Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Icyamamare Miley Cyrus yemeje ko yambitswe impeta n'umunyamuziki Maxx Morando
Umuhanzi w'icyamamare Miley Cyrus yemeje ko yambitswe impeta n'umukunzi we bamaze imyaka ine babana, umuhanzi mugenzi we Maxx Morando.
Uwo muhanzi watsindiye ibihembo bya Grammy gatatu, yagaragaye yambaye impeta ya zahabu na diyama ku rutoki rw'impeta y'ubukwe, ubwo yari mu kwerekana filime Avatar: Fire and Ash i Los Angeles ku wa mbere.
Aganira na televiziyo yo muri Amerika, mu kiganiro Good Morning America ku wa gatatu, uyu mukobwa w'imyaka 33 yavuze ko Morando yateye ivi amusaba kubana akaramata ubwo bari mu rugendo aheruka gukorera muri Aziya.
Yagize ati: "Si ibintu byoroshye kuntungura kuko nkunda kugenzura buri kintu cyose, ariko uwo mwanya, narayamanitse rwose. Ndakubwiza ukuri, naratunguwe cyane."
Cyrus, uzwi mu ndirimbo zakunzwe nka Flowers na Party in the U.S.A, yigeze kubana mu buryo bwemewe n'amategeko n'umukinnyi wa filime w'Umutaliyani Liam Hemsworth mu 2018.
Aba bombi bari bamaze imyaka icumi bakundana, ariko batangaza ko batandukanye mu 2019.
Mu kiganiro yahaye British Vogue mu 2023, Cyrus yavuze ko we n'umusore Morando w'imyaka 27 bahuriye ku "gusangira nuwo mutaziranye" bizwi nka 'blind date'.
Morando ni umucuranzi w'ingoma mu itsinda ryo muri Los Angeles ryitwa Liily Band.
Iryo tsinda ryitabiriye igitaramo cya Miley gisoza umwaka, (NBC Miley's New Year's Eve Party) mu 2022, bari kumwe n'abanyamuziki barimo uwo afata nk'umubyeyi we mu by'umuziki Dolly Parton, na David Byrne.
Agaragaza impeta ye, Cyrus yabwiye Good Morning America ko Morando "yayihisemo neza".
Yagize ati: "Jye na Maxx tumaze imyaka ine turi kumwe, kandi biragaragara uburyo nakuze cyane muri iyo myaka ine.
"Ukeneye umuntu ubana nawe ugahora akubwira ko ubishoboye."
Indirimbo nshya ya Cyrus yitwa Dream as One iri mu bice bishya bya Avatar.
Yasohoye Album ye ya cyenda mu ntangiriro z'uyu mwaka, ariko yavuze ko "nta cyemezo" arafata mu gutangira urugendo rwo gukora ibitaramo, avuga ko bimugora cyane gukomeza kwiyitaho no kugira ubuzima bwo mu mutwe buzima igihe ari mu ngendo.
