Ukraine: Nta gihamya ifatika ubu ko Russia yakoresha intwaro za 'nuclear' – CIA
Ahavuye isanamu, Getty Images
Umukuru w'ikigo cy'Amerika cy'ubutasi bwo mu mahanga (CIA) avuga ko inzego z'ubutasi zitarabona "gihamya ifatika kugeza ubu ko Abarusiya barimo guteganya kohereza cyangwa no kuba bakoresha intwaro za nikleyeri" muri Ukraine.
William Burns yabivugiye mu nama yateguwe n'ikinyamakuru The Financial Times cyo mu Bwongereza.
Nyuma yuko bugabye igitero kuri Ukraine ku itariki ya 24 y'ukwezi kwa kabiri, Uburusiya bwatangaje ko burimo gutegura ku rwego rwo hejuru intwaro zabwo z'ubumara za nikleyeri.
Bwana Burns yaburiye ati: "Bitewe n'uburyo bwo kurata imbaraga ... twumvanye ubutegetsi bw'Uburusiya, ntabwo dushobora kwirengagiza ko ibyo bishoboka".
"Rero dukomeje gushishikara nk'urwego rw'ubutasi ... kuri ibyo bidashoboka, muri iki gihe aho ibyo Uburusiya bushobora kugeraho cyangwa gutakaza biri ku kigero cyo hejuru cyane".
Mu yandi makuru, ishami ry'umuryango w'abibumbye ryita ku buzima (OMS/WHO) ryavuze ko rimaze kugenzura ibitero 200 byagabwe ku mavuriro muri Ukraine kuva Uburusiya bwayigabaho igitero.
Mike Ryan, umukuru w'ubuvuzi bwihutirwa muri OMS, yavugiye mu kiganiro n'abanyamakuru ko ibyo OMS yagezeho mu igenzura ryayo izabigeza ku bashobora gusuzuma niba ibyaha byarakozwe.
Ahavuye isanamu, Reuters
Muri icyo kiganiro n'abanyamakuru ku wa gatandatu, umukuru wa OMS Dr Tedros Adhanom Ghebreyesus yashishikarije Uburusiya guhagarika intambara ku muturanyi wabwo, abwira Abanya-Ukraine ati: "WHO irabashyigikiye".
Minisitiri w'ubuzima wa Ukraine Viktor Lyashko yavuze ko ibitaro 40 byo muri Ukraine byashenywe burundu.
Lyashko yasubiwemo n'ibiro ntaramakuru Unian byo muri Ukraine avuga ko "hafi ibitaro 500 byarangijwe [kwangizwa], kuburyo ubuvuzi budashobora kubitangirwamo".
