Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Russia - Ukraine: Amwe mu makuru kuri uyu munsi wa 50 w'intambara
Kuri uyu munsi wa 50 w'ibitero by'Uburusiya muri Ukraine igisirikare cyaho kiravuga ko ibisasu by'abarusiya bikomeje kuraswa ku bikorwa bya gisirikare na gisivile mu mijyi yo mu burasirazuba.
Mariupol byifashe bite?
Imirwano ikomeye muri uyu mujyi uri ku cyambu bisa n'aho igikomeje mu gace k'inganda kawo kitwa Azovstal. Aka gace ni gafatwa bivugwa ko umujyi wose uba ufashwe.
Uburusiya bwatangaje ko abasirikare ba Ukraine barenga 1,000 bashyize intwaro hasi muri Mariupol.
Televiziyo y'Uburusiya yerekanye amashusho ivuga ko ari ay'abasirikare ba Ukraine bari gushyira intwaro hasi muri uyu mujyi.
Ariko Ukraine irabihakana, Serhiy Orlov wungirije umukuru wa Mariupol yabwiye BBC ko ingabo za Ukraine zikiri kurwana.
Mariupol ni umujyi w'igenzi uri ku nyanja wifuzwa n'Uburusiya kugira ngo ube inzira y'ubutaka ihahuza n'agace ka Crimea bafashe mu 2014.
Guturika gukomeye ku bwato rutura bw'Uburusiya
Ministeri y'ingabo y'Uburusiya yatangaje ko habaye guturika mu bwato bwa Moskva mu nyanja y'umukara, "kwangije bikomeye" ubwo bwato.
Mu itangazo, iyi minisiteri ivuga ko: "Amasasu y'ubwato Moskva yaturitse kubera umuriro muri ubu bwato bw'intambara.
"Ubu bwato bwangiritse bikomeye. Abakozi babwo bose babuvanywemo. Impamvu y'uwo muriro iri gukorwaho iperereza".
Ukraine yo ivuga ko ubu bwato bufite 186m z'uburebure bwarashweho misile zabo za Neptune.
Oleksiy Arestovych, umukozi mu biro bya perezida wa Ukraine yavuze ko abatabazi b'abarusiya batabashaga kugera kuri ubu bwato bwarimo abakozi bagera kuri 510.
Ubu bwato bwariho burwana n'abasirikare ba Ukraine bari ku kirwa kitwa 'Snake Island', umutegetsi wo mu gace ka Odesa akavuga ko babunesheke.
Ni ibiki bizwi kuri ubu bwato?
Moskva ni ubwato rutura bw'intambara bwubatswe mu myaka ya 1980 ku gihe cya URSS.
Bwari bwo bwato bunini mu gisirikare cyo mu nyanja cy'Abasoviyeti. Bwari bwabanje kwitwa Slava, ariko nyuma bwitwa Moskva(Moscow).
Intwaro z'ibanze z'ubu bwato ni misile za P-1000 Vulkan zirinda ubwato kuraswa.
Ubu bwato bwari bunini cyane mu mato y'intambara mu nyanja y'umukara mu myaka ya 2000, bwagize uruhare runini mu ntambara yo muri Syria, yatangiye mu 2015.
Mariupol mu mafoto
Amafoto mashya yo kuwa gatatu arerekana gusenyuka mu mujyi wa Mariupol.
Uburusiya buvuga ko ari bwo bugenzura uyu mujyi wose, ariko Ukraine ivuga ko ingabo zayo zikigenzura igice cy'icyambu cyawo.
Ayandi makuru:
- Amerika yemeye koherereza Ukraine izindi ntwaro "zo kubaha ubundi bushobozi" mu kurwanya Abarusiya, nk'uko Perezida Joe Biden yabivuze.
- Izo ntwaro zirimo za kajugujugu, indege ntoya cyane z'intambara zizwi nka "kamikaze drones", imodoka z'imitamenwa z'intambara, na za howitzer cannons.
- Amerika iri kwiga yohereza umwe mu bategetsi bayo bakuru guhura na perezida wa Ukraine i Kyiv, nk'uko ikinyamakuru Politico kibivuga
- Perezida Joe Biden na Visi perezida Kamala Harris bari mu bari kwigwaho ko bajyayo
- Polisi y'ikirwa cya Fiji yafatiriye ubwato bwite bunini (superyacht) bw'umuherwe uri hafi y'ubutegetsi bwa Moscow, nk'uko ibiro ntaramakuru Reuters bibivuga
- Ibinyamakuru muri Fiji bivuga ko ubwo bwato bwitwa Amadea ari ubw'umuherwe Suleiman Kerimov, umusare wabwo akaba ari guhatwa ibibazo kuko ngo bwahageze mu buryo butemewe
- Ubufaransa n'ikirwa cya Jersey byafatiriye umutungo wose hamwe w'agaciro kagera kuri miliyari 20 z'ama-pound(£) by'umuherwe Roman Abramovich, nk'uko France 24 ibivuga
- Jersey yafatiriye umutungo ugera kuri miliyari £5 w'uyu nyiri ikipe ya Chelsea, watangajwe n'iki kirwa nk'umuntu ugituye ukize kurusha abandi mu 2018
