Vincent Murekezi uregwa jenoside yarize mu rukiko avuga 'akarengane' yakorewe n'umunyamategeko we
- Umwanditsi, Yves Bucyana
- Igikorwa, BBC Gahuzamiryango i Nyanza
- Igihe co gusoma: iminota 3
Urukiko Rukuru rwafatiye ibihano umunyamategeko wa Vincent Murekezi woherejwe na Malawi kuburanira mu Rwanda ku byaha bya jenoside, nyuma y'uko ruvuze ko uyu munyamategeko yagize imyifatire igamije gutinza urubanza rw'uwo yunganira.
Urugereko rw'uru rukiko rukorera i Nyanza mu Rwanda, uyu munsi rwagombaga gutangira kuburanisha Murekezi mu bujurire, gusa imbere y'inteko iburanisha uyu mugabo yaturitse ararira.
Mu ijwi ririmo ikiniga, yabwiye Urukiko ko uwo yari yahisemo ko amwunganira yivanye mu rubanza habura iminsi ibiri ngo baze kuburana, kandi yari yaramaze kumwishyura.
Murekezi w'imyaka 64 yari umucuruzi ukomeye muri Malawi aho yari amaze imyaka 19 afite n'ubwenegihugu bwaho ku yandi mazina, yoherejwe mu Rwanda mu 2019 nyuma yo kugerageza izindi nzira zose z'ubucamanza bwaho atambamira koherezwa mu Rwanda.
Mu Rwanda, Urukiko Rwisumbuye rwa Huye mu mujyi wa Butare aho ashinjwa ko yakoreye ibyaha, rwamukatiye gufungwa burundu nyuma yo kumuhamya ibyaha bya jenoside, ibyaha we ahakana, ndetse akaba yarajuriye.
Urubanza rwe mu bujurire rwasubitswe kenshi kugira ngo ahabwe umwanya wo kubona umwunganizi mu mategeko. Uwo yabonye ni Me Alex Kagame Kimonyo.
Mu rukiko uyu munsi yabwiye Urukiko ati: "Twarumvikanye byose bijya ku murongo ndetse mbwira umwana aramwishyura.
"Ku cyumweru ngira ngo mumenyeshe ko nageze muri gereza ya Nyanza ambwira ko yivanye mu rubanza ati: 'bindi biri muri systeme y'urukiko bazabikubwira'."
Murekezi yabwiye Urukiko ko ibi uwari kumwunganira yamukoreye ari "akarengane", asaba Urukiko kumukurikiranira iki kibazo mu rugaga rw'abavoka.
Ahavuye isanamu, Rwanda Prosecution
Mu rukiko byavuzwe ko Me Alex Kagame Kimonyo yanditse amenyesha ko we n'itsinda rye bivanye mu rubanza kuko Murekezi atubahirije ibyo basezeranye.
Urukiko rwavuze ko rutemeye ibisobanuro uyu munyamategeko yatanze, ruvuga ko atinza urubanza, kandi mu byo yanditse aterekanye ibyo atumvikanyeho n'umukiliya we, kandi ko umukiliya we yerekana ibimenyetso ko yamwishyuye.
Urukiko rwategetse ko ruhanishije Me Alex Kagame gutanga amande y'ibihumbi 300 y'u Rwanda, no kutagira ahandi aburana ataratanga ayo mande.
Uyu munyamategeko ntiyari ari ku rukiko kandi ntacyo aravuga ku mugaragarokuri uyu mwanzuro w'urukiko ubusanzwe utajuririrwa.
Urukiko rwahaye Murekezi ikindi gihe cyo gushaka umwunganira urubanza rwe rukazongera kumvwa tariki 12 Gicurasi(5) uyu mwaka.
