Ukraine: Abasivile b'i Mariupol bahungishijwe bakuwe mu buvumo bwo mu ruganda Azovstal

Abaturage b'abasivile babarirwa muri za mirongo bahungishijwe bakuwe i Mariupol bajyanwa mu gice kigenzurwa n'Uburusiya no mu kigenzurwa na Ukraine, nyuma yo kumara ibyumweru bagoswe.

Bamwe bavuye mu ruganda rutunganya ibyuma rwa Azovstal, ahantu ha nyuma hasigaye abasirikare ba Ukraine muri uwo mujyi w'ingenzi bitewe n'ahantu uherereye.

Uburusiya bwavuze ko abasivile babarirwa muri za mirongo bageze mu cyaro bugenzura.

Perezida wa Ukraine Volodymyr Zelensky yavuze ko itsinda rinini na ryo riri mu nzira ryerekeza i Zaporizhzhia, umujyi Ukraine ikigenzura.

Yanditse kuri Twitter ati: "Itsinda rya mbere rigizwe n'abantu bagera hafi ku 100 ririmo kwerekeza mu karere tugenzura.

"Ejo [ku wa mbere] tuzahura na bo i Zaporizhzhia. Ndashimira ikipe yacu! Ubu yo, hamwe na UN, barimo gukorana ku guhungisha abandi basivile babakura mu ruganda".

Umuryango w'abibumbye (ONU/UN) wemeje ko "igikorwa cy'inzira itekanye" cyatangiye ku wa gatandatu mu rwego rwo guhungisha abasivile, kandi ko urimo kukigiramo uruhare ufatanyije n'umuryango utabara imbabare, Croix-Rouge.

ONU yavuze ko urukurikirane rw'imodoka zo kubahungisha rwahageze ku wa gatandatu mu gitondo, ariko ntiyatanze amakuru y'aho abo bantu barimo kujyanwa cyangwa umubare w'abamaze kuhava, ivuga ko gutangaza ayo makuru bishobora kubangamira icyo gikorwa.

Amashusho yatangajwe n'ibiro ntaramakuru Reuters yo muri urwo ruganda, yerekana abasivile - biganjemo abagore n'abana - bafashwa kugenda hejuru y'ibirundo by'ibyasenyutse, burira mu modoka ya bisi yavuyeho amadirishya.

Umugore umwe ufite uruhinja rw'amezi atandatu yavuze ko bari bamaze amezi abiri baraheze muri urwo ruganda. Undi mugore, mukuru kuri we, avuga ko bari barimo gushiranwa n'ibiribwa.

Abategetsi bo muri Ukraine bavuze ko ibisasu by'Uburusiya byongeye kubura kuri urwo ruganda, nyuma y'agahenge ko ku cyumweru kamaze akanya gato.

'Ntushobora kwiyumvisha ibyo twabayemo'

Mu gihe ababarirwa muri za mirongo bahungishijwe, abasivile babarirwa mu magana - barimo n'abana - baracyari mu buvumo, nkuko byavuzwe na Denys Shleha wo mu nkeragutabara za Ukraine, wasubiwemo na Reuters ku cyumweru.

Yongeyeho ko ibindi bikorwa byo guhungisha bitari munsi ya bibiri bimeze nk'iki, bizacyenerwa kugira ngo buri muntu wese akurwe muri ubwo buvumo.

Umwe mu bahungishijwe bajyanwa mu gice kigenzurwa n'Uburusiya yabwiye Reuters ati: "Ntushobora kwiyumvisha ibyo twabayemo - iterabwoba".

Natalia Usmanova, w'imyaka 37, yagize ati: "Narimfite ubwoba ko ubuvumo butazahangana na ryo - narimfite ubwoba burenze".

"Igihe ubuvumo bwari butangiye gutigita, narimfite ubwoba bwinshi, umugabo wanjye ashobora kumbera umuhamya kuri ibyo: Narimpangayitse cyane ko ubuvumo butugwaho".

"Twamaze igihe kirekire cyane tutabona izuba".