DR Congo ivuga ko ibitero by'indege kuri kaminuza muri Sudan byishe abaturage bayo

Leta ya Repubulika ya Demokarasi ya Congo ivuga ko 10 mu baturage bayo bapfuye nyuma yuko kaminuza bigagaho "irashweho" ku cyumweru mu bitero by'indege mu murwa mukuru Khartoum wa Sudan.

Mu itangazo, minisiteri y'ububanyi n'amahanga ya DR Congo yavuze ko "yamenye n'akababaro kenshi" iyicwa ry'abaturage bayo bigaga kuri kaminuza mpuzamahanga izwi nka International University of Africa.

Minisitiri w'ububanyi n'amahanga Christophe Lutundula yavuze ko hari ibigaragaza ko ibyo bitero by'indege "byakozwe n'igisirikare gisanzwe [cya Sudan] mu gace karimo abaturage b'abasivile kandi batitwaje intwaro, barimo n'abanyamahanga, bikomeretsa cyane abandi dusangiye igihugu".

Minisitiri Lutundula yavuze ko nyuma y'ibyabaye, ku wa mbere yakiriye mu biro bye Musab Altoum, umuyobozi ushinzwe ibikorwa muri ambasade ya Sudan i Kinshasa, amugezaho ubutumwa bw'akababaro no kwamagana iyicwa ry'abo baturage ba DR Congo.

Lutundula avuga ko yanamubwiye ko leta ya DR Congo yiteze ko abategetsi ba Sudan batanga umucyo kurushaho kuri ubwo bwicanyi.

Yanasabye ko Sudan ishyiraho uburyo bwo gutuma imirambo yabo itahukanwa igashyingurwa mu cyubahiro, no gushyiraho "umuhora [inzira] utekanye" watuma DR Congo itahukana abaturage bayo bakomeretse n'abandi bagiheze muri Sudan.

Kuva ku itariki ya 15 y'ukwezi kwa Mata (4) uyu mwaka, Khartoum ikomeje kwibasirwa n'imirwano hagati y'igisirikare cya leta n'umutwe witwara gisirikare witwa Rapid Support Forces (RSF), abaturage b'abasivile bakaba baraheze hagati y'amasasu y'impande zirwana.