ibindi biganiro, ariko yagumishijeho umusoro rusange wa 10% ku bihugu bikorana ubucuruzi n'Amerika.

Amerika yagumishijeho imisoro iri hejuru cyane ku Bushinwa nubwo yagabanyijwe cyane.

Nubwo Trump yagabanyije imisoro, Amerika yagumishijeho umusoro wa 25% ku bicuruzwa bikoze mu byuma (steel) no muri aluminiyumu (aluminium) itumiza muri EU.

EU yakangishije – iba iretse – gufatira ingamba Amerika. EU yavuze ko izashyiraho umusoro wa 25% ku bicuruzwa by'Amerika bifite agaciro ka miliyari 18 z'ama Euro byinjira i Burayi, ariko yabaye iretse kubikora.

EU irimo no kuganira ku zindi ngamba zo gufata ku bindi bicuruzwa by'Amerika byinjira muri EU bifite agaciro ka miliyari 95 z'ama Euro.

Ibyo Trump yinubira ku Burayi, byibanze ku cyo yise umubano ushingiye ku bucuruzi utangana – EU igurisha ibicuruzwa byinshi cyane muri Amerika kurusha ibyo ihagura.

Trump yegeka icyo kinyuranyo mu bucuruzi ku ngamba avuga ko zirenganya kompanyi zo muri Amerika, ndetse by'umwihariko yagaragaje guhangayika atewe n'ingamba zijyanye n'imodoka n'umusaruro w'ubuhinzi.