Uduhungarema burya ngo dufise utujwi turenga gusunvya abaririnvyi, tukaririmba nk'aba 'stars'

Abashakashatsi bafashe amasanamu y’ibibera mu mihogo y’uduhungarema, basanga ivyo dukora bihuye n’ubuhinga abaririmvyi bakoresha mu gusohora amajwi arenga.

Uduhungarema turashobora gusohora imikuba itandukanye y’amajwi (frequencies), irenga kure aho ijwi ry’umuntu rishobora kugera.

Uduhungarema dushobora gushikana amajwi yatwo ku rugero rwa 'octaves' indwi, mu gihe umuntu we atarenza 'octaves' zitatu.

Uru rupimo rwa 'Octave' rushingiye ku mwanya w'urukurikirane rw’imirya, uri hagati y’umurya n’uwundi bisa ariko mw’ijwi ritari ku rugero rumwe.

Nko ku gitari canke piyano, amajwi aba atonze nk’akarorero ku ma 'notes'- CDEFGAB-CDEFGAB- CDEFGAB- gutyo gutyo izi zikaba ari nka 'Octaves' zitatu.

N’ukuvuga amajwi indwi kuva aho 'note' ya mbere ihera n’aho isubira gutangurira ikaza igira munani muri urwo rukurikirane. Aha ni naho havuye iryo zina rya ‘octave’ kuko igiharuro ‘umunani’ mu rurimi rw’iki latini ari ‘Octo’.

Abashakashatsi bavuga ko kubona amajwi y’uduhungarema ashobora gushika kuri 'octaves' indwi ari ibintu bitangaje.

Abo bashakashatsi bavuga ko bamwe mu baririmvyi nka Mariah Carey bashobora gushikana ijwi kuri 'octaves' zine canke zitanu.

Ntibashoboye mugabo gutahura mu buryo bwuzuye insiguro ya zimwe mu ndirimbo z’utwo duhungarema canke amajwi yatwo.

Ariko barashoboye kumenya ko turamukanya mu majwi kandi bamenya n’uko duhinyanyura ayo majwi.

Professor Coen Elemans, yigisha muri kaminuza ya Southern Denmark, ari nawe yayoboye ico gikorwa, avuga ko babonye ubwa mbere ‘uko imirya yo mu mihogo ihindura ija imbere yongera isubira inyuma, muri utwo duhungarema mu gusohora amajwi atandukanye.

Agira ati: “Nk’akarorero, mu gusohora ijwi ryo hasi turiko turahamagarana, dukoresha imirya yitwa 'false vocal folds' – nk’uko n’abaririmvyi babikora".

Izo ‘false vocal folds’ n’imitsi y’umuhogo canke imirya umuntu adakenera gukoresha mu gihe ariko aravuga canke aririmba bisanzwe.

Bisanzwe bizwi ko abaririmvyi basakuza cane bamwe bavuza umuziki umena amatwi bita ‘metal singers’ ari bo bakoresha imirya y’umuhogo ya ‘false vocal folds’ nk’utwo duhungarema.

Mariah Carey ni nde?

Mariah Carey ni umuririmvyi wo muri Leta zunze Ubumwe za Amerika, yamenyekanye cane kubera indirimbo ziwe za Noweli, harimwo urwakunzwe kurusha izindi mu Bwongereza mu zo mu bwoko bwa ‘classics’: 'All I Want for Christmas is You'.

Yayiririmbanye mu birori na Justin Bieber mu 2011, ariko yari yasohotse ubwa mbere mu 1994.

Mariah, azwi kubera ubushobozi bwiwe bwo guhibongoza, yaririmvye indirimbo z’ubwoko bwinshi zirimwo iza Pop, R&B, Hip-hop na Soul.