Ukraine: Zelensky ashinja Iran kubeshya ku bufasha iha Uburusiya

Perezida wa Ukraine Volodymyr Zelensky yashinje Iran "kubeshya" n'"ubufatanye mu iterabwoba" mu gufasha Uburusiya mu ntambara yabwo muri Ukraine.

Abivuze nyuma yuko Iran yemeye ku nshuro ya mbere ko yahaye Uburusiya indege ntoya z'intambara zitagira umupilote (drones), ariko ko yabuhaye izo ndege gusa mbere y'igitero cyabwo kuri Ukraine.

Uburengerazuba (Uburayi n'Amerika) bwemeza ko Uburusiya bwakoresheje drone za Iran z'"ubwiyahuzi" cyangwa za "kamikaze" - zitwa gutyo kubera ko zishwanyukira ku cyo zoherejwe kurasaho - mu kurasa ku bikorwa-remezo by'ingenzi byo muri Ukraine, ariko Iran n'Uburusiya mbere byari byabihakanye.

Ibura ry'umuriro w'amashanyarazi rikomeje kwibasira igice kinini cya Ukraine nyuma y'ibitero kuri stasiyo z'amashanyarazi.

Abategetsi bo mu burengerazuba bashinje Iran guha Uburusiya drone no kubuha abakozi bakorera ku rugamba bo gutoza abapilote b'Uburusiya bohereza izo drone.

Mbere, Iran yahakanye ibyo birego, ariko ku wa gatandatu minisitiri w'ububanyi n'amahanga wa Iran yavuze ko umubare mutoya w'izo drone woherejwe mu Burusiya.

Minisitiri w'ububanyi n'amahanga wa Iran Hossein Amir-Abdollahian yabwiye abanyamakuru mu murwa mukuru Tehran ati:

"Twahaye Uburusiya umubare mutoya wa drone mu mezi menshi ya mbere y'intambara yo muri Ukraine".

Ariko mu ijambo rye ku rubuga rwa Telegram, Perezida Zelensky yashinje Iran kubeshya "no muri uku kwemera icyaha".

Zelensky, w'imyaka 44, yavuze ko buri munsi Ukraine ihanura hafi drone 10 za Iran, nubwo Iran ivuga ko yahaye Uburusiya umubare mutoya gusa wazo.

Zelensky yaburiye Iran ku bufasha bwayo ku Burusiya, avuga ko ibi bizayigaruka (bizayikoraho).

Yagize ati: "Turabizi neza ko abarimu [ba gisirikare] ba Iran bigishije abakora iterabwoba b'Abarusiya ukuntu bakoresha drone, kandi muri rusange Tehran nta cyo ibivugaho.

"Kandi niba Iran ikomeje kubeshya kuri ibi byigaragaza, bivuze ko isi izakorana umuhate kurushaho mu gukora iperereza ku bufatanye bw'iterabwoba buri hagati y'ubutegetsi bw'Uburusiya n'ubutegetsi bwa Iran ndetse no ku cyo Uburusiya buriha Iran kuri ubu bufatanye.

"Mu isi yo muri iki gihe nta kintu kizabaho cyatuma abakora iterabwoba cyangwa abafatanyacyaha babo bakomeza kutabihanirwa".

Amerika, umuryango w'Ubumwe bw'Uburayi (EU/UE) n'Ubwongereza bose bafatiye ibihano Iran kubera guha drone Uburusiya bukoresha mu ntambara muri Ukraine.

Uburusiya bwakoresheje drone za "kamikaze" - zahawe iryo zina zitiriwe abapilote b'Ubuyapani b'indege za gisirikare bo mu ntambara ya kabiri y'isi batwaraga indege mu butumwa bapfiragamo - mu kurasa ku bikorwa-remezo by'ingenzi mu bice bitandukanye bya Ukraine.

Kubera iyo mpamvu, hashyizweho uburyo butuma umuriro w'amashanyarazi ubura hamwe mu gihe ahandi bawufite mu rwego rwo gusaranganya, ndetse habaho kugabanya ikoreshwa ryawo, mu gihe hari ubukonje buganisha ku gihe cy'ubukonje bwinshi cyegereje.

Bamwe mu bategetsi bo mu burengerazuba bavuze ko ibyo bitero by'Uburusiya ari "ibyaha byo mu ntambara", kuko, bijyanye n'amasezerano ya Genève - asobanura amategeko agenga intambara - ibikorwa-remezo bya gisivile ntibishobora kwibasirwa ku bushake.

Ku wa gatandatu, urwego rw'igihugu rw'amashanyarazi rwa Ukraine rwashyizeho izindi ngamba zo kugabanya umuriro w'amashanyarazi mu turere tumwe kuko ikoreshwa ryawo ryari ryiyongereye ugereranyije n'uwakoreshejwe mu gihe kimwe nk'icyo mu cyumweru gishize.