Umukuru w'abatavuga rumwe n'ubutegetsi muri Tanzania yarezwe ubugambanyi

Umukuru w'abatavuga rumwe n'ubutegetsi muri Tanzania Tundu Lissu yarezwe ubugambanyi, nyuma y'umunsi atawe muri yombi amaze gukora mitingi mu majyepfo y'igihugu.

Icyo kirego gifitanye isano n'ubukangurambaga bwe bwo ku rwego rw'igihugu busaba ko hakorwa amavugurura ajyanye n'amatora, bufite intero igira iti: "Nta mavugurura, Nta matora".

Amatora muri Tanzania ateganyijwe kuba mu Kwakira (10) uyu mwaka, ari na bwo Lissu yitezwe guhatana na Perezida Samia Suluhu Hassan.

Ubwo Samia yageraga ku butegetsi bwa mbere mu mwaka wa 2021, nyuma y'urupfu rw'uwari Perezida John Magufuli, yari abereye Visi Perezida, yarashimagijwe kubera gukuraho zimwe muri gahunda zari zirimo igitugu cyane.

Ariko kuva icyo gihe na we yaranenzwe nyuma yuko bamwe mu batavuga rumwe n'ubutegetsi bwe bibasiwe bagatabwa muri yombi, naho abandi bagashimutwa.

Mu rukurikirane rw'ibikorwa byo muri rubanda, Lissu yakomeje kuvuga ko nta mahirwe ahari ko hashobora kubaho amatora yo mu bwisanzure no mu mucyo mu mezi atandatu ari imbere, keretse habayeho amavugurura.

Uyu mukuru w'ishyaka CHADEMA arashaka ko haba impinduka mu kanama k'amatora. Yavuze ko kadakwiye kubamo abantu bashyirwaho mu buryo butaziguye na Perezida Samia.

Abategetsi bavuze ko ubukangurambaga bwe ari ugushishikariza abaturage kwigomeka ku ikorwa ry'amatora rusange.

Mu gihe cyashize, Lissu yatawe muri yombi inshuro nyinshi.

Mu mwaka wa 2017, ku butegetsi bwa Magufuli, yarokotse igerageza ryo kumwica ubwo yaraswaga amasasu 16.

Nuko ahungira mu mahanga, aza gusubira mu gihugu by'igihe gito mu mwaka wa 2020 guhatana na Magufuli mu matora yabaye uwo mwaka. Yavuye mu gihugu nyuma yuko ibyavuye muri ayo matora bitangajwe, yinubira ko yagaragayemo inenge.

Nuko yongera gusubira mu gihugu mu mwaka wa 2023 nyuma y'impinduka Samia yari amaze gukora zo gutuma harushaho kubaho ubwisanzure ku batavuga rumwe n'ubutegetsi.

Mbere yaho ku wa kane, polisi yakoresheje imyuka iryana mu maso mu gutatanya abarwanashyaka ba CHADEMA, ubwo yabuzaga abategetsi bo muri iryo shyaka gukoresha ikiganiro n'abanyamakuru kijyanye n'itabwa muri yombi rya Lissu.

Bamwe mu barwanashyaka ba CHADEMA babwiye BBC ko nta kintu na kimwe kizababuza gusaba amavugurura ajyanye n'amatora mbere yuko amatora nyirizina aba.

Umurwanashyakaumwe yagize ati: "Dutunguwe no kubona polisi irimo kudutoteza mu gihe mitingi zacu ziba mu mahoro.

"Turabizi ko ishyaka riri ku butegetsi, CCM, riri inyuma y'ibi byose. Tuzaharanira impinduka mbere yuko amatora aba."

Imiryango iharanira uburenganzira bwa muntu yamaganye ikoreshwa ry'imbaraga ndetse ishinja leta gukoresha inzego zayo mu gucecekesha abayinenga.

Ishyirahamwe ry'abanyamategeko ryavuze ko itabwa muri yombi rya Lissu no gutoteza abamushyigikiye ari ugukoresha nabi ubutegetsi ndetse ko bigaragaza ko nta bworoherane muri politike buri mu gihugu.

Urubanza Lissu aregwamo ubugambanyi rwasubitswe, rukaba ruteganyijwe gusubukurwa ku itariki ya 24 Mata (4) uyu mwaka.