Uvira: Imirwano hagati ya Wazalendo na FARDC yiciwemo abantu

Imirwano ku wa kabiri hagati y'imitwe ya Wazalendo n'ingabo za FARDC mu mujyi wa Uvira yatumye abantu bahasiga ubuzima kandi itera impagarara nk'uko abategetsi b'uyu mujyi babivuga. Ibinyamakuru muri DR Congo bivuga ko abantu bagera ku munani bapfuye.

Mu itangazo ry'umuvugizi w'intara ya Kivu y'Epfo igice kigenzurwa na leta, avuga ko ibi byatewe no kutumvikana kw'impande zombi ariko impamvu y'uko kutumvikana ntiyavuzwe.

Imwe mu mirwano hagati y'impande zombi yabereye mu gace ka Kavimvira kari hafi y'umupaka n'u Burundi. Radio RFI ivuga ko yavuye ku kutumvikana hagati ya Wazalendo na FARDC ku kwinjira kw'abantu bavuye mu Burundi.

Wazalendo ni imitwe y'abasivile yitwaje intwaro ubusanzwe ifatanya n'ingabo za leta kurwana n'inyeshyamba za M23 zigenzura ibice bitandukanye muri iyi ntara ya Kivu y'Epfo, n'umurwa mukuru wayo Bukavu, ndetse n'ibice by'intara ya Kivu ya Ruguru.

Si ubwa mbere imirwano ishyamiranyije Wazalendo na FARDC muri Uvira, mu kwezi kwa Gashyantare (2) uyu mwaka imirwano hagati y'impande zombi yiciwemo abantu bagera kuri 12, abasivile n'abasirikare.

Olivier Muhasha, umwe mu banyamakuru bari mu mujyi wa Uvira, yabwiye BBC ko imirwano hagati ya Wazalendo na FARDC yo ku wa kabiri yateye abantu benshi ubwoba "mu gihe muri uyu mujyi hasanzwe hari impagarara n'ibihuha ko wugarijwe na M23".

Mu itangazo ry'ubutegetsi rivuga ku byabaye, rivuga ko Guverineri w'iyi ntara asaba Wazalendo n'ingabo za leta "gufata ingamba zo kwirinda kugwa mu mutego w'umwanzi" avuga ko uwo mwanzi "akwiza amakuru atari yo ko yagose umujyi wa Uvira, kandi bidafite ishingiro".

Kubera iki kibazo, Guverineri w'iyi ntara Jean Jacques Purusi, ku ruhande rwa leta, yatumije "inama idasanzwe" imuhuza n'abahagarariye ingabo, abakuriye amadini, urubyiruko n'abagore, abategetsi gakondo, hamwe n'abakuriye abitwa "Volontaires pour la Défense de la Patrie" cyangwa Wazalendo.

Muhasha avuga ko kugeza mu ijoro ryo ku wa kabiri ituze ryari ryagarutse i Uvira, ati: "Nta masasu tukirimo kumva kugeza muri aya masaha ya saa mbiri [z'ijoro]."

Ubushyamirane bwavuzwe mu gihe umutwe wa M23 mu mpera z'icyumweru gishize byatangajwe ko wafashe agace ka Lubumba/Rubumba kari ku ntera ya kilometero zigera kuri 80 uvuye mu mujyi wa Uvira.

Ibi birimo kuba mu gihe kandi abategetsi i Doha muri Qatar bemeje ko uruhande rwa leta n'urwa M23 bongeye gusubukura ibiganiro byo gushaka kugera ku masezerano y'amahoro.

Majed al-Ansari, umuvugizi wa Minisiteri y'ububanyi n'amahanga ya Qatar, ku wa kabiri yabwiye abanyamakuru ko bakiriye ziriya mpande zombi, kandi ko ubu barimo kuganira ku "urwego rwo kugenzura ishyirwa mu bikorwa ryo guhagarika imirwano, no guhererekanya imfungwa".