Ukraine: Ingene ubuhinga bushasha IRIS-T bwo gukingira ikirere bukora

Mu misi mike iheze, twarumvise ikirwanisho co gukingira ikirere kizwi nka IRIS-T, inkinzo rutura yo gukorora ibisasu vya misire, cahawe Ukraine gitanzwe n’Ubudagi muri ino ndwi.

Iki kirwanisho gitanzwe inyuma y’aho Ukraine isabiye incuti zayo kuyiha izindi mfashanyo inyuma y’ibibombe Uburusiya bwacucagiye ku bisagara bitari bike, harimwo mbere n’umugwa mukuru Kyiv, mu ntango z’iyi ndwi.

Inyuma y’umubonano ku cicaro cavyo i Buruseri (Bruxelles/Brussels) mu Bubirigi, ibihugu 50 bicuditse na Ukraine mw’ishirahamwe ryo kwivunira umwansi hamwe OTAN/NATO vyatangaje ko bigiye kurungikira iki gihugu gihanganye n’Uburusiya ibirwanisho rutura vyo gukingira ikirere.

Mu birwanisho vyemewe n’ibihugu nk’Ubwongereza, Canada, Ubufaransa n’Ubuholande, harimwo za misire n’ama radars. Imbere y’aha, Reta Zunze Ubumwe za Amerika zari zayemereye nk’ibi nyene.

Ariko ata gushidikanya, iki kirwanisho c’ubuhinga buhanitse catanzwe n’Ubudagi ni co kivugwa cane gusumba kubera ari kimwe mu bigezweho gusumba kw’isi.

‘Igihe gishasha mu gisata co kwivuna umwansi’

Mu kwerekana umunezero wiwe, umushikiranganji wa Ukraine ajejwe kwivuna abansi, Oleksii Reznikov, yanditse kuri Twitter ati: "Igihe gishasha mu gisata co kwivuna umwansi catanguye muri Ukraine. Ibirwanisho vya IRIS-T vy’Ubudagi vyamaze gushika hano”.

Ubudagi bwiyemeje kurungika bine muri bino birwanisho rutura vyo gucungera ikirere, n’aho Kyiv bizoba ngombwa ko irindira gushika mu mwaka uza kugira ngo bitatu bindi bisigaye birungikwe.

Nk’uko reta y’Ubudagi ibivuga, iki kirwanisho nico ca mbere ca none mu buhinga bwo gukingira ikirere mu Budagi.

Ibirwanisho vyo gukingira ikirere bikoreshwa mu kuzibira ibitero vyo mu kirere ku banyagihugu, ku nyubakwa nyamukuru, ku bikoresho no ku ngabo zirwanira ku butaka.

Gikora gute?

Cane cane, iki kirwanisho IRIS-T kirasa ku ntera yo hagati ariko hejuru cane mu kirere, kigenewe gukingira igisagara gito. Gishobora gukorora indege, ibisasu vya misire be na za ndege zitagira abadereva, zizwi nka drones.

IRIS-T SL, ikirwanisho gishasha co muri ubu bwoko, cageragejwe neza ku ncuro ya mbere mu 2014 imbere y’abaserukira amakungu.

Diehl Defense, ikigo c’Ubudagi cahinguye ubwoko bw’iki kirwanisho, ivuga ko ubu buhinga “bushobora kubandanya bukingira akarere mu gihe kirekire”.

Diehl yongerako iti: "Ikoresheje ubuhinga butandukanye bwa ‘radar’ na ‘commande’, IRIS-T itanga ubushobozi bwo hejuru cane mu gukingira ikirere”.

Nk’uko bivugwa n’ikinyamakuru co mu Budagi Der Spiegel, ubu buhinga “bugizwe n’imodoka zitatu: ikamyo ya gisirikare itwara inkoho ishobora kurasa misile umunani, imodoka ya radar, n'imodoka ya commande".

Der Spiegel congerako kiti: "Misire zikorora indege zishobora kugema ikiri ku ntera y’ibirometero 40 hamwe na 20 uja hejuru”.

Ku ruhande rwayo, iradiyo y’Abadagi Deutsche Welle ivuga ko ibisasu vya misire vya IRIS -T bikoresha amasanamu y’imishwarara (images infrarouges/ infrared images) mu kubona neza aho bishaka kugema kandi ko bishobora guterwa kuri degree 360 uvuye aho biterewe.

Igisata ca BBC gikoresha ururimi rw’ikirusiya kivuga kandi ko radar y’ubu buryo ikomeye cane, ibi bikayituma ishobora kubona bitagoranye igisasu ca misire kigendera hafi. Hampande y’ibi, ifise ububasha bwo guhiga no gusambura indege, ibisasu canke za drone nyinshi ica rimwe.

None iki kirwanisho gisigura iki kuri Ukraine?

Perezida Volodymyr Zelensky wa Ukraine amaze amezi atari make asaba incuti ziwe ubuhinga bwo gukingira ikirere bushobora kuba “nk’inkinzo yo mu kirere” ya Ukraine.

Igisirikare ca Ukraine kivuga ko IRIS-T ishobora gukingira igihugu “iterabwoba”.

Avugana na Deutsche Welle, umuhinga mu vyo kwivuna abansi mu gisata kijejwe imigenderanire mw’ishirahamwe ry’ibihugu vya Bulaya, Rafael Loss, avuga ko ubu buhinga bushasha “buzokomeza cane igisata ca Ukraine kijejwe kwivuna abansi mu gihe buzoba burungitswe”.

Icakora, aragabisha ko ubu atizeye ko ari “impinduka nyazo zitangazwa n’abanya-Ukraine bamwe bamwe”, n’aho bitanga amahirwe ko ubu “ibibanza vya gisivire na gisirikare bike ari vyo bizoshikirwa n’ibitero”.

Zelensky we nyene ubwiwe, ku wa kane, itariki 13 Gitugutu (10), yavuze ko Ukraine ubu ifise “10% y’ivyo ikeneye” mu rwego rwo gukingira ikirere.

Ukraine iracafise za misire zo gukorora indege zakora muri ca gihe c’ubutegetsi bw’Abasoviyeti, ubu ikaba iriko irarondera kuzishira ku rugero rwa none ku buryo ihabwa n’incuti zayo.

Hagati aho, igisirikare ca Ukraine carashoboye guhangana n’ic’Uburusiya muri ano mezi umunani aheze kuva intambra itanguye.

Kivuga kiti: "Nk’akarorero, muri vya bitero bikomeye vyo ku wa 10-11 Gitugutu, ingabo za Ukraine zirwanira mu kirere zarashoboye gukorora 60% za misire z’Uburusiya”.

Nta nkeka ko IRIS-T y’Ubudagi hamwe n’ibindi birwanisho vyemewe n’ibihugu vya OTAN bizotsimbataza ubushobozi bwa Ukraine bwo guhangana n’ibitero vy’Uburusiya, ariko nk’uko abahinga be na Zelensky we nyene ubwiwe babivuga, Ukraine izobandanya ikenera ibindi birwanisho bitangwa n’incuti zayo.