Ukraine: Abategetsi bavuga ko Kyiv yagabweho igitero cya drone z'ubwiyahuzi

Paul Adams i Kyiv na Merlyn Thomas i London

BBC News

Uburusiya bwagabye ibitero mu bice bimwe bya Ukraine birimo n'umurwa mukuru Kyiv bukoresheje izisa nka drone z'"ubwiyahuzi" zakorewe muri Iran.

Abantu batari munsi y'umunani bishwe, bane i Kyiv na bane mu mujyi wa Sumy.

Andriy Yermak, umukuru w'ibiro bya Perezida wa Ukraine Volodymyr Zelensky, yagize ati: "Bigaragaza kwiheba [gutakaza icyizere] kwabo".

'Kamikaze drones', ni indege ntoya zitarimo umupilote zivugwa ko ari iz'ubwiyahuzi kuko zihita zisandarana n'ibisasu zitwaye.

Umukuru w'umujyi (mayor) wa Kyiv Vitalii Klitschko yavuze ko inyubako zituwemo n'abantu zo mu gace ko rwagati mu mujyi zangiritse.

Mu cyumweru gishize, umurwa mukuru wibasiwe n'ibisasu bya misile byinshi by'Uburusiya mu gihe cy'isaha ya mu gitondo ubwo abantu baba bihutira kujya mu mirimo, mu gitero cyibasiye ibice byinshi bya Ukraine kikica abantu 19.

Umujyi wa Mykolaiv uri ku cyambu (ikivuko mu Kirundi) wo muri Ukraine na wo wibasiwe na drone z'ubwiyahuzi ku cyumweru nijoro, nkuko bivugwa n'umukuru w'uwo mujyi.

'Mayor' Oleksandr Senkevich yavuze ko drone eshatu zatwitse ibigega by'amavuta y'ibihwagari (tournesol/sunflower), habura amasaha ngo igitero cy'i Kyiv kibe.

Umutegetsi wo mu gisirikare cya Ukraine kirwanira mu kirere yavuze ko izi drone zose zagurukiye mu gihugu zivuye mu majyepfo.

Ibiturika byo kuri uyu wa mbere byatangiye hafi saa kumi n'ebyiri n'iminota 30 za mu gitondo (6h30) ku isaha yaho - ni ukuvuga hafi saa kumi n'imwe n'iminota 30 (5h30) zo mu Rwanda no mu Burundi.

Icyaturitse mu gihe cya vuba aha gishize ni icyaturitse mu ma saa mbili n'iminota 10 (8h10) ku isaha yaho.

Bibiri byaturikiye hafi yo rwagati mu mujyi, uburyo bw'inzogera bwo kuburira ndetse n'uburyo bwo kuburira bwo mu modoka bwumvikanira muri ako gace.

Ikigambiriwe kiragoye kumenya. Ibiro bya 'mayor' bivuga ko inyubako zituwemo n'abantu n'izidatuwemo n'abantu zibasiwe.

Abategetsi b'urwego rw'ingendo zo muri gariyamoshi bavuga ko ibiturika byabonetse hafi ya stasiyo nini y'i Kyiv.

Umunyamakuru w'ibiro ntaramakuru Reuters yatangaje ko yabonye ibisigazwa bya drone yakoreshejwe mu gitero byari biriho amagambo avuga ngo "Igenewe Belgorod".

Ibiro bya perezida w'Uburusiya - Kremlin - byashinje Ukraine kugaba ibitero bya misile ku mujyi wa Belgorod. Ukraine yarabihakanye.

Abagabo babiri bitwaje imbunda - bari bararwanye muri Ukraine nk'abakorerabushake - ku wa gatandatu bishe abantu 11 mu kigo cy'imyitozo ya gisirikare cy'Uburusiya mu karere ka Belgorod ko mu Burusiya, gahana imbibi na Ukraine.

Ibitero by'Uburusiya byo mu gihe cya vuba aha gishize byibasiye ibikorwa-remezo by'amashanyarazi bya Ukraine. Byatangaza atari ko bigenze no kuri iyi nshuro.

Yandika ku rubuga nkoranyambaga rwa Telegram, 'Mayor' Klitschko yavuze ko ibiturika bine byabereye mu karere ka Shevchenkivskyi hagati muri Kyiv, kibasiwe n'ibisasu byinshi mu cyumweru gishize, nubwo abahatuye bo bavuze ko bumvise ibiturika bitanu cyangwa bitandatu.

Yanasabye abaturage kuguma mu bwihisho bwagenewe kwikingamo ibitero byo mu kirere.

Ariko nubwo habayeho kuburira, imihanda yo mu murwa mukuru irabonekamo abantu. Hagati y'icyiciro cya mbere n'icya kabiri cy'ibitero, abantu benshi basaga nk'abakomeje akazi gasanzwe kabo ko ku wa mbere mu gitondo.

Yermak yanditse ku rubuga rwa Telegram ko Ukraine icyeneye ubundi bwirinzi bw'ibitero byo mu kirere "mu gihe cya vuba gishoboka".

Ukraine ivuga ko na mbere yaho Uburusiya bwigeze gukoresha izi drone za Iran.

Iran ihakana ivuga ko itigeze iziha Uburusiya, ndetse n'Uburusiya nta cyo burabivugaho ku mugaragaro.

Perezida w'Uburusiya Vladimir Putin yavuze ko ibitero byo mu cyumweru gishize byari ibyo kwihimura ku gisasu cyatewe ku iteme ry'ingenzi rihuza Uburusiya n'umwigimbakirwa wa Crimea bwiyometseho mu 2014 buwukuye kuri Ukraine, icyo gitero akaba yaracyegetse kuri Ukraine.

Bwari bwo bwa mbere igice cyo rwagati muri Kyiv kigabweho igitero mu buryo butaziguye, kuva intambara yatangira mu kwezi kwa kabiri uyu mwaka.

Mu cyumweru gishize, Putin yavuze ko bidacyenewe ko hagabwa ibindi bitero ku hantu henshi ho muri Ukraine.

Yavuze ko henshi mu hari hagambiriwe hagabweho ibitero, yongeraho ko nta ntego afite yo gusenya igihugu.

Andi makuru yatawe na Elsa Maishman ari i London