Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Ukraine: Vladimir Putin yavuze ko bakomeza ibitero kugeza intego zabo 'nziza' zigezweho
Perezida Vladimir Putin w'Uburusiya yarahiriye gukomeza gutera Ukraine kugeza igihe intego"nziza" z'igihugu cye zigezweho.
Putin yavuze ko ibiganiro bigamije amahoro ntacyo byagezeho ashimangira ko ibitero - bimaze ibyumweru bitandatu - birimo kugenda uko byateguwe.
Umwe mu bategetsi ba Ukraine ariko yabwiye ibiro ntaramakuru Reuters ko ibiganiro bigoye ariko bikomeje.
Hari hashize icyumweru kirenga Putin ntacyo aravuga kuri aya makimbirane.
Yari yasuye ikigo cy'ibijyanye n'isanzure mu burasirazuba bw'Uburusiya ari kumwe na perezida Aleksandr Lukashenko wa Belarus, umwe mu nshuti ze za hafi cyane, mu kwizihiza isabukuru ya 61 Yuri Gagarin abaye umuntu wa mbere wagiye mu isanzure.
Putin yavuze ko nta mahitamo yandi yari asigaranye uretse gutera kugira ngo arengere abavuga ikirusiya mu burasirazuba bwa Ukraine.
Kremlin ivuga ko Ukraine yakoze jenoside ku bavuga ikirusiya mu burasirazuba bwa Ukraine, ariko nta bimenyetso bigaragazwa by'ibi.
Putin w'imyaka 69 yagize ati: "Ku ruhande rumwe, turimo turafasha kandi tunakiza abantu, ku rundi, turimo turafata ingamba zo gushimangira umutekano w'Uburusiya ubwabwo.
"Biraboneka neza ko nta mahitamo twari dufite. Cyari icyemezo gikwiriye." Yongeraho ko Uburusiya buzakomeza ibitero "mu njyana kandi bwitonze".
Moscow yahinduye umuvuno ishyira imbaraga mu burasirazuba bwa Ukraine, ikura ingabo zayo mu majyaruguru nyuma yo kuhahurira no kwirwano gukomeye kw'ingabo za Ukraine mu byumweru bishize.
Izindi nkuru wasoma:
Umuryango w'abibumbye (ONU/UN) uvuga ko abantu barenga miliyoni 10 bavuye mu ngo zabo kuva ibitero byatangira.
Umuvugizi wa perezida w'Uburusiya Dmitry Peskov mu cyumweru gishize yavuze ko iki gihugu "cyatakaje abasirikare benshi" kuva ibitero bitangiye.
Yaba ibyo Uburusiya bwatakaje cyangwa Ukraine nta na kimwe cyagenzuwe byigenga - abasesenguzi bavuga ko Uburusiya bwaba bugabanya umubare w'abo bwapfushije, naho Ukraine ikawukabiriza ngo biyitere akanyabugabo.
Abategetsi mu burengerazuba bavuga ko abasirikare hagati ya 7,000 na 15,000 b'Uburusiya baguye muri iyi ntambara.
Moscow nayo ivuga ko abasirikare barenga 15,000 ba Ukraine baguye mu "ibikorwa bidasanzwe bya gisirikare" nk'uko ibyita.
Uburusiya bwafatiwe ibihano byinshi mu rwego rw'ubukungu n'ibihugu by'iburengerazuba.
Ariko mu ijambo rye kuwa kabiri, Putin yavuze ko ubu "bidashoboka gushyira mu kato bikomeye uwariwe wese mu isi igezweho - cyane cyane igihugu kinini nk'Uburusiya".
Perezida Lukashenko nawe yavuze ko nta ngaruka z'ibyo bihano, abaza Putin ati: "Kuki rwose twaterwa ubwoba n'ibi bihano?"
Mu cyumweru gishize, leta y'Ubwongereza yavuze ko Uburusiya bwaba bugiye kwinjira mu ihungabana ry'ubukungu rikomeye cyane kuva ku gusenyuka k'Ubumwe bw'Abasoviyeti.
Mu yandi makuru:
- Uburusiya bwakajije imirwano ngo bufate umujyi bwagose wa Mariupol. Umukuru w'uyu mujyi avuga ko abantu bagera ku 21,000 bawiciwemo, ariko ko bahagaritse kubara imirambo kubera imirwano yo ku mihanda
- Muri Mariupol kandi, ibihugu by'iburengerazuba n'imiryango mpuzamahanga bivuga ko bitewe impungenge n'amakuru ataremezwa ko Uburusiya bwahakoresheje intwaro z'ubumara bukomeye (chemical weapons)
- Umukuru w'agace ka Luhansk mu burasirazuba bwa Ukraine yatangaje ko abasivile 400 bahambwe mu mujyi wa Severodonetsk kuva ibi bitero byatangira
